އޮރެގަން (މެއި 29) - މުސްލިމް އަންހެން ކުއްޖަކާއި އޭނާގެ ރަހުމަތްތެރިއަކަށް ދިމާކުރަން އުޅުނު މީހާ ހުއްޓުވަން އުޅެނިކޮށް ވަޅިން ހަމަލާދީ މަރާލި ދެ "ބަތަލުން" ގެ އާއިލާތަކަށާއި ޒަޚަމްވި މީހާ އަށް އެހީވުމަށް 600،000 ޑޮލަރު އެއްކޮށްފި އެވެ.
އޮރެގަންގެ ޕޯޓްލޭންޑުގެ ރޭލެއްގެ ތެރޭގައި ހުކުރު ދުވަހު ދިން ހަމަލާގައި މަރުވީ 23 އަހަރުގެ ގްރެޖުއޭޓެއް ކަމަށްވާ ޓެލީސިން މީރްދީން ނަމަކައި-މީޗް އާއި ސިފައިންގެ ޚިދުމަތުން ރިޓަޔާކޮށްފައިވާ 53 އަހަރުގެ ރިކީ ޖޯން ބެސްޓެވެ. ޒަޚަމްވީ މިކާހު ޑޭވިޑް-ކޯލް ފްލެޗާ އެވެ. އޭނާގެ ކަރަށް ވަނީ ވަޅީގެ ހަމަލާ އަރައިފަ އެވެ. އޭނާގެ މަންމަ ބުނީ ކަރުގެ މައި ނާރާ ހަމައަށް ނުފޯރާ ހުރީ މިލިމީޓަރެއް ކަމަށެވެ.
ބުރުގާ އަޅައިގެން އިން އަންހެން ކުއްޖާއާ ދިމާކުރި 35 އަހަރުގެ ޖެރެމީ ޖޯސެފް ކްރިސްޓިއަން ހުއްޓުވަން މި އެންމެން ވެސް މަސައްކަތްކޮށްފައިވެ އެވެ. އޭނާ މާދަމާ ކޯޓަށް ހާޒިރު ކުރާނެ އެވެ. އޭނާގެ މައްޗަށް ވަނީ މީހުން މެރިކަމުގެ ކުށާ އެކު ހަތަރު ދައުވާއެއް އުފުލަން ނިންމައިފަ އެވެ. ހަމަލާ ދިން ކްރިސްޓިއަންގެ ކުށުގެ ރެކޯޑް ހާމަކުރަން ފުލުހުން ވަނީ ދެކޮޅު ހަދައިފަ އެވެ. ރޭލުގައި އިން 16 އަހަރުގެ މުސްލިމް އަންހެން ކުއްޖާއާ އޭނާގެ 17 އަހަރުގެ ރަހުމަތްތެރިއާ ދިމާކުރުމުގެ ގޮތުން ކްރިސްޓިއަން ވަނީ ހުރިހާ މުސްލިމުން މަރުވާން ޖެހޭނެ ކަމަށް ބުނެފަ އެވެ.
"އަޅުގަނޑުމެންނަށްޓަކައި އެ ބައެއްގެ ފުރާނަ ނުރައްކަލުގެ ތެރެއަށްލީ މީހުންނަށް ވަރަށް ބޮޑަށް ޝުކުރު އަދާކުރަން. އެ މީހުންނަށް އަޅުގަނޑުމެންނަކީ ކޮން ބައެއްކަން ނޭނގޭ އިރު ވެސް އަޅުގަނޑުމެންނަށްޓަކައި އެ މީހުންގެ ފުރާނަ ގުރުބާން ކުރީ،" ލޯކަލް ޓީވީ ޗެނަލެއްގައި ވާހަކަ ދައްކަމުން މުސްލިމް އަންހެން ކުއްޖާ ބުންޏެވެ.
މި ހަމަލާއާ ގުޅިގެން ސިޔާސީ އެކި ފަރާތްތަކުގެ ހަމްދަރުދީ ލިބެމުންދާ އިރު ރައީސް ޑޮނަލްޑް ޓްރަމްޕް އެ ހާދިސާއާ ގުޅޭ ގޮތުން ޓްވީޓް ނުކުރައްވާތީ ފާޑުކިޔުންތައް ދަނީ އަމާޒުވަމުންނެވެ.