(ވ-ކ) ފްރާނާސްގެ ރައީސް ފްރާންސުއާ އޮލެންޑާ، ޖަރުމަނުގެ ޗާންސެލާ އެންޖެލާ މާކެލް އަދި އިޓަލީގެ ބޮޑު ވަޒީރު މަޓިއޯ ރެންޒީ ބާލިންގައި ނޫސްވެރިންނާ ވާހަކަ ދައްކަވަނީ. --ފޮޓޯ:އޭއެފްޕީ
28 ޖޫން 2016 - 10:21
3 comments
ލަންޑަން (ޖޫން 28) - އިނގިރޭސި ރައްޔިތުންގެ ނިންމުމާ އެއްގޮތަށް ޔޫރަޕިއަން ޔޫނިއަން އިން އެ ގައުމު ވަކިވުމުގެ ނުރަސްމީ ވާހަކަތައް ފެށުމަށް އީޔޫގެ ލީޑަރުން ދެކޮޅު ހަދައިފި އެވެ.
ޖަރުމަނާއި ފްރާންސް އަދި އިޓަލީން ބުނެފައި ވަނީ ލިޒްބަން ޓްރީޓީގެ 50 ވަނަ މާއްދާގެ ދަށުން ވަކިވުމުގެ މަޝްވަރާތައް ފަށަން ޖެހޭނީ އިނގިރޭސިވިލާތުން ކަމަށެވެ. ޖަރުމަނުގެ ޗާންސެލާ އެންޖެލާ މާކެލް އާއި ފްރާންސްގެ ރައީސް ފްރާންސުއާ އޮލެންޑާ އަދި އިޓަލީގެ ބޮޑު ވަޒީރު މަޓިއޯ ރެންޒީ ވަނީ ބާލިންގައި ބައްދަލު ކުރައްވައިފަ އެވެ. އީޔޫގެ ލީޑަރުން ވަނީ ޔޫރަޕުގެ ޖަމާއަތް ވަރުގަދަ ކުރުމަށް އާ ހިތްވަރެއް ލުމަށް ގޮވާލައިފަ އެވެ. މި ތިން ގައުމު އެއްކޮށްލުމުން އެއީ ޔޫރަޕުގެ އެންމެ ބޮޑު އިގްތިސާދެވެ.
އިނގިރޭސިން އީޔޫ އިން ވަކިވާން ނިންމުމުން ތިން ލީޑަރުން ވެސް ވަނީ ހިތާމަ ކުރައްވާ ކަމަށް ވިދާޅުވެފަ އެވެ.
(ވ-ކ) ފްރާނާސްގެ ރައީސް ފްރާންސުއާ އޮލެންޑާ، ޖަރުމަނުގެ ޗާންސެލާ އެންޖެލާ މާކެލް އަދި އިޓަލީގެ ބޮޑު ވަޒީރު މަޓިއޯ ރެންޒީ ބާލިންގައި ނޫސްވެރިންނާ ވާހަކަ ދައްކަވަނީ. --ފޮޓޯ:އޭއެފްޕީ
ޖަރުމަނުގައި ނޫސްވެރިންނާ ވާހަކަ ދައްކަވަމުން މާކެލް ވިދާޅުވީ ޔޫރަޕިއަން ޓްރީޓީގެ 50 ވަނަ މާއްދާ ވަރަށް ސާފު ކަމަށާއި މެންބަރު ގައުމެއް ޔޫރަޕިއަން ޔޫނިއަން އިން ވަކިވާން ބޭނުން ނަމަ ޔޫރަޕިއަން ކައުންސިލަށް އެކަން އަންގަންވާނެ ކަމަށެވެ. އަދި އެކަން ކުރުމުން ނޫނީ އިތުރު ފިޔަވަޅެއް ނޭޅޭނެ ކަމަށް ވެސް މާކެލް ވިދާޅުވި އެވެ.
"ޔޫރަޕިއަން ޔޫނިއަން އިން ޔޫކޭ ވަކިވާން ބޭނުންވާކަން ޔޫރަޕިއަން ކައުންސިލަށް އެންގުމުން ނޫނީ ރަސްމީ އަދި ނުރަސްމީ މަޝްވަރާތައް ވެސް ކުރިއަކަށް ނުދާނެ،" މާކެލް ވިދާޅުވި އެވެ.
ރައީސް އޮލެންޑާ އާއި ބޮޑު ވަޒީރު ރެންޒީ ވަނީ އިނގިރޭސިން ވަކިވުމުގެ މަސައްކަތް ހަލުވިކޮށް ބާކީ ތިބި 27 ގައުމަށް ކުރިމަތިވާނެ ގޮތް ޖެހުންތަކުން ސަލާމަތްވުމަށް މަސައްކަތް ކުރުމަށް އެދިވަޑައިގެންފަ އެވެ.
ބޮޑު ވަޒީރު ޑޭވިޑް ކެމަރަން ޕާލަމެންޓުގައި ވާހަކަ ދައްކަވަމުން ވަނީ ނުރަސްމީ ވާހަކަތަކަށް އެމަނިކުފާން ތައްޔާރު ނޫން ކަމަށް ވިދާޅުވެފަ އެވެ. އޭގެ ކުރިން އީޔޫއާ އެކު ބާއްވާނެ ގުޅުމަކާ ބެހޭ ގޮތުން ގޮތެއް ނިންމަން ޖެހޭ ކަމަށް ކެމަރަން ވިދާޅުވި އެވެ. އަދި މާއްދާ 50 އާ ގުޅޭ ގޮތުން ކުރިއަށް ދިއުމަކީ އެ މަނިކުފާނަށް ފަހު ބޮޑު ވަޒީރުކަމަށް ވަޑައިގަންނަވާ ބޭފުޅަކު ކުރައްވަން ޖެހޭނެ ކަމެއް ކަމަށް ވެސް ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މުހައްމަދު
28 June 2016
އީޔޫއިން ޔޫކޭ ވަކިވިނަމަވެސް އީޔޫއަށް ނުރައްކަލެއް އަދި ގެއްލުމެއް ނެތް. ޔޫކޭ އީޔޫއިން ވަކިވުމަށް ފަހުވެސް ޔޫރަޕާއި ގުޅުން އޮންނާނެ. ނަމަވެސް އީޔޫގެ އިގުތިސާދީ ކަންކަމާއި ޔޫކޭއާއި ތަފާތުވާނެ. ޖަރަމަން ފުރާންސް އަދި އިޓަލީ ދެންވާނީ ޔޫރަޕުގެ ގަދަ ބާރަށް. ގިނަ މީހުނަށް ހީވަނީ އީޔޫ އިން ވަކިވީއޭ ބުނުމުން ޔޫއެން އިން ވަކިވީ ކަމަށް. ޔޫއެން އަކުން ވަތްކެއް ނުވޭ. އިންސާނީ ހައްގުތައް އަދިވެސް ޔޫކޭގައި އޮންނާނެ.
ވިޔަވަތި
28 June 2016
ޔޫރަޕުގެ އިއްތިހާދުން މުސްލިމުން ނިކަމެތިކުރަންއުޅެންހަދަިއގެން އަމިއްލައަށް ނިކަމެތިވާތަން މިފެންނަނީ. ލައްކަ ދުވަސްވެސްޖެ މުސްލިމުންނަށް ޖެއްސުންކުރާތާ. ވިސްނަބަލަ
ތުއްތޮންބެ
28 June 2016
މުސްލިމުން ނިކަމެތިކުރަން ޔޫރަޕް ގެ އިއްތިހާދުން ކުރާހަވެސް ކަމަކީ އައި އެސް ކިޔާ މުސްލިމުންގެ ޓެރަރިސްޓް ބައިގަނޑަކުން ސީރިއާ އާ އިރާގު ގަ ކުރާ ހަނގުރާމައިގެ ސަބަބުން ބިކަވެ ނިކަމެތިވާ މުސްލިމް ރެފިއުޖީންނަށް ބޯހިޔާވަހިކަމާ ކާބޯތަކެތީގެ އެހީ ފޯރުކޮށްދިނުން. ހަމައެކަނި ޖަރުމަނަށް ބަލައިލިއަސް އެތައްހާސް ރެފިޔުޖީންނަކަށް އެގައުމުން މިއަހަރު އެކަނިވެސް ބޯހިޔާވަހިކަން ދިންކަން އެނގޭބާ؟ ޔޫރަޕްގެ އިއްތިހާދު ބަލިކަށިވުމުން އޭގެ އަސަރު އެންމެބޮޑަށް ކުރާނީ ބިކަވެ ނިކަމެތިވެފަވާ މުސްލިމުންނަށް. ރާއްޖެ އަންނަ ފަތުރުވެރިންގެތެރެއިންވެސް އެންމެ ބޮޑަށް ހޭދަކުރަނީ ޔޫރަޕްގެ ފަތުރުވެރިން. ޗައިނާ ފަތުރުވެރިން އަންނަނީ ބޯނެ ފެންފުޅިޔާ ކާނެ ލުއިކާނާވެސް ހިފައިގެން. މިކަމާ ވިސްނަބަލަ.