"ސުޕަމޭން" ގެ ރޯލް ކުޅުނު ހެންރީ ކެވިލް ދެއްކި ވާހަކައަކުން މާފަށް އެދެން ޖެހިއްޖެ

ހެންރީ: އޭނާ ވަނީ ދެއްކުނު ވާހަކަތަކަށް މައާފަށް އެދިފައި.

އަހުމަދު އަދްޝަން، މިހާރު

15 ޖުލައި 2018 - 07:27

"މޭން އޮފް ސްޓީލް" ގައި ސްޕަމޭންގެ ރޯލް ކުޅުނު އެކްޓަރު ހެންރީ ކެވިލް، ޖިންސީ ފުރައްސާރައާ ދެކޮޅު "މީޓޫ" މޫވްމަންޓާ ބެހޭ ގޮތުން ދެއްކި ވާހަކަޔަކުން މާފަށް އެދެން ޖެހިއްޖެ އެވެ.

އުމުރުން 35 އަހަރުގެ އެކްޓަރު ޖީކިއު އޮސްޓްރޭލިއާ އަށް ދިން އިންޓަވިއުއެއްގައި ބުނީ ރޭޕިސްޓެއްގެ ތުހުމަތު އަޅުވައިފާނެތީ މިހާރު އަންހެނަކަށް ލޯބި ހުށަހަޅަން ވެސް ފަސްޖެހޭ ކަމަށެވެ.

މީޓޫ މޫވްމަންޓަށް އިޝާރާތްކޮށް އޭނާ ބުނި ގޮތުގައި މިހާރު ކަންކަން ހިނގާ ގޮތަށް ބަލާ އިރު، ތުހުމަތަކުން ސަލާމަތްވުން ނާދިރު ކަމަކަށް ވެދާނެ އެވެ.

"އަހަރެން މިހާރު ޖެހިލުންވޭ އަންހެނަކަށް ލޯބި ހުށަހަޅަން ވެސް. މިހާރު ކަންކަން ހިނގާ ގޮތުން އެކަން އަހަންނަށް ކުރެވޭ ގޮތަކުން ފަހަރުގައި ހަމަ ރޭޕިސްޓެއްގެ ގޮތުގައި ވެސް ސިފަކޮށްފާނެ،" މި މަހުގެ 26 ގައި ރިލީޒް ކުރާ "މިޝަން އިމްޕޮސިބަލް: ފޯލްއައުޓް" ގައި ވެސް މުހިއްމު ރޯލެއް ކުޅެފައިވާ އެކްޓަރު ބުންޏެވެ. "އަހަންނަކީ ލޯބީގައި ވަކި އުސޫލްތަކެއް ހަމަތަކެއް އޮންނަ ކަމަށް ގަބޫލުކުރާ މީހެއް."

Henry Cavill a whole idiot. The whole Me Too movement has him scared someone may call him a rapist?? Just don’t rape anyone HENRY
— Jaz 🚺 🇭🇷 (@BaddestPadme) July 12, 2018

ހެންރީ އަށް ފާޑު ކިޔާފައިވާ ޓްވީޓެއް.

ވަރަށް ގިނަ އަންހެނުންނަށް އެކިއެކި މަރުހަލާތަކުގައި، އެކި ދުވަސްވަރު، ނުފޫޒު ގަދަ މީސްމީހުންގެ ފަރާތުން ޖިންސީ ގޯނާތަކާއި ރޭޕްގެ ހާދިސާތައް ތަޖުރިބާތައް ކުރަން ޖެހިފައިވާ ކަމަށް ބުނެ، މީޓޫ މޫވްމަންޓުން ހިތްވަރު ލިބިގަނެ އަންނަނީ ފާޅުގައި އެފަދަ ވާހަކަތައް ދައްކަމުންވެ. އަދި މި ހަރަކާތަކާ އެކު ބޭޒާރުވި ބައެއް މީހުންގެ މައްސަލަތައް މިހާރު އަންނަނީ ކޯޓުގައި ވެސް ހިނގަމުންނެވެ.

ހެންރީ ބުނި ގޮތުގައި މާޒީގައި ކަންކަން ހިނގާފައި ހުރި ގޮތް ބަދަލު ކުރަން ޖެހޭ ކަމަށް އޭނާ ވެސް ގަބޫލު ކުރެ އެވެ. އަދި ގޯހެއް ދުވަހަކު ވެސް ރަނގަޅެއް ނުވާނެ ކަމަށް ބުންޏެވެ. އަދި ފިރިހެނުން ވެސް އުސޫލުތަކެއްގެ މަތީގައި ދެމި ތިބެން ޖެހޭ ކަމަށް ބުންޏެވެ.

"އަންހެނަކާ ލޯބީގެ ގުޅުމެއް އުފެއްދޭނީ ވެސް އެކަމަށް މަސައްކަތްތަކެއްކޮށްގެން. އެކަމަކު މިހާރު ވަރަށް އުނދަގޫ ހާލަތެއްގައި މިކަން މިއޮތީ،" ހެންރީ ބުންޏެވެ.

Things that make me go #WTF. If your approaching to "chasing" and/or talking to or picking up women leads you to be afraid a woman might accuse you of Rape and/or Sexual Assault this leads me to question your style of "chasing" women. #DoBetter #HenryCavill #MeToo
— Crystal Storm (@WriterStreamer) July 12, 2018

ހެންރީ އަށް ފާޑު ކިޔާފައިވާ ޓްވީޓެއް.

ހެންރީ ދެއްކި ވާހަކަ އަށް ރައްދު ދެމުން އެއްބަޔަކު ބުނި ގޮތުގައި ހެންރީ ދެއްކީ ތާކުން ތާކު ނުޖެހޭ ގަމާރު ވާހަކައެކެވެ. އަދި ކަމަކަށް ބިރު ގަންނަ ނަމަ، ތުހުމަތެއް ނޭޅުވޭނެ ގޮތަކަށް އަމަލު ކުރީމާ ނިމުނީ ކަމަށް ވެސް ބައެއް މީހުން ބުންޏެވެ.

މިކަމާ ގުޅިގެން ހެންރީ ނެރުނު ބަޔާނެއްގައި ވަނީ އޭނާ ދެއްކި ވާހަކަތަކަށް މާފަށް އެދިފަ އެވެ. އަދި އިންޓަވިއުގައި ދެއްކީ އަންހެނުންނަށް ކުޑައިމީސް ކުރުމުގެ މަގުސަދުގައި ދައްކާފައި ހުރި ވާހަކަތަކެއް ނޫން ކަމަށް ބުންޏެވެ.

"އަހަންނަކީ އަބަދު ވެސް އަންހެނުންނަށް އިހުތިރާމު ކުރާ އަދި މީޓޫ ކަހަލަ މޫވްމަންޓްތަކަށް ތާއީދު ވެސް ކުރާ މީހެއް،" އޭނާ ބުންޏެވެ. "އެކަމަކު އަހަންނަށް ހީވަނީ އަހަރެން ދެއްކި ވާހަކަ މާނަ ކުރުމުގައި ބައެއް މީހުންނަށް އޮޅުންތަކެއް އެރީހެން. އެކަމަށް މައާފަށް އެދެން."