އިނގިރޭސިވިލާތް އީޔޫ އިން ވަކިވުމުން ލަންކާގެ އިގްތިސާދަށް ގެއްލުން

ސްރީ ލަންކާގެ ޚާރިޖީ ވަޒީރުގެ ނައިބް ހަރުޝާ ޑި ސިލްވާ

ހަސަން އާމިރު، މިހާރު

01 ޖުލައި 2016 - 15:35

ކޮލަމްބޯ (ޖުލައި 1) - ޔޫރަޕިއަން ޔޫނިއަން އިން އިނގިރޭސިވިލާތް ވަކިވުމުން ސްރީ ލަންކާގެ ވިޔަފާރި އަށް އަސަރު ކުރާނެ ކަމަށް އެ ގައުމުން ބުނެފި އެވެ.

ލަންކާ އިން އެއް ބިލިއަން ޑޮލަރުގެ މުދާ އިނގިރޭސި ވިލާތަށް އަހަރަކު އެކްްސްޕޯޓް ކުރެ އެވެ. އީޔޫ އިން އެ ގައުމު ވަކިވުމުން އިނގިރޭސި ވިލާތުގެ މާކެޓް މިހާރު ނޭނގުމެއްގެ ތެރޭގައިވާ ކަމަށް ޚާރިޖީ ވަޒީރުގެ ނައިބް ހަރުޝާ ޑި ސިލްވާ ވިދާޅުވި އެވެ. ލަންކާ އިން ދަނީ އެ ގައުމުގެ އެކްސްޕޯޓަށް ލުއި ޓެރިފެއް ހޯދައިދިނުމަށް އެދި އީޔޫއާ އެކު ވެސް މަޝްވަރާ ކުރަމުންނެވެ. އިނގިރޭސި ވިލާތަކީ އީޔޫގެ ތެރޭން ލަންކާގެ އެންމެ ބޮޑު އެކްސްޕޯޓް މާކެޓް އޮތް ގައުމެވެ. އަދި އެމެރިކާ ފިޔަވައި ލަންކާގެ ދެ ވަނަ އަށް އެންމެ ބޮޑު އެކްސްޕޯޓް މާކެޓަކީ ވެސް އިނގިރޭސިވިލާތެވެ.

ވޯޓު ގުނުމުގެ މަސައްކަތް ކުރަނީ: ޚިޔާލު ހޯދުމުގެ ވޯޓުގައި ގިނަ މީހުން ބޭނުންވީ އީޔޫ އިން އިނގިރޭސިން ވަކިވުމަށް. --ފޮޓޯ:ބީބީސީ

ހަރުޝާ ވިދާޅުވީ އިނގިރޭސި ވިލާތް ވަކިވުމުން ޕައުންޑުގެ އަގު ދަށަށް ދިއުމަކީ ވެސް ލަންކާގެ އިގްތިސާދަށް ކުރާނެ ނޭދެވޭ އަސަރެއް ކަމަށެވެ.

ހަރުޝާ އާއި ލަންކާ ސަރުކާރުގެ އިސް ވަފުދެއް މިދިޔަ ހަފުތާގައި ލަންޑަނަށް ވަޑައިގެން ވޯޓުގައި ބައިވެރިވެވޭ ލަންކާ ނަސްލުމުގެ މީހުން އިނގިރޭސި ވިލާތް އީޔޫ އިން ވަކި ނުވުމަށް ވޯޓު ދިނުމަށް ބާރު އެޅުމަށް ވަނީ ކެމްޕޭން ކޮށްފަ އެވެ.

ހަރުޝާ ވިދާޅުވީ އިނގިރޭސި ވިލާތުގެ މާކެޓުން ލިބުނު އުނިކަން ފޫބެއްދުމަށް އިންޑިއާ އާއި ޗައިނާ އެކު މިނިވަން ވިޔަފާރީގެ އެއްބަސްވުންތަކެއް ވަރަށް އަވަހަށް ގާއިމް ކުރާނެ ކަމަށެވެ. އަދި ސިންގަޕޫރާއި ޖަޕާން އަދި ދެކުނު ކޮރެއާ އެކު ވެސް ވިޔަފާރީގެ އެއްބަސްވުންތަކެއް ގާއިމް ކުރުމަށް މަސައްކަތް ކުރަމުންދާ ކަމަށް ވިދާޅުވި އެވެ.

ސްރީ ލަންކާ އީޔޫ ބްރެކްސިޓް

2 ކޮމެންޓް, 11 ރިއެކްޝަންސް

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ކޮމެންޓްތައް

އެންމެ ފަސް މަގުބޫލް

ރަނގަޅު

01 July 2016

އިނގިރޭސި ވިލާތް އީޔޫ އިން ވަކިވުމުން ލަންކާގެ އިގްތިސާދަށް އޭގެ ނޭދެވޭ އަސަރުކުރުން އެއީ ޕީޕީއެމް މެމްބަރުން އުފާ ކުރާ ކަމެކެވެ. ސަބަބަކީ އެއީ އިދިކޮޅު ކޯލިޝަންގެ އޮފީހެއް ދިވެހި ސަރުކާރުގެ ހުއްދަ އެއް ނެތި ދިވެހި ސަރުކާރު ގާނޫނާއި ޚިލާފަށް ވައްޓާލަން އެންމެ ބޮޑަށް މަސައްކަތް ކުރަނީ އެއީ ލަންކާ ސަރުކާރުގައި ތިބި ސިޔާސީ ފަރާތް ތަކާއި އިދިކޮޅު ފަރާތް ތަކާއި ގުޅިގެން ކަމަށް ވާތީއެވެ. ލަންކާގެ އިގްތިސާދު ދަށަށް ދިޔައިއްޔާ ރަނގަޅީ.