އެމެރިކާގެ ރައީސް ޑޮނަލްޑް ޓްރަމްޕު (ކ) އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް.
26 ޑިސެމްބަރ 2017 - 11:16
9 comments
އެމެރިކާ އިން އދ. މަޖިލީހުގެ ބަޖެޓަށް ކޮންމެ އަހަރަކު ދޭ ފައިސާގެ ތެރެއިން 285 މިލިއަން ޑޮލަރު އުނިކުރުމަށް އެމެރިކާ އިން ނިންމައި އިއްޔެ އިއުލާން ކޮށްފި އެވެ.
އެކަން އިއުލާން ކުރައްވައި، އދ. މަޖިލީހުގައި ހުންނަވާ އެމެރިކާގެ ސަފީރު ނިކީ ހޭލީ ވިދާޅުވީ މިއީ ރަނގަޅު މިސްރާބަށް އެމެރިކާ އިން އެޅި ބޮޑު ފިޔަވަޅެއް ކަމަށެވެ.
އދ.ގެ އާންމު މަޖިލީހުން މިހާރު ވަނީ 2018-2019ގެ މާލީ އަހަރަށް 5.396 ބިލިއަން ޑޮލަރުގެ ބަޖެޓެއް ފާސްކޮށްފަ އެވެ. ނަމަވެސް އެއީ އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ބޭނުންފުޅުވި 5.4 ބިލިއަން ޑޮލަރަށް ވުރެ ކުޑަ ބަޖެޓެކެވެ.
އދ.ގެ އަހަރީ ބަޖެޓަށް މެމްބަރު ގައުމުތަކުގެ ތެރެއިން އެންމެ ބޮޑު ނިސްބަތަކުން ފައިސާ ދެނީ އެމެރިކާ އިންނެވެ. އދ.ގެ އަހަރީ ބަޖެޓްގައި އެމެރިކާގެ ހިއްސާއަކީ 22 ޕަސެންޓެވެ.
އެމެރިކާގެ ސަފީރު ވިދާޅުވި ގޮތުގައި އދ.ގެ ބަޖެޓުން ހޭދަކުރަނީ އެންމެ ރަނގަޅަށް ނޫން ކަމާއި ބޭކާރު ޚަރަދު ކުރާކަމީ އެންމެންނަށް އެނގޭ ކަމެކެވެ. އަދި ބަޖެޓާ ބެހޭ ގޮތުން ކުރެވުނު މަޝްވަރާތަކުގެ ތެރެއިން އެފަދަ ކިތަންމެ ކަމެއް ފާހަގަ ކުރެވި އޭގެ ތެރެއިން ބައެއް ކަންކަން ރަނގަޅު ކުރެވިފައިވާ ކަމަށް ވެސް އޭނާ ވިދާޅުވި އެވެ.
އޭނާ ވިދާޅުވީ އެމެރިކާ ރައްޔިތުންގެ އޯގާތެރިކަމުން ދޭ އެހީ އިން ނާޖާއިޒު ފައިދާ ނަގަން ނުވަތަ އެ ފައިސާ އަށް ވާނުވާ ނޭނގޭ ގޮތަށް ދޫކޮށްނުލައްވާނެ ކަމަށެވެ. އދ.ގެ ބަޖެޓަށް ދޭ ފައިސާ މަދު ކުރުމުގެ އިތުރުން، އދ. މަޖިލިސް މިހާރަށް ވުރެ ޒިންމާދާރު ކުރުވުމަށާއި ހިންގުން ހަރުދަނާ ކުރުމަށް އިތުރު ކަންތައް ވެސް ކުރުމަށް ހަމަޖެހިފައިވާ ކަމަށް އޭނާ ވިދާޅުވި އެވެ.
އދ. މަޖިލީހުގައި މައިގަނޑު ދެ ބަޖެޓެއް އޮވެ އެވެ. އދ. މަޖިލިސް ހިންގުމަށް ކަނޑައެޅިފައި އޮންނަ ބަޖެޓަކާއި ދުނިޔޭގެ އެކި ކަންކޮޅުތަކުގައި ސުލްހަ ބެލެހެއްޓުމުގެ މަސައްކަތަށް ހާއްސަ ކޮށްފައި އޮންނަ ބަޖެޓެކެވެ. މިއީ މުޅިން ވަކިން އޮންނަ ދެ ބަޖެޓެކެވެ.
އެމެރިކާ އިން މި ފިޔަވަޅު މި އެޅީ، އިޒްރޭލުގައި ހުންނަ އެމެރިކާ އެމްބަސީ ފަލަސްތީނުގެ ގުދުސަށް ބަދަލުކުރަން އެމެރިކާ އިން ނިންމި ނިންމުމާ ދެކޮޅަށް އދ.ގެ ސަލާމަތީ މަޖިލީހާއި އާންމު މަޖިލީހަށް ހުށަހެޅި ގަރާރަށް ތާއީދު ކުރި ގައުމުތަކަށް، އެމެރިކާ އިން ދޭ އެހީ ކަނޑާލާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕު ފާޑުވިދާޅުވެފައި ވަނިކޮށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޑޮނބެ
26 December 2017
އެއީ ދޯ މިވާގޮތަކީ. 20 ޕަސެންޓުގެ މާނަ އަކީ. ބަޖެޓު 5 ބަޔަށް ފޮތި ކުރީމައި ދޭން މިޖެހެނީ އެމެރިކާ އެކަނި 1 ބައި ދެންތިބި 220 ގައުމުން 4 ބައި. ބޮޑަށް ޚަރަދު ކުރާމީހާގެ ބާރު ގަދަވާނެ. ރުހުނަސް ނުރުހުނަސް ކަންކަން ވަމުން ދާނީ އެހެން
އަލީގ
26 December 2017
ތިގޮތް ހަމަ ބަރާބަރު، އެމެރިކާގެ ނުފޫޒު އދ ގަވެސް ގަދައީ އެމީހުން އދ އައް ދޭ ބޮޑު އެހީގެ ސަބަބުން އެ އެހީ ކުޑަވާވަރަކުން އެމެރިކާގެ ނުފޫޒު ކުޑަވެގެންދާނެ.
ރަދީފް
26 December 2017
މަހަށް މަހަށް ނުދެވިގެން އުޅޭ ސޮރަށް މިކަހަލަ ހަބަރެއް ނުފެނޭ.
ޔުނައިޓެޑް އައްޑޫ
26 December 2017
އާދެ! ތިޔައީ އަޅުގަނޑުމެން އިންތިޒާރުކުރަމުން އައި ކަމެއް. ދެން އެންމެ އަވަހަށް އެމެރިކާގެ ސެނެޓުން ފާސްކުރާނީ އަލިފުދާލުން އެމެރިކާ ވަކިވުމަށް ކަނޑއަޅާ ގަރާރުކަަމަށް އެބަފެނޭ. މި ބަދަލާއެކު ދުނިޔޭގެ ރޫލިން ސްޓޭޓަކަށް ވެގެންދާނީ އިޒްރޭލް ކަންވެސް ފާހަގަކުރަން.
އެމެރިކާ މޭން
26 December 2017
ސާބަހޭ އެމެރިކާ! މިހާރުވެސް ތިޔަ އދ ހިނގަނީވެސް އެމެރިކާގެ ސަބަބުން
1234
26 December 2017
ތިޔަ އުނިކުރި 285 މިލިއަން އިޒްރޭލަށް ދިނީމަ ދެން ދެން ރަނގަޅުވާނެ.
ފޫހި
26 December 2017
އެމެރިކާ އަތުގައި އޮތް ވީޓޯގެ ބާރު އަތުލުމަށް ގޮވާލަން
ރާއްޖެ
26 December 2017
ދުނިޔޭގެ ގައުމުތަށްް ތަޅާ ސުންނާފަތިކުރަނީ އެމެރިކާއިން، އެހެންވީމަ އެތަންތަން އާރާސްތު ކުރާކަށް އެހެން ގައުމުތަކުން ފައިސާ ދޭކަށް ނުޖެހޭނެ. އެއީ އެމެރިކާއިން ކުރަން ޖެހޭނެ ކަމެއް.
އދ މަންދޫބު
26 December 2017
އެހެންގައުމުތަކުން އދ އިން އެމެރިކާބޭރުކުރެވެން އޮތްގޮތަކަށް އެކަންކުރުން މާލަސްވެއްޖެ.