ރޭޕްއާ ދެކޮޅަށް އިންޑޮނޭޝިއާގައި ބޭއްވި އެއްވުމެއްގައި މުހިއްމު މެސެޖެއް ދައްކާލަނީ: ޖިންސީ އަނިޔާކުރީ، އަނިޔާ ލިބުނު މީހާގެ ކުށަކުންނޭ ބުނަން ދެއްކޭނެ އުޒުރެއް ނޯންނާނެ.
26 ޖުލައި 2018 - 08:51
64 comments
ތިމަންނާ އަށް އަނިޔާއެއް ލިބިއްޖެއޭ ބުނާ މީހަކު ވަގުތުން ކުށްވެރިއަކަށް ވާނީ ކިހިނެއް ހެއްޔެވެ؟ ރާއްޖޭގައި ރޭޕް އާއި ޖިންސީ ގޯނާ އާއި ފުރައްސާރައިގެ ވާހަކައެއް ފެންމަތިވާ ކޮންމެ ފަހަރަކު ވަނީ މިހެންނެވެ. އަނިޔާ ލިބުނު ކަމަށް ބުނާ އަންހެންމީހާ ނުވަތަ އަންހެންކުއްޖާއާ މެދު، އާއްމު ޚިޔާލުގެ "ކޯޓު"ގައި، ހަމަ ވަގުތުން ނިޔާ ކަނޑައަޅަ އެވެ. އޭނާ އެ ހަދަނީ ދޮގެވެ. ނުވަތަ އެ ވާނީ އޭނާ ކުރި ކަމެއް، ބުނި އެއްޗެއް، ލީ ހެދުމެއް، ނުވަތަ ދިޔަ ތަނެއްގެ މައްސަލައަކަށެވެ. ލިބުނު އަނިޔާގެ ޒިންމާ ނަގަން ޖެހޭނީ އޭނާ އެވެ. ތުހުމަތު ރައްދުވާ މީހާގެ ކުށެއް ނެތްކަން ހަމަ ވަގުތުން ކަށަވަރުވެ، ސާބިތުވެ އެވެ.
މިހާރު ފެންމަތިވެގެން އުޅޭ ރޭޕްގެ މައްސަލައާ އެކު ވެސް، އެއް ބަޔަކު އުޅެނީ ރޭޕްކުރި ކަމަށް ތުހުމަތުކުރެވޭ ދެ ފިރިހެނުން ދިފާއުކުރުމުގަ އެވެ. އެކަން ހިނގީ 16 އަހަރުގެ އަންހެންކުއްޖާ އާއި އެ ކުއްޖާގެ މައިންބަފައިންނާއި އާއިލާގެ އިހުމާލުންނޭ ބުނުމަކީ ރޭޕިސްޓުން ދިފާއުކުރުމެވެ.
ގެވެށި އަނިޔާ އާއި ޖިންސީ ހާނިއްކަ އާއި ފުރައްސާރަ އާއި ގޯނާ އާއްމުވެފައި އޮތް ގައުމެއްގައި މި ވިސްނުން މޫލާފައި އޮތުމަކީ އެއް ގޮތަކުން ބަލާ އިރު ހައިރާންވާން ޖެހޭ ކަމެއް ނޫނެވެ. ތިމަންނާމެންނަކީ ކުރިއަރައި ތަހުޒީބުވެފައިވާ ބައެއް ކަމަށް ދެކޭ ދިވެހިންގެ މި ވިސްނުމަށް ބަދަލެއް އަތުވެދާނެ ކަމުގެ އިޝާރާތެއް ވެސް ނުފެނެ އެވެ. މި ވިސްނުމާ ޚިލާފު އެއްޗެއް ބުނުމަކީ ވެސް ފޫނެތްފަޔަށް ފެންފުރުން ކަހަލަ ކަމެކެވެ.
ރާއްޖޭގައި ކޮންމެ ތިން އަންހެނަކުން އެކަކު އަނިޔާ ތަހައްމަލްކުރާކަން ތަފާސްހިސާބުން އެނގޭ އިރު އަދި ކޮންމެ މަހަކު ވެސް އެފަދަ އެތައް މައްސަލައެއް ރިޕޯޓްކުރާކަން ރަސްމީ ފަރާތްތަކުން ހާމަކުރާ އިރު ވެސް، އެކަމާ މެދު ކަންބޮޑުވުން ފާޅުކުރާ އަޑަށް ވުރެ ގަދައީ، މައްސަލައެއް ތިލަވާ ކޮންމެ ފަހަރަކު، ތުހުމަތުކުރާ މީހާ ނުވަތަ އަނިޔާ ލިބުނު މީހާ ކުށްވެރިކުރާ އަޑެވެ. މި ސަގާފަތުގެ ޚުލާސާއެއް ކިޔައިދެމުން ޓްވިޓާގައި އެކަކު ބުނި ގޮތަށް، "އަންހެންކުއްޖާގެ މައްސަލަ ވަރަށް ވެސް ގިނަ" އެވެ.
"އަންހެންކުއްޖާ؛ ދޮގު ވެސް ހަދާފާނެ، ލާރި ވެސް އަތުލަފާނެ، ގޭގައި އޮތް ނަމަ އެހެން ނުވާނެ، އެކަނި ދިޔައިމަ ވީ ގޮތެއް، މައިންބަފައިންގެ މައްސަލަ، ބޭނުން ވެގެން ކުރި ކަމަކަށް ވާނީ،" އާއްމުކޮށް މީހުންގެ ވިސްނުން ހުންނަ ގޮތް އޭނާގެ ޓްވީޓްގައި ލިޔުނެވެ.
"ގޭގައި އޮތް ނަމަ" ރޭޕް އާއި ޖިންސީ ގޯނާ އާއި ފުރައްސާރަ ކުރިމައްޗެއް ނުވާނެއެކޭ ނުބުނެވޭނެ އެވެ. ހަމަ އެ ގޮތަށް، ރޭޕްގެ ސަބަބުން އަނިޔާ ލިބިއްޖެއޭ ބުނާ މީހަކު ކުށްވެރިއެއް ވެސް ނުކުރެވޭނެ އެވެ. ކުށްވެރިޔަކީ ރޭޕިސްޓެވެ. ޖިންސީ ގޯނާ އާއި ފުރައްސާރަ އާއި ރޭޕް ކުރަން ދެއްކޭނެ ހުއްޖަތެއް ނޯންނާނެ އެވެ."
މީހަކަށް އަނިޔާއެއް ނުވަތަ ގެއްލުމެއް ލިބޭ ކޮންމެ ފަހަރަކު، އެހެން އެ ވީ އޭނާ "ގޭގައި އޮއްވާ"ތޯ ސުވާލުކުރުން އާއްމުވުމުގެ ނަތީޖާއެއްގެ ގޮތުން، "ގޭގައި އޮތް ނަމަ"، ޒަމާނީ ވައް ބަހަކަށް ވެސް ވެއްޖެ އެވެ. އާ ކޮންމެ މައްސަލައަކާ އެކު އެ މައުލޫއު ދިރިގެން އަންނަ އިރު، އެތައް ބައެއްގެ ތަޖުރިބާތަކާއި ކަމާބެހޭ ފަރާތްތަކަށް ހުށަހަޅާ މައްސަލަތަކުން އެނގެނީ "ގޭގައި އޮތަސް" ސަލާމަތެއް ނެތް ކަމެވެ. ރާއްޖޭގައި އެތަކެއް އަންހެންކުދިންނާއި ފިރިހެންކުދިންނަށް ޖިންސީ އަނިޔާކޮށް ރޭޕްކުރަނީ ގޭތެރޭގަ އެވެ. ކޮންމެ ފަސް އަންހެނަކުން އެކަކީ ފިރިމީހާ، ރައްޓެހިވެގެން އުޅޭ މީހާ ނުވަތަ އިނދެ ވަރިކޮށްފައިވާ މީހާގެ ފަރާތުން އަނިޔާ ތަޖުރިބާކުރާ މީހެކެވެ.
އެހެންވީމާ މައްސަލައެއް ފެންމަތިވާ ކޮންމެ ފަހަރަކު ސޯޝަލް މީޑީއާގައި އަޑުގަދަކުރަން ޖެހެނީ މި އަނިޔާތަކާ ދެކޮޅަށެވެ. މަސައްކަތްކުރަންވީ ގޭތެރެ އާއި ގެ އިން ބޭރަކީ ވެސް އެންމެންނަށް ރައްކާތެރި އަދި ބިރެއް ނެތި އުޅެވޭ ފަދަ އަމާން ތަންތަނަށް ހަދާށެވެ. އަޑުއުފުލައި ބާރު އަޅަންވީ އަނިޔާވެރިންނަށް ހައްގު އަދަބު ދޭށެވެ. އުޅެގަންނަންވީ މިފަދަ ކަންކަން ނުހިނގާނެ މުޖުތަމައުއެއް ބިނާކުރާށެވެ. ސަބަބަކީ، މުޖުތަމައުގެ ވިސްނުން މި ގޮތަށް ބަދަލު ނުވާހާ ހިނދަކު އަނިޔާވެރިކަމާއި ފުރައްސާރަ އަށް ނިމުމެއް ނާންނާނެ އެވެ.
ތައުލީމު ހޯދުމާއި މަސައްކަތަށް ދިޔުމާއި މުނިފޫހިފިލުވުމާއި އާއްމު ދިރިއުޅުމުގެ އެ ނޫން ވެސް ކަންކަމުގައި ހަރަކާތްތެރިވެ އުޅުމުގެ ހައްގު އަންހެންކުދިންނަށާއި އަންހެނުންނަށް ވެސް ލިބިގެންވެ އެވެ. އަންހެންކުއްޖަކަށް ނުވަތަ އަންހެނަކަށް ވީތީ އެ މިނިވަންކަން ނިގުޅައެއް ނުގަނެވޭނެ އެވެ. އެހެންވީމާ "ގޭގައި އޮތް ނަމަ" ރޭޕް އާއި ޖިންސީ ގޯނާ އާއި ފުރައްސާރަ ކުރިމައްޗެއް ނުވާނެއެކޭ ނުބުނެވޭނެ އެވެ. ހަމަ އެ ގޮތަށް، ރޭޕްގެ ސަބަބުން އަނިޔާ ލިބިއްޖެއޭ ބުނާ މީހަކު ކުށްވެރިއެއް ވެސް ނުކުރެވޭނެ އެވެ. ކުށްވެރިޔަކީ ރޭޕިސްޓެވެ. ޖިންސީ ގޯނާ އާއި ފުރައްސާރަ އާއި ރޭޕް ކުރަން ދެއްކޭނެ ހުއްޖަތެއް ނޯންނާނެ އެވެ.
ޖިންސީ އަނިޔާ ލިބިއްޖެއޭ ބުނާ އަންހެންކުއްޖާ ނުވަތަ އަންހެންމީހާ އަށް ނުރުހުމާއި ނަފްރަތުގެ ބަސްތަކުން ހަމަލާދީ ސޯޝަލް މީޑިއާގެ އެކި ދިމަދިމާލުގައި އޭނާ އަށް ފުރައްސާރަކޮށް ހަނގާކުރުމަކީ ހިތާމަހުރި ކަމެވެ. އެފަދަ ޚަބަރެއް އަޑުއިވޭ އިރަށް ބުއްދި އަށް އަންނަ ފުރަތަމަ ވިސްނުމަކީ އަންހެންކުއްޖާ ކުށްވެރިކުރުން ކަމަށްވާ ނަމަ، ދިވެހި މުޖުތަމައުގައި ސީރިއަސް މައްސަލައެއް އެބަ އުޅެ އެވެ. ރާއްޖެ މި ދަނީ ކޮން މިސްރާބަކަށް ހެއްޔެވެ؟ އަނިޔާގެ ޝިކާރައަކަށް ތިމަންނާ ވެއްޖެއޭ ބުނާ މީހަކަށް (ކަމުގެ ހަގީގަތް ރަނގަޅަށް ސާފު ވެސް ނުވަނީސް) އާއްމު ޚިޔާލުގެ ޝަރީއަތަކުން އަދަބު ދީ ނިންމާލާ އިރު، ހިތާއި ސިކުނޑި ކޮބާ ހެއްޔެވެ؟
ރަހުމާއި ހަމްދަރުދީ އާއި އޯގާތެރިކަމާއި އިހުތިރާމް އިސްކޮށްގެން ގެއްލޭނެ އެއްޗެއް އެބަ އޮތް ހެއްޔެވެ؟
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ިއިނ
27 September 2019
ތިވާހަކަ ސަޅި އެކަމު ރޭޕް ކޭސް ދިމާވި ކުއްޖާ އާދިމާ ނުކޮށް ވެސް ހޭލުން ތެރި ކުރުވޭނެ . ސޭ ނޯ ޓު ޜޭޕް
ސާފު
19 October 2018
މިސާލެއް: އެންމެނަށްވެސް އެނގޭ ރާއްޖެގައި ވައްކަން ކުރާކަން. މަގުމަތީ ސައިކަލެއް ތަޅުދަނޑި ޖަހާފާ ހުއްޓާ ވަގަށް ނަގައިފިނަމަ މީހުން ސައިކަލުގެ ވެރިފަރާތަށް މަލާމާތްކުރޭ...ނަމަވެސް މުދަލަކީ ޙުރުމަތްތެރި އެއްޗެއް މީހަކަށް އެހެން މީހެއްގެ މުދަލަކަށް އަރިނުގަނެވޭނެ. ވީމާ ސައިކަލު މަގުމަތީގައި އިސްޓާޓުކޮށްފައި ބެހެއްޓުމަކީ ވެރިފަރާތުގެ ޙައްޤެއް، އަމިއްލަ މިނިވަންކަން، ވަގުންނާ ބެހޭކަމެއް ނޫން. އަމިއްލަ ނަފުސުގެ އަގާމެދު ބައެއްކުދިންނަށް ނުވިސްނެނީ
ރާއްޖެތެރޭ މީހާ
08 August 2018
ހެދުން އެޅުމުގެ ވައްޓަފާޅިއަކީ މީހާއާ މެދު އެހެންމީހުން ދެކޭގޮތް ވަރަށް ބޮޑަށް ދައްކުވައިދޭ ކަމެއް. ފޮރުވުމާއި ހާމަވުމުގައި ތަފާތެއްވާނެ. ދަރިންނޭ ވިސްނާ ފިކުރުކުރޭ
ޔާނީ
27 July 2018
ތީ ވަރަށް ބޮޑު ތެދެއް..ވަކިން ހާސަ ކޮން މި ރާއްޖޭގަ ގިނަ މީހުން ކަމުގެދެކޮޅު ނޭގި ވާހަކަ ހަދާނެ ފެނުނު ގޮތަކަށް
ކޮމެން ޓ
27 July 2018
އަސްލު މައްސަލަ އަކީ ދީނާ މީހުން ދުވަހެއް ދުވަހަކަށް ދުރަށް ދާތީ މީހާރު މި އުޅޭ ފިރިހެން ކުދިންނެއް އަންހެން ކުދިން ނަކަށް ރެސްޕެކްޓެއް ނުކުރޭ އަހެންކުދިން ގެ ވެސް ޒިންމާ އެއް ރައްކާތެރި ގޮތުގަ ހިފުން.. ދެބާމީހުންގެ ޒިންމާ ނުއުފުލާތީ މިހެން މި ވަނީ .. އަނިއާއެއް ލިބުނު މީހާ ދިފާއު ކުރުމަކީ ދެރަކަމެއް.. މި ދީން ބާރު އަޅަނީ އަދުލް އިންސާފަށް ކަތައް ކުރުމަށް..
އަލީ ނަޒިމް
27 July 2018
ދެރަ ކަމަކީ މިކަހަލަ ވާހަކަ ހަޖަމެއްނުވާނެ މެދުއިރުމަތީ ގެ އަހުލު ވެރިންނަކައް. މި ރާއްޖޭގައިވެސް ވަރައް ގިނަ ބަޔެއް އެއީ! ސަޅި ލިޔުމެއް!
މެދުއިރުމަތި
27 July 2018
މިކަހަލަ ކަންކަން ވަނީ ފަރަންޖީން އުޅޭގޮތަށް އުޅެން ހަދައިގެން
ހުޅަނގުން އިރު އެރުން
27 July 2018
ބެންކު ތަކާއި ފިހާރަ ތައް ތަޅުލުމާއި ނުލުން އެއީ އޯނަރުގެ މިނިވަން ކަން، ވަގުން ގާތު ބުނޭ ވައްކަން ނުކުރައްޗޭ.
ޔަހޫދީ
28 July 2018
ޔަހޫދީން އަރައިގެން އެތަން (މެދުއިރުމަތި) ފާސިދުވީ
ދަބަރުކަތްދަ
26 July 2018
މިކަހަލަ ލިޔުމެއް ދިވެހި ނޫހެއްގައި ފެނުނީމަ ވަރަށް އުފާވެއްޖެ. މީހުންނަށް މީގެ މާ ކުރިން ވިސްނިފަ އޮންނަން ޖެހޭ ވާހަކައެއް މީ. މިކަމަކީ ކޮންމެހެން އަންހެނުން ނޫނީ ފިރިހެނުން ގޯސްކޮށްގެން ދައްކާ ވާހަކައެއް ނޫން، ބޭނުމަކީ މުޖުތަމައުގައި އެންމެންވެސް އެކަކު އަނެކަކަށް އިހްތިރާމްކޮށްގެން، ކޮންމެ މީހަކަށްވެސް މިނިވަންކަމާއެކު ދިރިއުޅުމުގެ ފުރުސަތު ހޯދާދިނުން.
ޖޮބް
26 July 2018
ޖުމްލަ ގޮތެއްގައި ތިޚިޔާލަށް ތާއިދުކުރަން. އެކަމަކު، ދެކޮޅުގެ ވިސްނުންވެސް އަޅާކިޔުން މުހިއްމު. ތިވިދާޅުވާފަދަ އައިޑީއަލް ސޮސައިޓީއެއް އަދި މިހާތަނަށް ދިނުޔެއަށް އައިސްފައެއް ނުވޭ. އެހެންވީމާ، ރޭޕްގައި އަންހެން ކުއްޖާގެ ކުށެއްނުވިޔަސް ރައްކާތެރި ވުމަށް އެކުއްޖާ ގާތުގައި ބުނުމަކީ އެކުއްޖާއަށް ތުހުމަތެއް ކުރުމެއް ނޫން. މިސާލަކަށް އަޅުގަނޑުގެ ކާރު ތަޅުނުލައި މަގުމަތީގައި ބާއްވާފައި ފިހާރައަކަށް ވަނުމުން، އެކާރު ވަގަށް ނަގާކަށް ނުޖެހޭނެ. އެހެންނަމަވެސް، މުޖްތަމަޢުގެ ޙާލަތަށް ބަލާއިރު، އެކާރު ތަޅުލާފައި ބޭއްވުން ނުލައި ބޭއްވުމަށްވުރެ ރަނގަޅޫ ނޫންތޯ. ރައްޓެހިވެގެން އުޅޭ ކުއްޖާއާއެކު އެކަނި ތަންތަނަށް ނުދިޔުމާއި، ދާތަނެއް ގާތް މީހެއްގާތު ބުނެފަ ދިޔުމާއި، ތިމާގެ ރީތިކަމަކީ ހުރިހާ އެންމެންނަށް އާންމުކޮށްފައި އޮންނަ އެއްޗެއްކަށް ނަހަދަން ބުނަނީ އެކުއްޖާގެ ކުށަކުންނޫން. އެކަމަކު، އެކުއްޖާގެ ރައްކަލަކަށް. ކަންއޮތް ގޮތަށް ނުބަލައި، ކަން އޮންނަންވާނެ ގޮތަށް ބަލައިގެން ކަންކަން ހައްލެއް ނުވާނެ.
ޝަރީޢަތް
27 July 2018
ވަރަށް ރަނގަޅު ވާހަކައެއް.... އިންފެކްޓް 100 އިގެ ވާހަކައެއް...! ލިޔުންތެރިޔާވެސް މާބޮޑަށް ޖަޒުބާތީ ނުވެ ވިސްނައިފިއްޔާ އެނގޭނެ ދެކޮޅަށް ކިރައިގެން ލިޔަން....
ޙފފތ
26 July 2018
އާސިޔަތު. އަނިޔާ ލިބޭ ކުދިން، ހާއްސަކޮށް އަންހެން ކުދިން ކުއްވެރިކުރުމުގެ ސަގާފަތު އަންނަނީ އެއީ ދީނުގަ އޮތް ގޮތް ކަމަށް ޤާބޫލުކުރެވޭތީ. ވަކި ދީނެއް ނޫން. ހުރިހާ މުޖުތަމައަކުންވެސް މީތި ފެނޭ. މިހެން ބުނީމަ އެމީހަކު ކަތިލާ ހިސާބުގަ އޮންނަނީ މިރާއްޖޭގަ.
އަލީ ނާޒިމް
27 July 2018
އެހެން ދީނޭ؟؟ އެއީ އޮންނައެއްޗެއް ނޫން!!!
ޒެކްް
26 July 2018
ކޮމެންޓްއެށް ކުރުމުގެ ޝައުގުވެރިކަމެށް ނެތް. އެހެނީ ނުވިސްނޭ ބަޔަކާވާހަކަ ދެއްކުމީ ބޭކާރުކަމެކެވެ.