ރާއްޖެ އައި ޓޫރިސްޓުންތަކެއް ވެލާނާ އިންޓަނޭޝަނަލް އެއާޕޯޓުގެ އެރައިވަލް ހޯލުން ނުކުންނަނީ: އިއްޔެ އިން ފެށިގެން އޭޑީސީ ވަނީ ބޮޑުކޮށްފައި --ފޮޓޯ/މިހާރު
02 މެއި 2017 - 15:52
31 comments
އެއާޕޯޓް ސާވިސް ޗާޖަށާއި ވެލާނާ އިންޓަނޭޝަނަލް އެއާޕޯޓުން ޑިވެލޮޕްމަންޓް ޗާޖު (އޭޑީސީ) ނަގަން ފާސްކުރި ގާނޫނަށް އިއްޔެ އިން ފެށިގެން އަމަލްކުރަން ފެށުމާ އެކު، ރާއްޖެ އިން ބޭރަށް ފުރާ ހުރިހާ ދަތުރުވެރިންގެ އަތުން ނަގާ ފީތައް ބޮޑުވެއްޖެ އެވެ.
ރާއްޖޭގައި ހިންގާ ބައިނަލްއަގުވާމީ ހުރިހާ އެއާޕޯޓަކުން ބޭރަށް ފުރާ ދިވެހިންގެ އަތުން 12 ޑޮލަރު، ބިދޭސީންގެ އަތުން 25 ޑޮލަރުގެ އެއާޕޯޓް ސާވިސް ޗާޖު (އޭއެސްސީ) ނަގާއިރު ވެލާނާ އިންޓަނޭޝަނަލް އެއާޕޯޓުން ފުރާ ފަސިންޖަރުންގެ އަތުން އޭއެސްސީގެ އިތުރުން އޭޑީސީ ވެސް އިއްޔެ އިން ފެށިގެން ނަގަން ވަނީ ފަށައިފި އެވެ. އެ ބަދަލާ އެކު ވެލާނާ އިންޓަނޭޝަނަލް އެއާޕޯޓުން ފުރާ ކޮންމެ ދިވެއްސަކު 24 ޑޮލަރު އަދި ބިދޭސީއަކު 50 ޑޮލަރު ދައްކަން ޖެހެ އެވެ.
ވެލާނާ އިންޓަނޭޝަނަލް އެއާޕޯޓުގެ އިތުރުން ސ. ގަން އިންޓަނޭޝަނަލް އެއާޕޯޓާއި ހަނިމާދޫ އިންޓަނޭޝަނަލް އެއާޕޯޓުން ރާއްޖެއިން ބޭރަށް ފުރާ ފަސިންޖަރުންގެ އަތުން ވެސް އޭއެސްސީ ނަގާނެ އެވެ. އެކަމަކު ދެ އަހަރު ނުވާ ކުޑަކުދިންނާއި ޑިޕްލޮމެޓިކް އިމްތިޔާޒް ލިބިފައިވާ ފަސިންޖަރުން އަދި ޓްރާންސިޓް ފަސިންޖަރުންގެ އަތުން އޭއެސްސީ އަދި އޭޑީސީ ވެސް ނުނަގަ އެވެ.
މީގެ ކުރިން ގަމާއި ހަނިމާދޫން ފުރާ ފަސިންޖަރުންގެ އަތުން އޭއެސްސީ ނަގާފައެއްނުވެ އެވެ.
އޭއެސްސީގެ ގާނޫނާއި އޭޑީސީގެ ބިލު އެއްކޮށްލައިގެން މިދިޔަ އަހަރުގެ ނޮވެމްބަރު 24 ވަނަ ދުވަހުގެ ރޭ ފާސްކުރި އާ ބިލު ރައީސް އަބްދުﷲ ޔާމީން ތަސްދީގުކުރެއްވީ ޑިސެމްބަރު 7 ގަ އެވެ. އަދި ގާނޫނުގައިވާ ގޮތުން އޭއެސްސީ އާއި އޭޑީސީ ނަގަން ފަށަން ޖެހެނީ ގާނޫނަށް އަމަލުކުރަން ފަށާތާ ހަތަރު މަސް ހަމަވުމުންނެވެ. ހަތަރު މަސް ހަމަވެ މިދިއަ މަހު އެ ފީތައް ނަގަން އޮތަސް، މޭ 1 އަށް ފަސްކުރީ ކީއްވެގެން ކަމެއް މީރާއަކުން ނުބުނެ އެވެ.
އޭޑީސީ ނަގަނީ ހަމައެކަނި ވެލާނާ އިންޓަނޭޝަނަލް އެއާޕޯޓުން ފުރާ ފަސިންޖަރުންގެ އަތުން އެކަންޏެވެ.
އޭއެސްސީ ބިލު އެންމެ ފުރަތަމަ މަޖިލީހަށް ހުށަހެޅި އިރު އޮތީ ދިވެހިންގެ އަތުން ވެސް 25 ޑޮލަރު ނަގާ ގޮތަށެވެ. އެކަމަކު ވެރިކަން ކުރާ ޕީޕީއެމްގެ މެމްބަރުން އިސް ނަންގަވައިގެން އެ އަދަދު ވަނީ 12 ޑޮލަރަށް ކުޑަކޮށްފަ އެވެ. އެއީ ރައީސް ޔާމީންގެ އެއްބާރުލެއްވުމާ އެކު ގެނައި ބަދަލެއް ކަމަށް ޕީޕީއެމްގެ މެމްބަރުން ފުރަތަމަ ވިދާޅުވިޔަސް، ރައީސް ވަނީ މެމްބަރުންގެ އެ ނިންމެވުމާ މެދު، ވައިބަ ގްރޫޕްގައި، ނުރުހުން ފާޅުކުރައްވައިފަ އެވެ.
އެ ގާނޫނުގައިވާ ގޮތުން އޭއެސްސީ އާއި އޭޑީސީ ނެގުމުގެ ހުރިހާ ޒިންމާއެއް ނަގަން ޖެހޭނީ ފަސިންޖަރަކު ބޭރަށް ފުރާ އެއާލައިނަކުންނެވެ. އަދި މީރާ އަށް ނުދައްކައިފި ނަމަ، ޓެކްސް ނެގުމާ ބެހޭ ގާނޫނުގެ ދަށުން އެ އެއާލައިނެއް ޖޫރިމަނާ ކުރެވޭނެ އެވެ.
ކުރިން އޭޑީސީގެ ގޮތުގައި ނަގަމުން އައީ ދިވެހިންގެ އަތުން 12 ޑޮލަރާއި ބިދޭސީން އަތުން 25 ޑޮލަރެވެ.
އިންޑިއާގެ ޖީއެމްއާރު ކުންފުނިން ވެލާނާ އިންޓަނޭޝަނަލް އެއާޕޯޓް ހިންގި އިރު އޭޑީސީގެ ގޮތުގައި 25 ޑޮލަރު ނަގަން އުޅުމުން ސިވިލް ކޯޓުން އެކަން ހުއްޓުވި އެވެ. އޭރު ގިނަ ބަޔަކު އެކަމާ ދެކޮޅު ހެދީ އެއާޕޯޓް ތަރައްގީކޮށް ނުނިމެނީސް އޭޑީސީ ނަގަން އުޅުމުންނެވެ.
އޭޑީސީ އަކީ ދައުލަތަށް ލިބޭ އާމްދަނީ އިތުރުކުރުމަށް މި އަހަރުގެ ބަޖެޓުގައި ހިމަނާފައިވާ އާމްދަނީއެކެވެ ތެރޭގަ އެވެ. އޭޑީސީން ޖުމްލަ 575 މިލިއަން ރުފިޔާ ލިބޭނެ ކަމަށް ބަޖެޓުގައި އަންދާޒާކޮށްފައިވެ އެވެ. އެކަމަކު ދިވެހިންގެ އަތުން ނަގާ މިންވަރު 12 ޑޮލަރަށް ކުޑަކުރުމުން އެ އަދަދު މަދުވާނެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ބިންވަޅު
03 May 2017
01 މެއި 2017 މިއަދު އެކަނިވެސް 3 ގޮތަކުން ބޮޑު އަގެއް ރައްޔިތުން ދައްކަން ޖެހިއްޖެ އެވެ. އެއީ 1- މިއަދުން ފެށިގެން އެމް. ޓީ.ސީސީ ފެރީގެ ޓިކެޓް އަގު ބޮޑުވުން 2- މިއަދުން ފެށިގެން ބޭރަށް ފުރާ ކޮންމެ ދިވެއްސަކު އަތުން 12 ޑޮލަރު ނެގުން 3 މިއަދުން ފެށިގެން އަމަލްކުރަން ސިވިލުން ނެރުނު ޢާއްމު އޮނިގަނޑުގަ ވާގޮތުން ހުރިމަގާމުން އެހެން މަގާމަކަށް ބަދަލްވާނަމަ ހާތައްދުވަހު ޚިދުމަތްކޮށްގެން ލިބިފައިވާ އިންކްރީމެންޓް ފައިސާކޮޅު ކަނޑާލުން ޝުކުރިއްޔާ
އަހުމަދުބެ
03 May 2017
ޑިޕްލޮމެޓުންނަކީ ކޮބާ ހެއްޔެވެ؟ ހާލުދެރަ ބަލިމީހުންނާއި އެމަޖެންސީ ހާލަތް ތަކުގަ ރާއްޖެއިން ބޭރަށްދާ ނިކަމެތީންނަށް ލުއި ގޮތެއް ހަދާ ދިނުން އެދެމެވެ.
ހާލަތު
03 May 2017
އިކޮނޮމިސްޓްގެ ވެރިކަމުގައި މުޅިންވެސް މި އިވެނީ ރައްޔިތުންގެ އަތުން ނަގާ ޓެކްސްތަކާއި ޚިދުމަތްތަކުގެ އަގު އުފިލިގެންދާ ކަމުގެ ވާހަކައެވެ. ދިވެހިންގެ މައިގަނޑު ކެޔުމުގެ ބާވަތްތަކުގެ އަދު ދެ ގުނަ އިތުރުކޮށްފިއެވެ. ކަރަންޓް ގެ އަގު ބޮޑުކޮށްފިއެވެ. ކުރިން ސުންރޭޓްގައި ޖީއެސްޓީ ނަގާ އެތައް އެއްޗަކުން ޖީއެސްޓީ ނަގަން ފަށައިފިއެވެ. އެތަކެއް އެއްޗަކުން އިމްޕޯޓް ޑިއުޓީ ނަގަން ފަށައި ޑިއުޓީގެ މިންވަރު އިތުރު ކުރުމުން އެތަކެތީގެ އަގުތައް އުފުލިއްޖެއެވެ. ޓްރެފިކް ޖޫރިމަނާއާއި ޕާސްޓް ފީ އާއި އެނޫންވެސް އެތަކެއް ފީތަކެއް ބޮޑުކޮށްފިއެވެ. މެދުފަންތީގެ އާއިލާތަކަށް އާމްދަނީ އިތުރެއް ނުވެއެވެ. އަތްމަތި ދަނީ ދުވަހުން ދުވަހަށް ތާށިވަމުންނެވެ. ހައްގުތައް ދަނީ ނިގުޅައިގަންނަމުންނެވެ. މުއައްސަސާތަކުގެ ބާރު ކަނޑުވާލާފިއެވެ. ފަޑިޔާރުގެއިން އިންސާފު ނުލިބޭނެކަން ކަށަވަރު ވެއްޖެއެވެ.
ސަނީ
03 May 2017
އެސްސީ ބިލު އެންމެ ފުރަތަމަ މަޖިލީހަށް ހުށަހެޅި އިރު އޮތީ ދިވެހިންގެ އަތުން ވެސް 25 ޑޮލަރު ނަގާ ގޮތަށެވެ. އެކަމަކު ވެރިކަން ކުރާ ޕީޕީއެމްގެ މެމްބަރުން އިސް ނަންގަވައިގެން އެ އަދަދު ވަނީ 12 ޑޮލަރަށް ކުޑަކޮށްފަ އެވެ. އެއީ ރައީސް ޔާމީންގެ އެއްބާރުލެއްވުމާ އެކު ގެނައި ބަދަލެއް ކަމަށް ޕީޕީއެމްގެ މެމްބަރުން ފުރަތަމަ ވިދާޅުވިޔަސް، ރައީސް ވަނީ މެމްބަރުންގެ އެ ނިންމެވުމާ މެދު، ވައިބަ ގްރޫޕްގައި، ނުރުހުން ފާޅުކުރައްވައިފަ އެވެ.
އެންމެ ކިޔޭ
03 May 2017
މިހާރުވެސް ފަތުރުވެރިން އަންނަމުންދާ އަދަދު ދަނީ ދުވަހަކަށްވުރެ ދުވަހެއް ދައްވަމުން. ތި ނަގަމުންދާ އިތުރު ފީތަށް ވެސް ގިނަ ކަމުން. ފީ ނެގުމާ އެއްވަރަށް ޓުއަރިޒަމް ޕްރޮމޯޓް ކުރަން ހަރަކާތްތައް އިތުރު ކުރަން ޖެހޭ، މި ހިސާބުގައި ޓުއަރިޒަމް ކުރި އަރަމުން އަންނަ އެހެން ގައުމުތަކުގައި ނަގަމުންދާ ފީ ތަކަށް ވިސްނަން ޖެހޭ. ކޮމްޕެޓިޓިވް ފީ ތަކެއްވެސް ނެގެން ޖެހޭ. އެގޮތައް ވިސްނާއިރުގަ ދިވެހިރާއްޖެއިން ނަގަމުން މިދާ ފީ ތަކަކީ ޤަބޫލުކުރަން އުނދަގޫހާވެސް ގިނަ ފީ ތަކެއް. ދިވެހިިންގެ އަމިއްލަ އެއާރޕޯޓުން ފުރާއިރުވެސް ފީ ދައްކަން މި ޖެހެނީ. ވަރަށް ހިތްދަތި. ވޯޓު ވިއްކިޔަސް މަގޭ ވޯޓު ހަމަ ހިލާ ޔާމިން އަބްދުލް ޤައްޔޫމަކަށް ނުދޭނަން. ދިވެހި ސާފުބަހުން މި ބުނީ. ނުދޭނަން.
އަތައް
03 May 2017
ހޭބުއްދި ފިލާފަނެތިއްޔާނޫނީ މިފަދަ ނިންމުންތައް ނުނިންމާނެ! ރައޔިތުން އަތުން ވޯޓު ހޯދަން އަންނަން ލަދުގަންނަންޖެހޭ!
ޖަމަލޭ
03 May 2017
މިހެންވެ އަހަރެެމެން މިބުނަނީ ޔާމީނަކީ ހަމަ އެންމެ މޮޅު އިކޮނޮމިސްޓޭ..2018 އަށް ކެމްޕޭނު ފައިސާ ފެލުން މެކުހަށް
ޢަދީބް
03 May 2017
ދެން ފަތުރުވެރިން އަންނަލެއް މަދުވީމަ ބުނާނެ އިދިކޮޅުމީހުން ގެ ސަބަބުންނޭ..
ޖަޑިބު
03 May 2017
ނިކަންބުނެދީބަލަ އާންމު ރަތްޔިތުމީހާ ގެ ޖީބަށް އިތުރުވި އެއްޗެއް. ފެންނަނީ އަބަދުވެސް ހުރިއެއްޗެއް ދަމާގަންނަން އުޅޭމަންޒަރު. ކޮބާ އިކޮނޮމީއަށް އައި ހެޔޮބަދަލަކީ...
އަފިހުން ގޮއްޔެ
03 May 2017
މިސަރުކާރެއް ގެނެވުނު ކަމުން މުޅިން މަރާފިތާ، ޤައުމު ޑިޕްރެޝަނަށް މިދަނީ މި ދުއްޕާން ސަރުކާރެއްގެ ސަބަބުންކަން ހަމަ ޔަޤީން، ދަރުބާރު ފެކްޝަނަށް އެއްވެސް ދިވެއްސަކު ވޯޓު ދޭނެ ކަމެއްނެތް، ކީއްކުރަން! ދޭން ޖެހޭ އެއްވެސް ސަބަބެއް ނެތެއްނު، މީހަމަ ރައްޔިތުން ފެލާ ސަރުކާރެއްކަން މިހާރު ޔަޤީން ވެއްޖެ.