ރޮހިންޖާ ރެފިއުޖީން އަނބުރާ ދެވޭނީ މިއަންމާ ރައްޔިތުން ބޭނުން ނަމަ

ބަންގްލަދޭޝްގެ ރެފިއުޖީ ކޭމްޕެއްގައި ރޮހިންޖާ ރެފިއުޖީއަކު. --ފޮޓޯ:އޭއެފްޕީ

ހަސަން އާމިރު، މިހާރު

16 ނޮވެމްބަރ 2017 - 16:00

ޔަންގޮން (ނޮވެމްބަރު 16) - ރަކީން ސްޓޭޓް ދޫކޮށް ބަންގްލަދޭޝް އަށް ދިޔަ ރޮހިންޖާ ރެފިއުޖީން އަނބުރާ އާދެވޭނީ މިއަންމާގެ "ހަގީގީ ރައްޔިތުން" ބޭނުން ނަމަ ކަމަށް އެ ގައުމުގެ ސިފައިން ބުނެފި އެވެ.

މިއަންމާ ސިފައިންގެ އަނިޔާވެރިކަން ބޮޑުވުމުން ރަކީން ދޫކޮށް ބަންގްލަދޭޝް އަށް ދިޔަ ރެފިއުޖީންގެ އަދަދު ވަނީ ހަ ލައްކަ އަށް އަރައިފަ އެވެ. އދ. އިން ބުނެފައި ވަނީ ރޮހިންޖާ މީހުން ރަކީން ސްޓޭޓް ދޫކޮށް ދާން ޖެހުނީ މުސްލިމުންގެ އަވަށްތަކުގައި އަލިފާން ޖަހާ، އަންހެނުން ރޭޕްކޮށް އެތައް އަނިޔާއެއް ދިނުމުން ކަމަށެވެ. މިއަންމާ ސިފައިންގެ އަމަލުތައް އދ. އިން ސިފަކޮށްފައި ވަނީ ނަސްލެއް ނެތިކޮށްލުމުގެ ދަރަޖައިގަ އެވެ.

މިއަންމާ ސިފައިންގެ ވެރިޔާ މިން އައުން ލައިން ވަނީ ރަކީންގައި އެއްވެސް ޖަރީމާއެއް ސިފައިން ނުހިންގާ ކަމަށް ބުނެފަ އެވެ. ރޮހިންޖާ މުސްލިމުން ރަކީންގައި ދިރިއުޅޭތާ އެތައް އަހަރެއްވީ ނަމަވެސް މިއަންމާ އިން ގަބޫލް ކުރަނީ އެއީ ބަންގްލަދޭޝް އިން އެތެރެވެފައިވާ ބައެއް ކަމަށެވެ. ރޮހިންޖާ މުސްލިމުންނަށް މިއަންމާ އިން މުޚާތަބް ކުރަނީ ވެސް ބެންގާލީންގެ ނަމުންނެވެ.

"ބަންގްލަދޭޝް އިން ބޭނުންވާހާ ބަޔަކު މިއަންމާ އަށް އެތެރެވުމުގެ ހުއްދައެއް ނުދެވޭނެ،" ސިފައިންގެ ބަޔާނުގައި ބުނެފައިވެ އެވެ.

ރޮހިންޖާ ރެފިއުޖީން އަނބުރާ ރަކީން އަށް ގެންދިއުމާ ގުޅޭ ގޮތުން ބަންގްލަދޭޝް އާއި މިއަންމާ ވަނީ އުސޫލެއްގެ ގޮތުން އެއްބަސްވުމަކަށް އައިސްފަ އެވެ. ނަމަވެސް އެކަން ކުރާނެ ގޮތަކާ މެދު ވަނީ ދެ ގައުމު ޚިޔާލު ތަފާތުވެފަ އެވެ.