ގަވައިދަށް ބަދަލު ގެނެސް މަސީހާއި މޫސަ ސަލާމަތްކޮށްފި

މަޖިލިހުގެ ގަވައިދަށް ގެނައި މި އިސްލާހު ފާސްވުމާއެކު، މަޖިލިހުގެ ރިޔާސަތުން މަސީހް ވިދާޅުވީ އެއަށް މިހާރު އަމަލު ކުރަން ފަށާފައިވާ ކަމަށް. އެހެންވެ ފާސްކުރި އިސްލާހުގެ ދަށުން "ސައްހަ އެއްވެސް މައްސަލައެއް" މަޖިލިހުގައި ނެތް ކަމަށް މަސީހް އިއުލާން ކުރެއްވި. އޭގެ މާނަ އަކީ މަސީހް އާއި މޫސަ މަގާމުން ވަކިކުރުމަށް އިދިކޮޅު ފަރާތްތަކުން ހުށަހެޅި މައްސަލަ މި ހިސާބުން މަޖިލިހުގެ ތަޅުމުން ބޭރުވުން.

މި ވޯޓުގައި އިދިކޮޅު އެއްވެސް މެމްބަރަކު ބައިވެރިއެއް ނުވޭ.

މަޖިލިހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ ހުށަހެޅޭނީ 42 މެމްބަރުންގެ ސޮޔާ އެކު ކަމަށް 46 ވޯޓުން ފާސްކޮށްފި.

މަޖިލިހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ ހުށަހެޅޭނީ 42 މެމްބަރުންގެ ސޮޔާ އެކު ކަމަށް ގަވައިދަށް އިސްލާހު ގެނައުމުގެ ވޯޓަށް މަޖިލިހުން ތައްޔާރުވެއްޖެ.

ގަވައިދަށް ގެންނަން ހުށަހެޅުއްވި މައްސަލައިގެ ބަހުސް މަރުހަލާ ނިންމާލައިފި. ވޯޓަށް އެހުން އޮންނާނީ މެންދުރު 1:30 ގައި.

މާރިޔާ: އަޅުގަނޑުމެން މި އިސްލާހަށް ތާއީދެއް ނުކުރަން. މަޖިލިހުގެ މަސައްކަތް ކުރިއަށް ދާނެ އިތުބާރު ނެތްކަމުގެ މައްސަލަ ހުށަހަޅާފައި އޮތަސް. ގާސިމް މިތަނަށް ހާޒިރު ނުކުރައްވައި ތިޔަ ގެންދަވަނީ މަނިކުފާނު ތިޔަ ގޮނޑީގައި އިންނަވަން.

އަބްދުއްރަހީމް އަބްދުﷲ: ޑިމޮކްރެސީ އަކީ އެކި ދުވަހު އެކި ގޮތަށް ބަަދަލުވާ އެއްޗެއްތޯ؟ ވެގެން މިއުޅެނީ ވެރިކަން ނޫން އެއްވެސް ކަމެއް ބޭނުން ނުވެގެން އުޅޭ މީހުންނަށް ކެތް ނުވެގެން. ވިދާޅުވާހާ ގޮތަކަށް ރައީސް ޔާމީން ކަންކަން ނުކުރައްވާތީ އޭގެ އުދާހެއް މިއުޅެނީ. ކިތަންމެ އަސަރެއް ކުރިޔަސް ރައީސް ޔާމީނަށް ތާއީދު ނެތޭ ކަމަށް ބުނެ ދައްކާ ވާހަކަ ގަބޫލު ކުރަނީ ކޮން ބައެއްތޯ؟ އެންމެ ފަހުން މަޖިލިހުގައި ނެގި ވޯޓުގައި 48 މެމްބަރުން ވިދާޅުވީ މަސީހަށް އިތުބާރު އެބައޮތޭ. މިކުރާ ކަމަކީ ރައްޔިތުންގެ ހިތްތަކުގައި ބިރުވެރިކަން އުފެއްދުމަށްޓަކައި ތިމާ އަށް ނޭނގޭ ކަންކަން އެނގޭ ކަމަށް ހަދައިގެން ވާހަކަ ދެއްކުން. ތަރައްގީ ހުއްޓުވަން މިތަނުގައި ޖަހަން އުޅޭ ސަކަރާތް ޖެހުމަށް ފުރުސަތު ނުދޭނަން. މި ތިބީ ރައްޔިތުންނަށްޓަކައި ތަރައްގީ އަށް ފުރުސަތު ދޭން. މިއަދު ކިތަންމެ ވަރަކަށް ތަރައްގީ ނާދެއޭ ބުންޏަސް އެކަން ގަބޫލުކުރާނެ މީހަކު ނެތެއް ނޫންތޯ؟ ގާސިމް ހައްޔަރުކުރީ މި ސަރުކާރުން އެކަނިތޯ؟ އޮގަސްްޓް 12، 13 ގައި ގާސިމް ހައްޔަރުކުރީ ކޮން ބައެއްތޯ؟ މިއީ ރައްޔިތުން ދަންނަ ކަންކަން. މި ގައުމުގެ ތަރައްގީ އާއި ލާބަ އާއި މަންފާ އަށް އަޅުގަނޑުމެން މި މަސައްކަތް ކުރަނީ. ދިވެހިންގެ ކަންކަން ނިންމާނީ ދިވެހިން. ދިވެހި މާހައުލަށް، އިސްލާމްދީނާ ފުށުއަރާ ގޮތަށް ކަންކަން ނިންމާނީ ދިވެހިން. މިއީ އަޅުގަނޑުމެންގެ ކެމްޕެއިންގައި ދެއްކި ވާހަކަ. އަޅުގަނޑުމެންގެ އެންމެ އާދައިގެ މީހާ ހައްޔަރުކޮށްފައި، ބޮޑެތި ފައިސާ ހުރި މީހާ އެފަދަ ކަމެއް ކުރީމާ އެ މީހާ ވެސް މި ސަރުކާރުން ހައްޔަރު ކުރާނެ. މި ސަރުކާރުގެ އަމާޒަކީ ރައްޔިތުންނަށް މަގުމަތީގައި ހަމަޖެހިގެން ހިނގޭނެ މާހައުލެއް ގާއިމް ކޮށްދިނުން. މިފަދަ އެތައް އިސްލާހެއް މަޖިލިހުގެ ގަވައިދަށް ގެންނަންޖެހޭ. މިއީ ފެށުން. މީގެ ކުރިން ވެސް މެމްބަރުން ހައްޔަރުކުރި. ގާސިމް ހައްޔަރުކޮށްގެން މިހާރު މިވަރަކުން މިއުޅެނީ ސިޔާސީ މަގުސަދެއްގައި.

އަލީ އާޒިމް: ލަދެއް، ހަޔާތެއްގެ އެއްވެސް ކަންފުޅެއް ނެތީތޯ؟ މިއީ ގާނޫނުއަސާސީއާ ކަނޑައެޅިގެން ހިލާފު އިސްލާހެއް. ތިޔަ މަގާމުގެ އިއްޒަތް، ލަގަބު، ހަށިފާރަވެރިން މުހިންމިއްޔާ މަސީހް ހަމަ ތި ގޮތަށް ކަންތައް ކުރަން. އަޅުގަނޑުމެން ކަންބޮޑުވަނީ މި ގައުމުގެ ވެރިން ރައްޔިތުންނަށް އަނިޔާކުރާތީ. އެއްގޮތަކަށް ވެސް މިއުޅެނީ ތަރައްގީއާ ހެދި ކަންބޮޑުވެގެން ނޫން. ތަރައްގީގެ ބޮޑު ބައެއް ދަނީ ވެރިންގެ ޖީބަށް. ރައްޔިތުންގެ ކަންކަން އެންމެ ކުރިއަށް ގެންދިއުމުގެ ވިސްނުމުގައި އަޅުގަނޑުމެން މި މަސައްކަތް ކުރަނީ. މުހިންމީ ހަމަ ތިޔަ ވަޒީފާތޯ؟ ނިކަން ބައްލަވާ ރައްޔިތުން އުޅޭ ހާލު؟ މީހުންނަށް ދަރާފައިވާ މީހުން ގިނައީ މި ގައުމުގައި. ހަތަރު ގަޑީގައި ރަނގަޅަށް ކާން ނުލިބޭ މީހުން ގިނައީ؟ ރައްޔިތުންގެ މަޖިލިހުގެ ރައީސް އަައްޔަން ކުރާނީ ރައީސުލްޖުމްހޫރިއްޔާ ކަމަށް ގާނޫނުއަސާސީގައި ލިޔެލަން އަޅުގަނޑަށް ފެނޭ. ރައްޔިތުންގެ ތާއީދު ނެތްކަން އެނގޭތީ މިއުޅެނީ ލޯކަލް އިންތިޚާބު ބާއްވަން ނުކެރިގެން. ތިޔަ ގޮނޑީގައި ބަހައްޓާފައި އިން ތަން ފެންނަނީ ޕަޕެޓެއް. ރައްޔިތުންގެ މަޖިލިހުގެ ރައީސަކީ މަޖިލިހުގެ ރައީސެއް ނޫން. އެއީ ސަރުކާރުން މިތާނގައި ބަހައްޓާފައި ހުންނަ މީހެއް.

އަލީ އާރިފް: އަޅުގަނޑުމެން އާ ކަމެއް ނުކުރަން. އެ ބޭފުޅުން ލާންވީ ނޫންތޯ 42 ސޮއި ހޯދާފައި. ރައްޔިތުންނަށް ތަރައްގީގެ އެތައް ޕްރޮގްރާމެއް ހުއްޓުވަން މިއުޅެނީ. އަޅުގަނޑުމެންގެ މައްޗަށް ލާޒިމްވާ ކަންތައްތައް މިކުރަނީ. ކުޑަ އަދަދެއް ޖަހާފައި އޮތީމާ ދުވާލަކު އެއްޗެއް ލާތީ ތަރައްގީ ހުއްޓުވާތީ މިއުޅެނީ. އަޅުގަނޑުމެން އައީ ސަރުކާރު ދިފާއު ކުރަން. ރައީސްގެ މެނިފެސްޓޯގައި ހިމެނޭ ކަންކަން ރައްޔިތުންނަށް ފޯރުކޮށްދޭން އައީ. ޕާޓީ ވެގެނެއް ނޫން އަޅުގަނޑުމެންނަށް ވޯޓު ދިނީ. ސަރުކާރަށް ނިސްބަތްވާ ބަޔަކަށް ވާތީ ބޮޑު ސިންގާ މެޖޯރިޓީއެއް ރައްުޔިތުން އަޅުގަނޑުމެންނަށް ދިނީ. ވެރިކަން ބޭނުމިއްޔާ މި ފަސް އަހަރު ނިންމަން ޖާގަ ދެއްވާ.

އަބްދުﷲ ރިޔާޒް: މަޖިލިހަށް އިތުބާރު ނެތްކަމުގެ މައްސަލަ ހުށަހަޅާފައި ވަނިކޮށް، ގަވައިދު ބަދަލުކުރުމަކީ ޑިމޮކްރެސީއެއްގައި ކުރާނެ ކަމެއް ނޫން. މިއަދު ވެސް ސަރުކާރާ ދެކޮޅު މަޖިލިހުން އެ ތިއްބެވީ ޖަލުގައި. ކިތަންމެ ވަރެއް އެރިޔަސް، އަޅުގަނޑުމެން މި މަސައްކަތް ކުރާނަން. މި ގައުމު އަލުން ޑިމޮކްރެސީ އަށް ގެންދާނަން.

އަލީ ނިޒާރު: މަޖިލިހުގެ ގަވައިދުގެ މުޅި ނިޒާމު ކިލަނބު ކުރާ ތަން މި ފެންނަނީ. ގާނޫނުއަސާސީ އާއި ގަވައިދުތަކާއި ގާނޫނުތައް ހިމާޔަތް ކުރަން އުޅޭއިރު ފެންނަނީ ސިކުނޑި ހަމަނުޖެހޭ މޮޔައިން ކަންކަން ކުރާ އުސޫލުން ކަންކުރާ ތަން. އުިއްތިފާގެއްތޯ ހުރިހާ ސިޔާސީ ލީޑަރު ޖަލުގައި ތިބުމަކީ؟ 50 މިލިއަނަށް ކުރެވޭކަން 150 މިލިއަނަށް ކުރާއިރު ޖަވާބުދާރީ ކުރެވޭތޯ؟ ޕީޕީއެމްގެ ސިޔާސީ ފިކުރެއްގައި އައި އިރު ރައްޔިތުން އުންމީދެއް ކުރި. އެކަމަކު މިއަދު ފެންނަނީ ތިޔަބޭފުޅުން އެހެން ވިސްނުމެއްގައި، ހުދުމުހުތާރު ގައުމަކަށް މުޅި ގައުމު ބަދަލުކޮށްލާތަން. ގަވައިދު ބަދަލުކުރަނީ ރައީސް މީހާ އަށް ބާރު ދިނުމަށްޓަކައި. ރައީސް ޔާމީނަށް ތިޔަބޭފުޅުން އިތުރަށް ބާރު ތިޔަ ދެނީ، އިތުރަށް ހުދުމުހުތާރު ކުރުވަނީ. ތީ ރައީސް ޔާމީނަށްޓަކައި ބަސް ބުނާ ބޭފުޅުން. ގާނޫނުއަސާސީގެ އެއްވެސް ބާރެއް ނެތް ތަން މި ފެންނަނީ.

އިބްރާހިމް ދީދީ: ގަވައިދު ހުއްދަ ދޭ ގޮތަށް ގަވައިދު އިސްލާހު ކޮށްގެން ކުރިއަށް ގެންދެވޭނެތީ މިއަށް ތާއީދުކުރަން. މަޖިލިހުގެ ރައިސާއި ނައިބު ރައީސްގެ މަގާމަށް ފޭރިގަންނަން އުޅެނީ ކޮން ބައެއްކަން ރައްޔިތުންނަށް އެނގޭ. މިއަދު މި ތަންތަނަށް ފާޑުކިޔައި ކޮރަޕްޝަނޭ ކިޔާތީ ހިތާމަކުރަން. ވެރިކަމަށް ދަހިވެތިވެ އެތައް ދުވަހެއް ވަންދެން ވެރިކަމަށް ބަގުޑި ބައްދައިގެން ތިބި ބައެއް މިކަމާ މިއުޅެނީ.

މޫސާ މަނިކު: ޑިމޮކްރެސީ އެއް ނުގެނޭވެ މި ގައުމުގައި އަނިޔާވެރިކަމުގައި ތިބި ބަޔަކަށް. ޑިމޮކްރެސީއެއް ނުގެނެވޭނެ ރައީސް މައުމޫނާ އެކު. ޑިމޮކްރެސީއެއް ނުގެނެވޭނެ އަބްދުﷲ ރިޔާޒްއާ އެކު

އަނާރާ ނައީމް: އެއްވެސް ހާލެއްގައި މިއަދުގެ މި މައްސަލަ އަށް ތާއީދު ކުރެވޭކަށް ނެތް. އިތުބާރު ނެތްކަމުގެ މައްސަލައެއް ހުށަހަޅާފައިވާ ދަނޑިވަޅުގައި މިފަދަ އިސްލާހެއް ގަވައިދަށް ގެނައުމަކީ ގަބޫލުކުރެވޭނެ ކަމެއް ނޫން. މިފަދަ އިސްލާހުތައް ހުށަހެޅުމުން މިއީ މި ދަނޑިވަޅާ ގުޅޭ ކަމެއްތޯ ބަލަންޖެހޭ. މަޖިލިހުގެ ގަވައިދަށް އިސްލާހު ގެނެސްގެން މެމްބަރުންގެ އަމިއްލަ ހައްގުތައް ވެސް ގެއްލިފައިވޭ. މިއީ އެފަދަ އިސްލާހެއް.

މަސީހް: ގާސިމް ހައްޔަރުކުރުމާ ގުޅޭ ގޮތުން ހައްޔަރުކުރި ފަރާތުން މަޖިލިހުގެ ގަވައިދުގައިވާ ގޮތަށް އަމަލު ކޮށްފައިވާ ވާހަކަ ދަންނަވަން. އަދި ގަވައިދުގައިވާ ގޮތުގެ މަތިން މަޖިލިހުގެ ރިޔާސަތުން އަމަލުކޮށްފައިވާ ކަމަށް ދަންނަވާލަން.

ހުސެއިން މުހައްމަދު: މަނިކުފާނަށް ސާބަސް. ގާސިމް ވަނީ ސައްހަ ނޫން ކޯޓު އަމުރެއްގެ ދަށުން ދޫނިދު އަށް ގެންގޮސްފައި. މަޖިލިހުގެ ގަވައިދުގައިވާ ގޮތުން 15 މިނިޓް ތެރޭގައި މަޖިލިހުގެ ރައީސަށް ނުވަތަ އަމީން އާންމަށް އަންގަން ވާނެ. އަދި މިގޮތަށް އެންގުމާ އެކު 24 ގަޑިއިރުގެ ތެރޭގައި އިމްތިޔާޒް ކޮމެޓީ އަށް އަންގަން ޖެހޭނެ ގަވައިދުގައިވާ ގޮތުން. މަނިކުފާނަށް މިކަން އެންގެވިތޯ. އަދި އިމްތިޔާޒް ކޮމެޓީ އަށް އަންގާފައެއް ނެތް.

އަލީ ހުސެއިން: އަޅުގަނޑު ގަބޫލުކުރާ ގޮތުގައި އިއްޒަތްތެރި ރައީސަށް ތިޔަ ގޮނޑިކޮޅުގައި ހުންނެވުމުގެ އެއްވެސް ހައިސިއްޔަތެއް ނެތް. ތިޔަ ގޮނޑިކޮޅު ދިފާއު ކުރަން ތިޔަ މަސައްކަތް ކުރައްވަނީ އެ ނޫން ގޮތެއް ނެތިގެންތޯއޭ؟ ތާކުންތާކު ނުޖެހޭ އިންސާނީ ބުއްދި ގަބޫލުނުކުރެވޭ ކަންތައް ކުރިޔަސް މީ ތަންފުކެއް ބޮޑުވަރު. ސާޅީސް ދެ މެމްބަރުންގެ ސޮޔާއެކު މިތަނަށް ހުށަހެޅިއްޖިއްޔާ މަނިކުފާނު އޮޓަމެޓިކުން ވަކިވާނެ. މަޖިލިހުގެ ރައީސަކީ ރައީސުލްޖުމްހޫރިއްޔާ އައްޔަން ކުރައްވާ ބޭފުޅަކަށް ހެދުމުން ހުރިހާ ކަމެއް ނިމުނީ. ތިޔަބޭފުޅުން ނުކުރެވިގެން އުޅެނީ ކޮން ކަމެއްކަން އަޅުގަނޑުމެންނަށް އެނގޭ. ތިޔަބޭފުޅުންނަށް ވެސް ޔަގީންވެއްޖެ މި ގައުމު ބަދަލުވެއްޖެ ކަން. މެޖޯރިޓީ ވެސް ބަދަލުވެއްޖެ ކަން އެނގިގެން ތިޔަ އުޅެނީ. އެންމެ ފަހަރަކު ވެސް ފުރުސަތު ދީފިއްޔާ މިކަން ނިންމާލާނަން.

ރޮޒެއިނާ: ތާއީދު ނެތަސް ގަދަކަމުން ތިޔަ ގޮނޑީގައި އިންނަވަން ތިޔަ ކުރައްވާ މަސައްކަތާ މެދު ހައިރާންވެ އަންތަރީސް ވަން. ސާޅީސް ދެ މެމްބަރުން ސޮއިރަން ޖެހޭ އެއްވެސް ހަމައެއް ނެތް. ރައްޔިތުންގެ ތާއީދު ނެތި ތިހެން ތިއްބެވޭނެ ކަމަކަށް ނުދެކެން. މިއީ ޑިމޮކްރެޓިކް ނިޒާމެއްގައި ކަން ކުރެވެން ޖެހޭ ކަމެއް ނޫން. ގާނޫނުއަސާސީގެ ރޫހަށް ބަލާއިރު ސިމްޕަލް މެޖޯރިޓީން ވިން ކުރެވޭނެ ވޯޓެއްގައި 42 ސޮއި ހޯދުމަކީ ގަބޫލު ކުރެވޭނެ ކަމެއް ނޫން.

ނިހާން: ރައްޔިތުންނަށްޓަކައި ނިންމަންޖެހޭ ވަރަށް ގިނަ ކަންކަން އެބަހުރި. މި މަސައްކަތަށް އެކަށީގެންވާ ވަގުތު ލިބޭނީ މަޖިލިސް ކުރިއަށް ގެންދެވޭ ގޮތް ހަދައިގެން. އަޅުގަނޑުމެން މި މައްސަލަ ހުށަހެޅީ ޖޮއިންޓް ޕާލަމެންޓްރީ ގުރޫޕުން ގަބޫލުކުރާ ގޮތުގައި އަޅުގަނޑުމެން އަދާކުރަންޖެހޭ ވާޖިބުތަކެއް ހުރުމުން. މި މަސައްކަތް ކުރުމަށްޓަކައި ގަވައިދަށް އިސްލާހު ގެނައުމަކީ ރައްޔިތުންނަށްޓަކައި ކުރަންޖެހޭ ކަމެއް. މިއީ ފެއްސާއި ރަތާއި ހުދުގެ އިސްލާހެއް. މި މައްސަލަ މަޖިލިހުގައި އަވަސްކޮށް ގެންގުޅޭ އުސޫލުގެ ތެރެއިން ނިންމަން ހުށަހަޅަން.

މާރިޔާ: ގާސިމް އެ އިންނެވީ ގާނޫނާ ހިލާފަށް ހައްޔަރުކޮށްފައިވާ ކަމަށް ވާއިރު، ގާސިމް މިތަނަށް އޭނާ ހާޒިރު ކުރައްވަން ޖެހޭނެ. އެއީ މަޖިލިހުގެ ގަވައިދުގައި އޮންނަ ގޮތް. ތަހުގީގަށް ހައްޔަރުކޮށްފައިވާ މެމްބަރުން މީގެ ކުރިން ވެސް މަޖިލިހަށް ހާޒިރުކުރި. މިކަމުގައި ތަފާތު ގެންގުޅެގެން ނުވާނެ.

ގަވައިދަށް ގެންނަ އިސްލާހަށް ބަހުސް ކުރަން ދިނީ އެއް ގަޑިއިރު.

ގާސިމް މަޖިލިހަށް ހާޒިރުނުކުރާ މައްސަލައިގައި ކުއްލި މައްސަލައެއް މަޖިލިހުގެ މިއަދުގެ ޖަލްސާ އަށް ހުށަހެޅުއްވި ކަމަށް ޖޭޕީގެ ޑެޕިއުޓީ ލީޑަރު އަބްދުﷲ ރިޔާޒް ވިދާޅުވި. އެކަމަކު އެ މައްސަލަ މަޖިލިހުގެ ރިޔާސަތުން ބަލައެއް ނުގަތް.

މިހާރު ދޫނިދޫގައި ހައްޔަރުކޮށްފައިވާ މާމިގިލީ ދާއިރާގެ މެމްބަރު ގާސިމް މިއަދުގެ ޖަލްސާ އަށް ހާޒިރު ނުކުރާނެ ކަމަށް ފުލުހުން ދެންމެ ބުނެފި. އެކަމަކު އޭގެ ސަބަބެއް ނުބުނޭ.

އާންމު ކޮމެޓީގެ ރިޕޯޓް އެ ކޮމެޓީގެ މުގައްރިރު ކެލާ ދާއިރާގެ މެމްބަރު އަލީ އާރިފް ހުށަހަޅުއްވައިފި.