ރަސްފަންނުގައި ހަދާ ޕެވިލިއަން އަށް ދިވެހި ބަހުގެ އެކަޑެމީ އިން އާ ލަފުޒެއް ދީފި އެވެ.
ދިވެހި ބަހުގެ އެކަޑެމީން މިއަދު ބުނި ގޮތުގައި ޕެވިލިއަން އަށް ކިޔާނެ ނަމެއް ގޮތުގައި އެ ތަނުން ފާސް ކުރީ "ފަވީލާ" އެވެ. ޕެވިލިއަނަށް ފަވީލާގެ ނަން ދިން ސަބަބެއް އެކަޑެމީން އަދި ނުބުނެ އެވެ.
ފަހަކަށް އައިސް، ދިވެހި ބަހުގެ އެކަޑެމީން ދަނީ ގިނަ އަދަދެއްގެ އާ ލަފްޒުތަކެއް ތައާރަފް ކުރަމުންނެވެ.
އެގޮތުން ދާދި ފަހުން، ސޯޝަލް މީޑިއާގައި އެންމެ ބޮޑު ބަހުސެއް ކުރި އެއް ބަހަކީ ބްރިޖަށް ދިވެހިން ކިޔާނެ ދެ ނަމެއްގެ ގޮތުގައި "ބުރިޖު" އާއި "ދާލަން"، ކަނޑައަޅައި އެކަން އެކަޑަމީން އިއުލާން ކުރުމުންނެވެ.
ރަސްފަންނުގައި އެމްޑަބްލިއުއެސްސީން ހަދާ ޕެވިލިއަން އަށް، ބައިނަލްއަގުވާމީ ހަތަރު ފްރެންޗައިސްއެއް ހުންނާނެ އެވެ. އެގޮތުން ގާތްގަނޑަކަށް 900 މީހުންގެ ޖާގައިގެ ޕެވިލިއަން ހުޅުވާއިރު، އޮސްޓްރޭލިއާގެ މަޝްހޫރު "ގްލޯރިއާ ޖީންސް" ކޮފީއާއެކު އިތުރު ބްރޭންޑެއްގެ ފްރެންޗައިސް ރެސްޓޯރަންޓުތަކެއް ހުންނާނެ އެވެ. އެކަމަކު، ދެން ހުންނަނީ ކޮން ރެސްޓޯރަންޓުތަކެއް ކަމެއް އަދި ހާމައެއް ނުކުރެ އެވެ.
ޕެވިލިއަންގެ މަސައްކަތް ނިންމައި، މި މަހުގެ ފަހުކޮޅު ހުޅުވަން ދަނީ މަސައްކަތް ކުރަމުންނެވެ.
