ނިއުގެ ދެ ލަނޑުގެ ލީޑަށް ނިމުން ގެނެސް ފުލުގައިއޮތް ގްރީންއަށް މުހިންމު ޕޮއިންޓެއް!

ދެ ލަނޑުގެ ލީޑަކާ އެކު ނިއު ރޭޑިއަންޓުން ކުރީގައި ވަނިކޮށް ގްރީން ސްޓްރީޓްސްއިން ފަހަތުން އަރައި 2-2 ން ނަތިޖާ ހަމަހަމަކޮށްފި އެވެ.

ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުގެ ފުރަތަމަ ހާފު ނިއުއިން ނިންމާލީ ދެ ލަނޑުގެ ލީޑާ އެކު އެވެ.

ފުލުގައި އޮތް ނަމަވެސް ގްރީންއިން ހިތްވަރު ނެރެ ދެވަނަ ހާފުގައި ނަތީޖާ ހަމަހަމަ ކުރި އެވެ.

މެޗުގެ 10 ވަނަ މިނެޓްގައި ނިއުއިން ލީޑް ނެގި އެވެ. އެ ލަނޑު ޖެހީ ހަސަން ރާއިފް އަހްމަދު (ހަންނަ) އެވެ.

އަލީ ފާސިރު ސެންޓޭ ފޮނުވާލި ބޯޅަ ގްރީންގެ ޑިފެންސުން ދިފާއުކުރުމުން ރީބައުންސްވި އެވެ. އޭރިއާގެ ބޭރުން އެ ބޯޅަ ލިބުނީ މުހައްމަދު އިރުފާން (އިރޭ) އަށެވެ.

އިރޭ އެ ބޯޅަ ދިނީ ހަންނަ އަށެވެ. ބޯޅަ ކޮންޓްރޯލް ކުރުމަށް ފަހު އޭނާ އެ ބޯޅަ ފޮނުވާލީ ގޯލްގެ މަތީ ކަނަށެވެ.

ނިއުގެ ދެވަނަ ލަނޑު ޖެހީ ބްރެޒިލްގެ ފޯވާޑް ގިލްޔޭމީ ސިލްވާ އެވެ. ނިއުގެ އަހްނަފް ރަޝީދު ފޮނުވާލި ބޯޅ ގްރީންގެ ކީޕަރު އަބްދުލް މަޖީދު ވިޝާން ދިފާއު ކުރުމުން ރީބައުންސްވި އެވެ.

ރީބައުންސްވި ބޯޅަ ދިފާއު ކުރުމުގައި ކީޕަރަށް ކާމިޔާބެއް ނުވި އެވެ. އޭނާ ބޯޅަ ސަލާމަތް ކުރަން ދެވަނަ ފަހަރަށް މަސައްކަތްކޮށްކޮށް އޮއްވައި ބްރެޒިލްގެ ފޯވާޑް ސިލްވާ އެ ބޯޅަ ގޯލްގެ ތެރެއަށް ވައްދާލި އެވެ.

ލަނޑު ޖަހާނެ ގިނަ އެހެން ފުރުސަތުތަކެއް ވެސް ނިއު އަށް ފަހިވި އެވެ.

ދެވަނަ ހާފުގެ ކުރީ ކޮޅު ގްރީންގެ ފުރަތަމަ ލަނޑު މިސްރުގެ ފޯވާޑް އަލް ސައީދު މަހްމޫދު ޖެހީ ޕެނަލްޓީއަކުންނެވެ.

ނިއުގެ އޭރިއާގެ ތެރެއިން ގްރީންގެ ޔޫޝައު ބިން އަލީ ނަޝީދަށް ނިއުގެ އިބްރާހިމް މައިސާން ފައުލު ކުރި އެވެ.

އަލް ސައީދު ފޮނުވާލި ޕެނަލްޓީ ދިފާއު ކުރަން ނިއުގެ ޕާކިސްތާނުގެ ކީޕަރު ސާގިބް ހަނީފް ޑައިވް ކުރީ ވެސް ރަނގަޅު ފަޅިއަށެވެ. އެކަމަކު ތިރި ފޮނުވާލި ބޯޅަ ގޯލް ވަނީ ގޯލްގެ ކަނަށެވެ.

ގްރީންއިން ނަތީޖާ ހަމަހަމަ ކުރީ މެޗުގެ 87 ވަނަ މިނެޓްގަ އެވެ. ނިއުގެ ހާފުގެ ތެރެއިން ގްރީން އަށް ލިބުނު ހިލޭ ޖެހުން އޭރިއާ ތެރެއަށް ނަގައި ދިނުމުން ގްރީންއިން އުފެއްދި ހަމަލާ ނިއުގެ ކުޅުންތެރިޔަކު ދިފާއު ކުރީ ގޯލްލައިން މަތިންނެވެ. އޭގެ ފަހުން ރީބައުންސްވި ބޯޅަ އުޒްބެކިސްތާނުގެ ޝުކުރާލީ ޕުލާޓަވް ނިއުގެ ގޯލްގެ ތެރެއަށް ބޯޅަ ވައްދާލި އެވެ.

ލީގުގެ މި ހަފުތާގެ ކުޅުން މާދަމާ ނިމެނޭ އެވެ. އެއަށް ފަހު ގައުމީ ޓީމު ކުޅޭ މެޗަށް ތައްޔާރުވާން ލީގް މެދުކަނޑަލާނެ އެވެ.

ލީގް ބްރޭކަށްދާނީ މާޒިޔާއިން އެއްވަނައިގައި ހަތަރު ޕޮއިންޓްގެ ލީޑްގައި އޮވެގެންނެވެ. މިއަދުގެ މެޗުން ހޯދި އެއް ޕޮއިންޓާ އެކު ނިއު ވަނީ ދެވަނަ އަށް ޖެހިލައިފަ އެވެ. އެއީ ކުރިން ދެވަނައިގައި އޮތް އޮޑި ސްޕޯޓްސް އަށް ވުރެ އިތުރަށް އެއް ޕޮއިންޓް ހޯދައިގެންނެވެ.

ގްރީން ހޯދި ޕއޮިންޓާ އެކު އެ ޓީމުން ވަނީ ޖުމުލަ ހަތަރު ޕޮއިންޓް ހޯދައި ތާވަލުގެ ފުލުން އަރައިގެންފަ އެވެ.