ދިވެހި ހައްޖުވެރިން ޖަމްރާތަކަށް ހިލަ އުކަން ދަނީ. -- ފޮޓޯ: އަހުމަދު އަބްދުﷲ ސައީދު
08 ޖޫން 2017 - 21:02
29 comments
ހައްޖު ކުންފުނިތަކުގެ ޕްރޮޕޯޒަލްތައް އަލުން އިވެލުއޭޓް ކުރަން އެންޓި ކޮރަޕްޝަން ކޮމިޝަން (އޭސީސީ) އިން އަންގާފައިވަނިކޮށް، އެއާ ހިލާފަށް އިސްލާމިކް މިނިސްޓްރީން އަމަލު ކުރި ކަމަށް ބުނެ، ބައެއް ކުންފުނިތަކުގެ ވެރިން އޭސީސީގެ މެމްބަރުންނާ މިއަދު ބައްދަލުކުރައްވައިފި އެވެ. އަދި އެ ކުންފުނިތަކުން ކުރި ޝަކުވާތަކާ ގުޅިގެން އޭސީސީން ވަނީ އެ މައްސަލަ ބަލަން ފަށައިފަ އެވެ.
އިސްލާމިކް މިނިސްޓްރީން ވަނީ ހައްޖަށް މީހުން ގެންދިއުމަށް އެދި ހުށަހެޅި ކުންފުނިތަކުގެ ތެރެއިން ހަތަރު ކުންފުންޏަކަށް އެ ހުއްދަ ދީފަ އެވެ. އިސްލާމިކް މިނިސްޓްރީން ބުނި ގޮތުގައި އެ ހަތަރު ކުންފުންޏަށް ހުއްދަ ދިނީ ކުންފުނިތަކުން ހުށަހެޅި ފޯމުތައް އަލުން ބެލުމަށްފަހު އެވެ.
ހައްޖަށް ގެންދިއުމަށް ހުއްދަ ދިން ހަތަރު ކުންފުނި:
1- ހައްޖު ކޯޕަރޭޝަން
2- އަލްހަރަމައިން ހައްޖު ގުރޫޕް
3- ސިސިލްފަރު ހައްޖު ގްރޫޕް
4- ޒައީ ހައްޖު ގްރޫޕް
އޭސީސީގެ އޮފިޝަލަކު ވިދާޅުވީ އިސްލާމިކް މިނިސްޓްރީގެ ނިންމުމާ ގުޅިގެން ބައެއް ކުންފުނިތަކުގެ އިސް ބޭފުޅުން އޭސީސީގެ މެމްބަރުންނާ ބައްދަލު ކުރެއްވި ކަމަށެވެ. އެ ބައްދަލުކުރެއްވުމުގައި ކުންފުނިތަކުގެ ވެރިންގެ ކަންބޮޑުވުންތަކާއި ޝަކުވާތައް ހިއްސާ ކުރެއްވި ކަމަށް އޭނާ ވިދާޅުވި އެވެ.
"ހައްޖަަށް މީހުން ގެންދިއުމަށް ހަތަރު ކުންފުންޏަކަށް ދިނީ އުސޫލުތަކާ އެއްގޮތަކަށް ނޫން ކަމަށް ބުނެ، އެކަމުގެ ޝަކުވާތައް ކޮމިޝަނާ ހިއްސާ ކުރީ،" އޮފިޝަލް ވިދާޅުވި އެވެ.
އޭނާ ވިދާޅުވީ ހައްޖަށް މީހުން ގެންދިއުމަށް އިސްލާމިކް މިނިސްޓްރީން ހަތަރު ކުންފުންޏެއް ކަނޑައެޅީ އޭސީސީގެ އެންގުމާ އެއްގޮތަށްތޯ ބަލަން ފަށާފައިވާ ކަމަށެވެ. އަދި މި މައްސަލާގައި އަޅާނެ ފިޔަވަޅެއް އެނގޭނީ އޭސީސީން ބަލަން ޖެހޭ ކަންކަން ބެލުމަށްފަހު ކަމަށް އޭނާ ވިދާޅުވި އެވެ.
ހައްޖަށް ގެންދިއުމުގެ ހުއްދަ އަށް އެދި ޕްރޮޕޯސަލް ހުށަހެޅި ކުންފުނިތަކުގެ ޕްރޮޕޯޒަލް އިވެލުއޭޓްކޮށް، ޕޮއިންޓް ދީފައިވަނީ ކޮރަޕްޝަނަށް މަގުފަހިވާ ގޮތަށް ކަމަށް ބުނެ ބަޔަކު އޭސީސީ އަށް މައްސަލަ ހުށަހެޅުމުން އެ ކޮމިޝަނުން ވަނީ ހުއްދަ ދިނުމާ ގުޅޭ ކަންތައްތައް މަޑުޖައްސާލަން މިނިސްޓްރީ އަށް އަންގައިފަ އެވެ.
ހަމައެއާއެކު، ހައްޖަށް ގެންދިއުމުގެ ހުއްދަ ދޭނެ ކުންފުނިތައް ކަނޑައެޅުމުގައި ކޮރަޕްޝަނަށް މަގުފަހިވާ ގޮތަށް އަމަލު ކޮށްފައިވާތީ، ހައްޖު ކުންފުނިތަކުގެ ޕްރޮޕޯސަލްތައް އަލުން އިވެލުއޭޓް ކުރަން އެންގި އެވެ. ކުރިން ދަރުމަ ލިލް ހައްޖު އަދި ކިސްވާ ގްރޫޕަށް ވެސް ހައްޖަށް މީހުން ގެންދިއުމުގެ ހުއްދަ ދިނެވެ. އެކަމަކު އިސްލާމިކް މިނިސްޓްރީން އިއްޔެ ކުރި އިއުލާނުގައި މި ދެ ކުންފުންޏެއް ނުހިމެނެ އެވެ.
އޭސީސީ އާއި ބައްދަލުކުރި ބައެއް ކުންފުނިތަކުގެ ވެރިން "މިހާރު" އަށް ވިދާޅުވި ގޮތުގައި ކޮމިޝަނުން ކުރިން ބުނެފައި އޮތީ ހަ ކުންފުންޏެއް ބިޑިން މަރުހަލާގައި ބައިވެރިކޮށްގެން އަލުން ޕްރޮޕޯސަލްތައް އިވެލުއޭޓް ކުރުމަށެވެ. އެކަމަކު އެ ކުންފުނިތަކުގެ ޕްރޮޕޯސަލްތައް އިވެލުއޭޓް ނުކުރާ ކަމަށް އެ ބޭފުޅުން ވިދާޅުވި އެވެ.
"އޭސީސީއަކީ މިނިވަން، މުސްތަގިއްލު މުއައްސަސާއެއް. އެކަމަކު އޭސީސީގެ އެންގުމަށް އެއްވެސް ވަރަކަށް ބޯލަނބާފައެއް ނުވޭ،" ހައްޖަށް ގެންދިއުމުގެ ހުއްދައަށް އެދި ހުށަހެޅި ކުންފުންޏެއްގެ ވެރިއަކު ވިދާޅުވި އެވެ.
އޭނާ ވިދާޅުވި ގޮތުގައި ހައްޖު ކޯޕަރޭޝަން ފިޔަވައި ހުއްދަ ދިން ތިން ކުންފުނީގެ ތެރޭގައި ސަރުކާރުގެ އިސްވެރިންގެ މަސްލަހަތު އޮންނަ ބައެއް ކުންފުނިތައް ހިމެނެ އެވެ. އެކަމަކު އެ ބޭފުޅުންގެ ޝަކުވާއަކީ އޭސީސީގެ އުސޫލަށް ތަބާނުވެ، ހައްޖަށް ގެންދާނެ ކުންފުނިތައް ކަނޑައެޅުން ކަމަށް އޭނާ ވިދާޅުވި އެވެ.
"އޭސީސީން ބުނި ތިމަންނަމެން އެންގި ގޮތަށޭ ކުރިއަށް ގެންދަން ޖެހޭނީ. އަޅުގަނޑުމެންނަކީ އިވެލުއޭޓް ވާން ޖެހޭނެ ބައެއް، އިވެލުއޭޝަނުން ބޭރުން ވާން ޖެހޭ ބައެއް ނޫން. އިވެލުއޭޓް ނުކުރި މައްސަލާގައި އޭސީސީ އަށް ދެވަނަ ފަހަރަށް މިދިޔައީ،" ކުންފުންޏެއްގެ އިސްވެރިއަކު ވިދާޅުވި އެވެ.
ބައެއް ކުންފުނިތަކުގެ ވެރިން ތުހުމަތު ކުރެއްވި ގޮތުގައި ހައްޖަށް މީހުން ގެންދިއުމުގެ ކަންކަން އޮތީ ކޮރަޕްޝަނާއި އޮޅުން ބޮޅުންގަނޑެއްގެ ތެރޭގަ އެވެ. އަދި ހައްޖަށް ގެންދިއުމުގެ ހުއްދަ ހަތަރު ކުންފުންޏަށް ދިންއިރު، އިވެލުއޭޝަން ކޮމެޓީ އެއްވެސް އެކުލަވާލާފައި ނުވާ ކަމަށާއި މިކަމުގެ ތެރޭގައި ޝައްކު ކުރެވޭ ގިނަ ކަންތައްތަކެއް އެބަހުރި ކަމަށް އެބޭފުޅުން ވިދާޅުވި އެވެ.
އޭސީސީން ކުރި ތަހުގީގަށްފަހު އެ ކޮމިޝަނުން ކުރިން ބުނެފައިވަނީ ޕްރޮޕޯސަލްތައް އިިވެލުއޭޓް ކޮށް، ޕޮއިންޓް ދީފައިވަނީ ޕްރީބިޑް މީޓިންގައި އިއުލާން ކޮށްފައިވާ މިންގަނޑާ ތަފާތުކޮށް ކަމަށެވެ. އެގޮތަށް ހެދުމުން ބައެއް ކުންފުނިތަކަށް ބައެއް މައުލޫމާތު ހުށަނޭޅިގެން މަދުން ޕޮއިންޓް ލިބިފައިވާ ކަމަށް އޭސީސީން ބުނެފައިވެ އެވެ.
ހައްޖަށް ގެންދިއުމުގެ ހުއްދައަށް އެދި 16 ކުންފުންޏަކުން މި އަހަރު ހުށަހެޅި އެވެ. އޭސީސީން އެންގީ އެކަމަށް އެދި ކުރިމަތިލި 16 ކުންފުނީގެ ޕްރޮޕޯސަލްތައް އަލުން އިވެލުއޭޓް ކުރުމަށް ފަހު ޕޮއިންޓް ދިނުމަށާއި އަދި ޕްރޮޕޯސަލް އިވެލުއޭޓް ކުރަން އާ ކޮމެޓީއެއް އެކުލަވާލުމުގެ އިތުރުން އެ ކޮމެޓީގައި އިސްލާމިކް މިނިސްޓްރީގެ މުވައްްޒަފުން ނުހިމެނުމަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަޙްމަދު
10 June 2017
ތިޔައީ މަތިން އަންގައިގެން ކުރިކަމެއް.ދެން އޭސީސީ އިން ބާރަށް ވާހަކަ ދައްކަންޏާ ޤާނޫނަށް ބަދަލު ގެނަސް ހުރިހާމެންބަރުން ގެއަށް ފޮނުވާލާނެ.
އަޙްމަދު
10 June 2017
އޭސީސީގެ އަމުރާ ޚިލާފުވުމަކީ ޒިޔާދުކޮށްގެން ހުރި ހުވަޔާ ޚިލާފުވުން. އެހެންކަމުން ޒިޔާދު ވަގުތުން އިސްތިޢްފާ ދެއްވުމަށް ގޮވާލަން.
މެންޓަލިސްޓް
10 June 2017
ތިޔަވަރަކަުން ހައްޖުކޯޓާއަކާޢި ހަނގުރާމަ ތިޔަކުރަނީ އެއީ އަނެއްކާ ބޮޑު ފައިދާގަނޑެއް ވާކަމަކީބާ ؟؟ އެހެންނޫނީ ތިޔަކަމުގައި ތަޅާފޮޅާކަށް ނުޖެހޭނެތާ ،،،، ކޯޓާދިންބަޔަކަށް ދީފާނެނުން ،،، ކޮންމެގުރޫޕަކުން ދިޔައަށް މައްކާއަށް ގޮސް ހައްޖުގެ އަޅުކަން ބަރާބަރަށް އަދާކުރެވެންޏާ އެނިމުނީއެއްނޫންތޯ ؟؟ މުހިންމީ ހައްޖަޢްދާންބޭނުންވާ މީހުންނަށް ލުއިފަސޭހަގޮތަކަށް އެކަން ކޮއްދިނުން ،،، އޭރުން އޭގެ ސަވާބާޢި ދަރުމަލިބޭނީވެސް ،،،، ވަރަށްވެދުން
ހަބޭސް222
09 June 2017
ކިތަންމެ މާތް އަޅުކަމަކަށް ވިޔަސް މިމީހުންނަށް ކަރަޕްޝަނާ ނުލާ ނޫނީ އެއްކަމެއްވެސް ނިންމޭކަމަކަށް ނުވަނީތާ!!!!!!!!!
ކަމޮރުއްޒަމާން މިއާ
09 June 2017
ހަމަ އެއް ކަމެއްވެސް މިނޫން ގޮތަކަށް މިޤައުމަކު ނުދޭ . ސަކަރާތް ޤައުމު ހުންނަނީ.
ހީހީ ހަލާކު
09 June 2017
ކޮމެންޓްތަކަށް ރިއާޔަތްކޮށް ބަލާ ވިސްނާލިއިރު މިކަމުގަ އިސްލާމިކް މިނިސްޓްރީ ޓޯޓަލީ ފެއިލް ވެފައިވާކަން ރައްޔިތުން ބުނަމުން މިދަނީ. މީގެކުރިން ހައްޖުގެ ކަންކަން އޮތީ އެންމެންވެސް ބަލައިގަންނަ ރައްޔިތުންނަށް ފަސޭހަ އިތުބާރުކުރެވޭ ގޮތަކަށް. ކަން މިހެންއޮއްވަ ފައިސާޔާހެދި ބޫތުކައިގެންފައިވާ ބަޔަކު ފައިސާގެ ދަހިވެތިކަމުގަ މިކަމުގެ ތެރެއަށް ވަދެ ރައްޔިތުންނަށް ލިބެމުން އައި ފަސޭހައަށް ހުރަސްއަޅާ ރައްޔިތުންނަށް ދަތިކޮށް ރައްޔިތުން ފެލަން މަސައްކަތްކުރަން ފެށުމުން އިސްލާމިކް މިނިސްޓްރީ އޮތީ މިބުނި މީހުންނާ އެއްކޮޅަށް ބައިއަތު ހިފާ ސާބަސްދީ ތަރުހީބުދޭން. މިއިރު މިކަމަކީ މިއީ ދީނުގައި ކަނޑައަޅުއްވާފައިވާ ފަރުޟެއް ކަމާއި އިސްލާމިކް މިނިސްޓްރީއަކީ މިކަމުގައި ރައްޔިތުންނަށް ކަންކަން ފަސޭހައިން ހަމަޖައްސައިދިނުމުގެ އޮތޯރިޓީ ލިބިފައިވާ ހަމައެކަނި ފަރާތްކަމާއި ހައްޖަށްދާން ބޭނުންވާ ފަރާތްތަކަށް ކަންކަން ފަސޭހަކޮށްދިނުމަކީ ތިމާމެން ކޮށްދޭންޖެހޭ ކަމެއްކަން ހަނދާން ނައްތާލާ ފަސާދައަށް މަސައްކަތްކުރާ ފަރާތްތަކާ ގުޅިގެން މިނިސްޓްރީވެސް މިކަމުގެ ތެރޭގައި ޝަމިލްވަމުން މިދަނީ. މިކަމުގެ ނޭދެވޭ ނަތީޖާ ނުފެނިއެއް ނުދާނެ.
ސާލު
09 June 2017
300000 ވަރު ކޮނޮމެވެސް ފަނޑަކަށް ދޭން ޖެހޭ ކަމަށް ގުުރޫޕުގެ ވެރިޔަކު ބުނި. ޢެކަމަށް ހުންނަ ކޯޑިނޭޓަރަކު ހުރެޔޯ.
އަލީ
09 June 2017
މިއީ އިސްލާމިކް މިނިސްޓަރީގެ ހާލަތު. ދެން އެހެންތަންތަނަށް ވާނީ ކިހިނެއްތޯ؟
234
09 June 2017
ގިނަބޭފުޅުންނަށް ހީވެފާއި އޮންނީ އިސްލާމިކް މިނިސްޓްރީވީމާ އެތާއުޅޭ މުވައްޒަފުން އެހެން ތަން ތަނަށް ވުރެން އަޙްލާގް ރަނގަޅު ވާނެކަމަށް. ހަގީގަތުގައި މިވެރިން އަދިމާ އަޙްލާގް ދަށް. ބޭރުފުށުން މާތްކަމަށް ދައްކާލަނީ..ދިވެހިންގެ މިވިސްނުނުން ބަދަލް ވިދުހުކުން މިބޭފުޅުންވެސް ބަދަލްވާނީ...
މަކަރު ސަރުކާރު
09 June 2017
މަކަރު ހެދުމާ އޮޅުވާލުމުގެ ތެރެއިން ނޫންގޮތަކަށް ހަމަ އެއްކަމެއްވެސް ނުކުރެވެނީތޯ!؟ މީކިހާ ދެރަކަމެއް. ޙައްޖު ގުރޫޕް ތަކުން ބުކިން މިހެދެނީ އިތުރަށް ލާރި ދައްކާގެން. މިކަން މިހެން އޮތްއިރު 25000 ރުފިޔާ ދައްކާފަހުން މިނިސްޓްރީއިން ގުރޫޕް ކެންސަލް ކުރީމާ ހައްޖަށް ދާން ބޭނުން މީހާއަށް މިލިބެނީ ކިހާ ބޮޑު ދެރަޔެއް. ބަޔަކުމީހުނަށް "ފުއްޓަކި ޖެހީމާ" މިލިޔަނުން ލާރި ލިބުނަސް އާއްމު ރައްޔިތުމީހާ ހައްޖަށްދާން ލާރި ކޮޅު އެއްކުރަނީ އެތަކެއް އަހަރެއްގެ މަސައްކަތުން.
ނަސީމް
09 June 2017
ލަދު ކޮބާތޯ ސަރުކާރު
332
09 June 2017
ސަރުކާރުގެ ވަކި ބަޔަކު ކަމެއް ކުރުމުން އެކަމުގެ ޒިންމާ ނަގަން ޖެހޭނީ އެކަމެއް ކުރި ބަޔަކު. ސަރުކާރަށް ފިޔަވަޅެއް ނޭޅެންޏާ ފިޔަވަޅުނޭޅު ބަޔައްގެ މައްސަލަ އެއީ. ހިތާމަޔާއެކު ދަންނަވަންޖެހެނީ މީ އކަމަކު މިއަދުގެ ހާލަކީ.