ހުޅުމާލޭގައި އަލަށް ހުޅުވި ޕެޓްރޯލް ޝެޑް - ފޮޓޯ: މިހާރު
16 އޯގަސްޓް 2017 - 19:27
6 comments
އެސްޓީއޯގެ ފިއުލް ސަޕްލައިސް މޯލްޑިވްސް (އެފްއެސްއެމް) ގެ ޕެޓްރޯލާއި ޑީސަލް ޝެޑެއް ހުޅުމާލޭގައި ހުޅުވައި، ހިދުމަތް ދޭން މިއަދު ފަށައިފި އެވެ.
އެސްޓީއޯ އިން ބުނީ އެފްއެސްއެމްގެ ޝެޑެއް ނެތުމުން ހުޅުމާލޭން ޕެޓްރޯލް ލިބުނީ މާލެއިން ލިބޭ އަގަށް ވުރެ، ބޮޑުކޮށް ކަމަށެވެ. ނަމަވެސް އަލަށް ހުޅުވި ޕެޓްރޯލާއި ޑީސަލް ޝެޑުން މާލެއާ އެއް އަގެއްގައި ހިދުމަތް ފޯރުކޮށްދެވޭނެ ކަމަށް އެ ކުންފުނިން ބުންޏެވެ.
އެފްއެސްއެމް ޕެޓްރޯލް ޝެޑް ހުޅުއްވައި ދެއްވުމުގެ ގޮތުން ސައީދު ސައިކަލަކަށް ޕެޓްރޯލް އަޅުއްވަނީ
ހުޅުމާލެ ފެރީ ޓާމިނަލް ކައިރިން ޗާނދަނީމާ ހިނގުމުގައި "އީޒީ ފިލް 3" ހުޅުއްވައި ދެއްވީ އިކޮނޮމިކް މިނިސްޓަރު މުހައްމަދު ސައީދެވެ. ރަސްމިއްޔާތުގައި އެސްޓީއޯ އާއި އެފްއެސްއެމް އާއި އެޗްޑީސީ އަދި އެމްއޭސީއެލްގެ އިސް ވެރިން ބައިވެރިވެވަޑައިގެންނެވި އެވެ.
އެސްޓީއޯގެ މެނޭޖިން ޑިރެކްޓަރު އަހުމަދު ޝަހީރު ވިދާޅުވީ ހުޅުމާލޭގައި ދިރިއުޅޭ މީހުން މާލެއާ އެއް އަގެއްގައި ޕެޓްރޯލާއި ޑީސަލް ގަންނަން ބޭނުންވާ ކަމަށެވެ. އަލަށް ހުޅުވި ޝެޑްގެ ސަބަބުން ހުޅުމާލޭގައި ވިއްކާ ޕެޓްރޯލުން 20 ޕަސަންޓު ހެޔޮވާނެ ކަމަށް ވެސް އޭނާ ވިދާޅުވި އެވެ.
"އެސްޓީއޯ އިން އަބަދުވެސް މަސައްކަތް ކުރަނީ ރައްޔިތުންނަށް ލުއިފަސޭހަކޮށް ދިނުމަށް. އެސްޓީއޯއާ ސަބްސިޑަރީ ކުންފުނިތަކުން ވޭތުވެދިޔަ އަހަރުތަކުގައި ވަނީ އާންމު ރައްޔިތުންނަށް ލުއިފަސޭހަ ހިދުމަތްތަކެއް ދިނުމަށް ވަރަށް ގިނަ މަސައްކަތްތަކެއްކޮށް، ލުއި ފަސޭހަތަކެއް ލިބިފައި،" ޝަހީރު ވިދާޅުވި އެވެ.
ހުޅުމާލޭގައި އެފްއެސްއެމްގެ ޕެޓްރޯލް ޝެޑް ހުޅުވުމަށް ބޭއްވި ރަސްމިއްޔާތުގައި މިނިސްޓަރު ސައީދު (ވ-2) އާ އެކު ސަރުކާރު ކުންފުނިތަކުގެ އިސް ވެރިން ބައިވެރިވެވަޑައިގަންނަވަނީ
ސައީދު ވިދާޅުވީ ރައީސް އަބްދުﷲ ޔާމީންގެ ވެރިކަމުގައި ރައްޔިތުންނާ ހަމައަށް ގެނެސްދޭން ނިންމި ކަންކަން ތަންފީޒުވެގެން ދަނީ ވަރަށް ބާރަށް ކަމަށެވެ. އެގޮތުން މާލެ ސަރަހައްދަށް އަންނަ ތަރައްގީ އާއި އެސްޓީއޯއަށް އައި ކުރިއެރުންތައް އޭނާ ފާހަގަކުރެއްވި އެވެ.
ސައީދު ވިދާޅުވި ގޮތުގައި ސިޔާސީ ކޮންމެ ފިކުރެއްގައި ތިއްބަސް، ފެންނަނީ ނުކުރެވޭނެ ކަމަށް ގަބޫލުކުރި ކިތަންމެ ކަމެއް ރައްޔިތުންގެ އިތުބާރާ އެކު ތަންފީޒު ކުރަމުންދާ ތަނެވެ.
ހުޅުމާލެ ހިމެނޭ ގޮތަށް އެފްއެސްއެމްގެ މާލޭގެ ޝެޑްތަކުން ޕެޓްރޯލް ލިޓަރެއްގެ އަގު އުޅެނީ 8.65ރ. އަށެވެ. ޑީސަލް ލިޓަރެއްގެ އަގު އުޅެނީ ލިޓަރެއް 8.44ރ. އަށެވެ.
ހުޅުމާލޭގައި މިއަދާ ހަމައަށް ހުރީ ވިލާ ކުންފުނިން ހިންގަމުން އަންނަ ޕެޓްރޯލް ޝެޑް އެކަންޏެވެ. އެތަނުން ޕެޓްރޯލް ވިއްކަނީ މާލޭގައި ލިބޭ އަގަށް ވުރެ ބޮޑުކޮށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޔަހޫ
17 August 2017
ވިލާއިން ދެން ތެޔޮ އަޅާނީ 3 ރުފިޔާ އަގުހެޔޮކޮއް ވިއްކަޏާ
ހަންޑި
17 August 2017
ގާސިމް ޕެޓްރޯލް ވިއްކީ ހުޅުމާލޭގަ ހަންޑި އެންމެ ގިނަ ހިސާބުން، އެކަމަކާ ހެދި ގިނަ މީހުން ސައިކަލު މާލެ ގެންގޮސް ޕެޓްރޯލް އެޅީ
ސޮކްތެރެޕީ
16 August 2017
ޤާސިމް ތެޔޮވިއްކީ ވަރައް އަގުބޮޑުކޮއް.
ވާލުސޮރު
16 August 2017
ގާސިމް ގެ ރިހޭފައިގެ މައްޗަށް އަނެއްކާ އަނެއް ފޮއި ވެއްޓުނީ. ތެޔޮ ވިއްކަން ގާސިމަށް ހުޅުމާލޭން ދީފައޮތީ ފުރޭތަވެސް ނާރާ ފަޅު ހިސާބެއް. އެހެންކަމުން ދެން ތެޔޮ ގަންނަން އެކަކުވެސް އެތަނަށް ދާނެހެނެއް ހިޔެއްނުވޭ. އެއީ ތިޔަ ތަން ހުޅުވީ ހުޅުމާލޭގެ އެންމެ ކާރޫބާރޫ ބޮޑު މީހުންނަށް ފަސޭހަ ހިސާބެއްގަ ކަމަށްވީތީ.
އަހުމަދު
16 August 2017
ވިލާއިން ހުރިހާދުވަހު ޕެޓްރޯލް ވިއްކީ މާލެއަށްވުރެ 2.50ރ. އަގުބޮޑުކޮށް.
ޑާޑާޑާޑާ
16 August 2017
އެފްއެސްއެމްގެ ޕެޓްރޯލާއި ޑީސަލް ޝެޑް ހުޅުމާލޭގައި ހުޅުވައިފިއޭ ކުދިންނޭ އެއީ ކިހާ ބޮޑު ފަސޭހަ އެއް ނޫންތޭ އެވެގެން ދަނީ. އެމެން އެމްޑީޕީގެ ވެރިކަމުގައި މިޒާތުގެ ކަމެއް ކުރިއަސް އެމެން ކުރާނީ ފަޑުއްކަ އިންޑިއާގެ ކުންފުންނަކަށް ދީގެންނޭ އެއާއި ޚިލާފަށް މަމެން މިކުރަނީ އެކަން ހަމަ ސީދާ މަމެންގެ ސަރުކާރުގެ ކުންފުނި ތައް މެދުވެރިކޮށޭ އަދި ސަރުކާރުގެ ކުންފުނި ތައް އެދަނީ ފައިދާ މަތި މައްޗަށް ގުނަމުންނޭ.