ކަސްރަތުކުރީ ބޮތްކެއް ވަގަށް ނަގަން

30 ޖޫން 2018 - 06:49

އިންޑިއާގެ ޓެމިލްނާޑޫގެ ކޮއިމްބަތޫރުގައި، މީހަކު ބޮތްކެއް ވަގަށް ނަގަން އެތައް އިރެއް ވަންދެން "ކަސްރަތު" ކޮށްފި އެވެ.

މި ވައްކަމުގެ ވީޑިއޯ އިންޑިއާގެ ބައެއް ޓީވީތަކުން ވަނީ ދައްކައިފަ އެވެ. ސީސީޓީވީ އަށް ރެކޯޑްކުރެވިފައިވާ މަންޒަރުތަކުން ފެންނަނީ ފިރިހެނަކު ފިހާރައެއްގެ ބޭރުގައި ހުރެ ކަސްރަތުގެ އެކި ހަރަކާތަތައް ގެންނަ ތަނެވެ.

ކަސްރަތުގެ ހަރަކާތްތަކާ އެކު ބޮތްކާ ކައިރިވެ، ހޯލްޑަރުން ބޮކި ނައްޓާލަން އުޅޭއިރަށް ވެހިކަލެއް ނުވަތަ މީހެއް އެތަނަށް އަންނަނީ އެވެ. އެހެންވެ އަނެއްވާސް ފަށަނީ ކަސްރަތެވެ.

މި މަހުގެ 23 ވަނަ ދުވަހުގެ ފަތިހު މިކަން ކުރި މީހާ، އެންމެ ފަހުން ބޮކި ވަގަށް ނަގަ އެވެ.