ގައުމީ ޔުނިވާސިޓީ ދަރިވަރުންތަކެއްގެ ގްރެޖުއޭޝަން: ޑޮކްޓަރުކަން ކިޔެވުމުގެ ކޯހަށް ފުރަތަމަ ދުވަހު އެކަނި ވެސް 40 ފޯމު ވަނީ ހުށަހަޅާފައި.
23 އެޕްރީލް 2018 - 16:39
18 comments
ޑޮކްޓަރުކަން ކިޔެވުމަށް ރާއްޖޭގައި އަލަށް ފަށާ ކޯހަށް ބޮޑު ތަރުހީބެއް ލިބި، ފުރަތަމަ ދުވަހު އެކަނި ވެސް 40 ފޯމު ހުށަހަޅާފައިވާ ކަމަށް މޯލްޑިވްސް ނޭޝަަނަލް ޔުނިވާސިޓީ (އެމްއެންޔޫ) އިން މިއަދު ބުނެފި އެވެ.
އަންނަ ޖުލައި މަހުގެ ތެރޭގައި ފަށަން ނިންމައި، ޖުމްލަ 50 ޖާގަ ދޭން ނިންމާފައިވާ އެމްބީބީއެސް ކޯހުގެ ފޯމުތައް އެމްއެންޔޫ އިން ބަލައިގަންނަން ފެށީ އިއްޔެ އެވެ.
އެތަނުގެ ރަޖިސްޓްރާ ޑރ. ސައުދުﷲ އަލީ ވިދާޅުވީ އެމްބީބީއެސް ކިޔަވަން މިހާތަނަށް 40 ފޯމު ހުށަހަޅާފައިވީ ނަމަވެސް އެ ކޯހުން ޖާގަ ލިބޭނެ ދަރިވަރުންގެ އަދަދު ކަށަވަރު ވާނީ ފޯމުތައް ބެލުމަށް ފަހު ކަމަށެވެ.
އޭނާ ވިދާޅުވި ގޮތުގައި ކޯހުން ޖާގަ ދިނުމުގައި އިސްކަންދޭނީ، ކޯހަށް އެންމެ ފުރަތަމަ ކުރިމަތިލީ ދަރިވަރުންގެ ތެރެއިން ޝަރުތު ހަމަވާ މީހުންނަށެވެ. އެ ކޯހުގެ ޝަރުތުތަކާއި ސްޓްރަކްޗާ ވެސް ތައްޔާރުކޮށްފައިވަނީ، ބައިނަލްއަގުވާމީ ގޮތުން ފާހަގަކޮށްލެވޭ ފެންވަރުގައި ކަމަށް ވެސް ވިދާޅުވި އެވެ.
"މެލޭޝިޔާގެ ދެ ޔުނިވާސިޓީއެއްގެ ވެސް ކޯސް ސްޓްރަކްޗާ އަދި ކަނޑައަޅާފައިވާ ޝަރުތުތަކާ އެއްގޮތަށް އަޅުގަނޑުމެންގެ ކޯހާއި ސްޓްރަކްޗާ ހަމަޖައްސާފައިވަނީ. މިހާތަނަށް އެމްބީބީއެސް އަށް 40 ފޯމު ލިބުނު ކަމުގައި ވިއަސް ޖާގަ ދެވޭނެ ދަރިވަރުންގެ އަދަދު އެނގޭނީ ފަހުން،" ސައުދުﷲ ވިދާޅުވި އެވެ.
އެމްބީބީއެސް ޕްރޮގްރާމަށް އެދުމުގެ ޝަރުތުތަކުގެ ތެރޭގައި، އޭ ލެވެލްގައި ބަޔޮލޮޖީ، ކެމިސްޓްރީ، ޕިޒިކްސް އަދި ހިސާބުން ފާސްވުމާ އެކު އޯ ލެވެލް އިމްތިހާނުގައި މަދުވެގެން ފަސް މާއްދާއިން ފާސްވުން ހިމެނެ އެވެ. އޭގެ ތެރޭގައި އިނގިރޭސި މާއްދާއިން މަދުވެގެން ސީ ފާހެއް ލިބެން ޖެހެ އެވެ.
ފަސް އަހަރުގެ މުއްދަތަށް ހިންގާ އެމްބީބީއެސް ކޯހުގެ ފީއަކީ މަހަކު ގާތްގަނޑަކަށް 1000 ޑޮލަރު (ގާތްގަނޑަކަށް 15،000ރ.) އެވެ.
އެމްއެންޔޫ އިން އެމްބީބީއެސް ކޯސް ހިންގާނީ އަލަށް ގާއިމްކުރާ މެޑިކަލް ކޮލެޖް ހުޅުވަންދެނެވެ. މެޑިކަލް ކޮލެޖް ހުޅުވުމުން ކޯސްތައް ކުރިއަށް ގެންދާނީ އެތަނުގަ އެވެ. މެޑިކަލް ކޮލެޖު ހިންގަން ނިންމާފައި ވަނީ ދަރުމަވަންތަ ހޮސްޕިޓަލުގެ ދެ ފްލޯއެއްގަ އެވެ.
އެމްބީބީއެސް ކިޔަވަން ބޭނުންވާ ދަރިވަރުންނަށް ހާއްސަކޮށްގެން ޑިޕާޓްމަންޓް އޮފް ހަޔަ އެޑިއުކޭޝަނުން ވަނީ ލޯނުގެ ފުރުސަތެއް ވެސް ހުޅުވާލައިފަ އެވެ. އެކަމަށް އެދުމުގެ މުއްދަތު އަންނަ ބުރާސްފަތި ދުވަހު ހަމަވާނެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަހުމަދުބެ
24 April 2018
ބުނެވެން އޮތީ ރާއްޖޭގައި އެކަންޏެއްނޫން އަމިއްލަ ރަށުގަ ވެސް ޑޮކްޓަރުކަން ކިޔަވާ ދެވިދާނެ. ބޮޑު ސުވާލަކީ ރާއްޖެ އިން ޑޮކްޓަރުކަން ކިޔަވާނިމި ފާސް ލިބޭ "ޑޮކްޓަރުން" ގައިގަ ހުންނާނީ ކޮން ފެންވަރެއްތޯ؟ ބޭސްވެރިކަމުގެ މާތް ޚިދްމަތަށް ނުކުންނަ އިރު އެކަމަށް ފުރިހަމައަށް ގާބިލްވުން ކޮންމެހެން ލާޒިމް. މިހާރުވެސް އިވޭ އަޑަކީ ރާއްޖޭގެ އެކި "ކޮލެޖް" ތަކުން ޑިގްރީ އާއި މާސްޓާސް ހަދައިގެން ނިމޭ ގިނަ ކުދިން ގައިގަ ޖީސީޢީ ޢޭ ލެވެލްގެ ފެންވަރުވެސް ނުހުންނަވާހަކަ. އެސައިންމަންޓް ތަށް މީހުން ލައްވާ ހަދައިގެން އަމިއްލަޔަށް ރިސާޗް ނުހަދާ "ޝޯޓް ކަޓް" ބޭނުން ކޮށްގެން ހަދާ އެހެން ފާސްތަކުން މުޖުތަމައަށް ލިބޭ ގެއްލުމަށް ވުރެ ފެންވަރު ނެތް ޑޮކްޓަރުންގެ ނުރައްކާ ވަރަށް ބޮޑު ވާނެ. ތިކުދިންނަށް ކިޔަވާ ދެއްވާ އިރު މިކަމާ ވިސްނަވާތި!
ސަފީ
24 April 2018
ވަރަށް ޑިމާންޑް ބޮޑުކަން އިގިއްޖެ..40 ފަހަރު އިއުލާންކޮށްގެން 40 އެޕްލިކޭޝަން
ސޯބު
24 April 2018
މެޑިސިން ކިޔަވާއިރު ޑެޑްބޮޑީސް ބޭނުންކުރާކަމަށްވަނީ. ސުވާލަކީ ފަޅާ ހަދައިގެން ރިސާޗްކުރަން ރާއްޖެއިން ޑެޑްބޮޑީސް ލިބޭނެބާއޭ.
ބީކޭކޭ
23 April 2018
މިވާގޮތުން ލަފާކުރެވެނީ 2020ގަ މުޅިރާއްޖޭގަ ތިބޭނީ ހުސްޑޮކްޓަރުންކަމައް!!!
ޑޮކްއެމްވީ
23 April 2018
ތިތަނުގަ ކިޔަވާދެއްވަނީ ކޮންބައެއްބާ؟ މެޑިކަލް ކޮލެޖްތަކުގަ ކިޔަވަދޭ ޕްރެފެސަރުންނަކީ އެތައް އަހަރެއް ކިޔަވާދިނުމުގައި އުޅެ އެތައް ޕަބްލިކޭޝަންތައް ހަދާ ދިރާސާ ކުރުމުގަ މުޅި އުމުރު އުޅޭ ބައެއް. ރާއްޖޭން ބޭރުން އެފެންވަރުގެ ލެކްޗަރާއިން ލިބޭނެތޯ ސުވާލަކީ ؟ ނޫނީ މިހާރު ރާއްޖޭގަ ތިއްބެވި ދިވެހި ޑޮކްޓަރުންކޮޅެއް ލައިގެން ތިކަން ނަމެއްގައި ކުރުން ބުއްދިވެރިބާ؟ އޭގެން ކިތައް މީހުންބާ ލެކްޗަރާއެއްގެ ނުވަތަ ޕްރޮފެސަރެއްގެ ޝަރުތު ހަމަވަނީ؟
ށަރު
23 April 2018
ޙާސްނުވޭ. ކޮންމެ ކުއްޖެއްގެ އަތުން މަހަކު 1000 ޑޮލަރު - އެއީ 50،000 ޑޮލަރު މަހަކަށް. ޢެއިން މުސާރަ ދެވޭނެ ޕްރޮފެސަރުން ގެންނަން.
ތިޔަ ވަރަކުން ނުފުދޭ
23 April 2018
ކޯހުގެ ފެންވަރު ރަގަޅު ނަމަ، އަދި ދުނިޔޭގެ އެހެން ތަންތަނުން ގަބޫލުކުރާ ނަމަ، ވަރަށް ރަގަޅު.
ނާއިފް
23 April 2018
ދީފަ އޮތް ކްރިޓީރިއާ އަށް ފެތެނީ ރާއްޖޭގެ ޓޮޕް 5 ގެ ކުދިން އެކަނި. އެ އަށް ވުރެ ދަށް ވެއްޖެއްޔާ ދީފަ އޮތް ކްރިޓީރިއާއަކަށް ނުފެތޭ. ސުވާލަކީ ޓޮޕް 5 ގެ ހުރިހާ ކުދިނ މެޑިސިން ހަދާނެތޯ؟
ވަހީދު
23 April 2018
ދެން ތި ބުނަނީ ކުރައިޓީރިއާ ދަށް ކުރާށޭ؟ ދައްކޮއްގެން ބަޔަކު ކޯހެއް އަދި ހެދިޔަކަސް ނުވާނެ މިކަމެއް.
ރާއްޖެ
23 April 2018
12 ހާސް ޑޮލަރ އަހަރަކަށް މާ ބޮޑަށް ވެސް އަގުބޮޑު. 5 އަހަރުން 60 ހާސް ޑޮލަރ، ކިޔަވާ ނިންމާފަ ވަޒީފާ އަދާކުރަމުން ބޮޑު ލޯނެއް ބޮލުގައި އަޅައިގެން މަހަކު 20000ރ ކިރިޔާ ލިބެނީ. ގުޑް ލަކް ޑޮކްސް. މިވަރު ޚަރަދު ކޮށްފަ ރާއްޖެއިން ބޭރުން މާރަގަޅު ޔުނިވަރސިޓީތަކުން ކިޔެވޭނެ. ސުވާލަކީ އެމް އެން ޔޫގެ އެމް ބީ ބީ އެސް ގަބޫލު ކުރަނީ ދެން ކޮން ގައުމަކުންތޯ؟ ޕޯސްޓް ގްރެޖުއޭޓް ހަދާ އިރު ދިމާވެދާނެ މައްސަލައެއް.
1234
23 April 2018
5 އަހަރުގެ އެމްބީބީއެސް ނިމޭއިރު 1 މިލިއަން ރުފިޔާ ކޯހުގެ ފީއަށް ދޭއެބަ. މިއަށް ވުރެ އަގު ހެޔޮކޮށް މިކަން ނުވާނެބާ؟ އަހަރަކަށް 12،000 ޑޮލަރަކީ ބޮޑު އަދަދެއް. ޗައިނާ ޕިލިޕީން ޕާކިސްތާނުން ކިޔަވަން އަހަރަކަށް ނަގަނީ 6000 ޑޮލަރު ވަރު..
ތުނިޔަ
24 April 2018
އިންޑިޔާގަ އެމްބީބީއެސް ހެދިޔަސް ކޯސްފީއަށް އެކަނި ދިވެހި ރުފިޔާގެ އެއްމިލިޔަން ދައްކަންޖެހޭ! އެކަމަކު ޗައިނާއިން އަގުހެޔޮކޮށް ތިކަންވޭ...މައުލޫމާތު ހޯއްދެވުން އެދެން.
ހާޒިމް
23 April 2018
ރާއްޖޭގައި އެމްބީބީއެސް ކިޔަވައިދޭނއ ފެށުމަކީ އުފާވެރި ހަބަރެއް. މި ކޯސްގެ ފެންވަރު ވެސް ރަނގަޅުވާނެ ޖަމަށް އުންމީދު ކުރަން