ރާއްޖޭގެ ގައުމީ އެއާލައިން "މޯލްޑިވިއަން"ގެ ފުރަތަމަ ލަގްޒަރީ ސީޕްލޭން ރާއްޖެ ގެނެސް، އުދުހުންތައް ފަށައިފި އެވެ.
މިއީ މޯލްޑިވިއަނުން ރާއްޖެ ގެނައި އަށް ވަނަ ސީޕްލޭނެވެ.
މި ބޯޓުގައި ހުންނަނީ ޕްރައިވެޓް ޖެޓްތަކުގައި ހުންނަ ކަހަލަ ސީޓުތަކެވެ. އަދި އޭސީ ކޮށްފައިވާ މިި ބޯޓުގެ ކޮންމެ ސީޓެއްގައި ޓްރޭ ހިމަނައި، ކޭޓަރިންގެ ހިދުމަތް ދެވެ އެވެ.
މި ބޯޓުގެ އުދުހުންތައް ފެށުމަށް މިއަދު އިބްރާހިމް ނާސިރް އިންޓަނޭޝަނަލް އެއާޕޯޓްގައި ބޭއްވި ރަސްމިއްޔާތުގައި އައިލެންޑް އޭވިއޭޝަން ސާވިސްގެ ހެޑް އޮފް އެޑްމިނިސްޓްރޭޝަން އަލީ ނަޝާތު ވިދާޅުވީ މި ބޯޓު ބޭނުންކުރަން ބޭނުންވާ ފަރާތްތަކަށް މިހާރު އެ ފުރުސަތު ހުޅުވާލާފައިވާ ކަމަށެވެ.
"އަމިއްލަ ފަރާތްތަކަށް ވެސް، ރިސޯޓުތަކަށް ވެސް މި ބޯޓު ޗާޓާ ކުރުމުގެ ފުރުސަތު މިހާރު ލިބޭނެ،" ނަޝާތު ވިދާޅުވި އެވެ.
އޭނާ ވިދާޅުވީ މިއީ ލަގްޒަރީ ބޯޓެއް ކަމުން ޗާޓާ އަގު ތަފާތު ވާނެ ކަމަށެވެ. އަދި އެ ކުންފުނިން މިހާރު ދަނީ ދަތުރުކުރާ މަންޒިލްގެ ދުރުމިނަށް ބަލާފައި އަގުތަށް ކަނޑައަޅަމުން ކަމަށް ވެސް ވިދާޅުވި އެވެ.
"މޯލްޑިވިއަނުން ސީޕްލޭންގެ ހިދުމަތް ފެށިތާ އަދި މިވީ ދެ އަހަރު. އަޅުގަނޑުމެންގެ ފުރަތަމަ ދެ އަހަރަށް ކަނޑައަޅާފައި ހުރި ޓާގެޓުތައް މި ދަނީ ހާސިލް ވަމުން. އެގޮތުން، ދެ އަހަރު ތެރޭ ގެންނަން ރާވާފައިވާ 10 ބޯޓުގެ ތެރެއިން މިއީ އަށް ވަނަ ބޯޓު. އަދި މިއަހަރު ނިމުމުގެ ކުރިން ދެ ބޯޓު ގެންނާނަން،" ނަޝާތު ވިދާޅުވި އެވެ.
އަންނަ އޮގަސްޓް ނުވަތަ ސެޕްޓެމްބަރުގައި ކުންފުނިން ނުވަ ވަނަ ސީޕްލޭން ގެންނަން ހަމަޖެހިފައިވާ ކަމަށް އޭނާ ވިދާޅުވި އެވެ. އަދި 10 ވަނަ ސީޕްލޭން ގެންނަން ހަމަޖެހިފައި ވަނީ އޮކްޓޫބަރު ނުވަތަ ނޮވެމްބަރުގައި އެވެ.
މި ރަސްމިއްޔާތުގައި އެ ކުންފުނީގެ ސީޕްލޭން މެނޭޖަރު، ކޮމާޝަލް ޝީރާޒް ރާޝިދު ވިދާޅުވީ ރާއްޖޭގައި ލަގްޒަރީ ރިސޯޓުތަކަށް ވަރަށް ބޮޑު ޑިމާންޑެއް އޮންނަ ކަމަށެވެ. އަދި އެ ރިސޯޓުތަކަށް ދަތުރު ކުރުމަށް ލަގްޒަރީ ސީޕްލޭނެއް މިހާރު ބޭނުން ކުރެވޭނެ ކަމަށާއި ޑިމާންޑު އޮންނަ ވަރަކަށް މިފަދަ ލަގްޒަރީ ސީޕްލޭންތައް މޯލްޑިވިއަންގެ ފްލީޓަށް އިތުރު ކުރަން ވިސްނާ ކަމަށް އޭނާ ވިދާޅުވި އެވެ.
