ވޯލްޑް ކަޕުގެ އެންމެ މޮޅު ކީޕަރު މެޑްރިޑާ ދިމާލަށް

މެޑްރިޑް (ޖުލައި 16) – ވޯލްޑް ކަޕުގެ އެންމެ މޮޅު ގޯލްކީޕަރުގެ އެވޯޑް ހޯދި ބެލްޖިއަމްގެ ޗެލްސީ ގޯލްކީޕަރު ތިބައޫ ކޯޓުއާ 35 މިލިއަން ޔޫރޯ އަށް ގަތުމާ ގާތަށް ރެއާލް މެޑްރިޑުން ޖެހިލައިފި ކަމަށް ރިޕޯޓްތައް ބުނެފި އެވެ.

ނިސްބަތުން ކުޑަ އަގެއްގައި މެޑްރިޑަށް ކޯޓުއާ ލިބެނީ ޗެލްސީއާ އެކު އޭނާ ހަދާފައިވާ ކޮންޓްރެކްޓުގައި ބާކީ އޮތީ އެންމެ އަހަރެއް ކަމަށް ވުމުންނެވެ. އަދި މެޑްރިޑުން ކުރާ ހަރަދު ކުޑަވުމާ އެކު ކޯޓުއާ އަށް ބޮޑު މުސާރައެއް ވެސް ލިބޭނެ އެވެ. ގޮތުން އަހަރަކު 11 މިލިއަން ޔޫރޯ ލިބޭ ފަސް އަހަރުގެ ކޮންޓްރެކްޓެއް އޭނާ ކްލަބާ އެކު ހަދާނެ ކަމަށް ބެލެވެ އެވެ.

ކޯޓުއާ ވިދާލީ ޗެލްސީގެ ލޯނެއްގެ ދަށުން ސްޕެއިނުގެ އެތުލެޓިކޯ މެޑްރިޑަށް ކުޅުނު ދުވަސްވަރެވެ. ރެއާލް މެޑްރިޑް އަތުން 2014 ވަނަ އަހަރުގެ ޗެމްޕިއަންސް ލީގުގެ ފައިނަލުން އެތުލެޓިކޯ ބަލިވިއިރު ގޯލް ބެލެހެއްޓީ އޭނާ އެވެ. ފަހުން ޗެލްސީ އަށް ބަދަލު މޮޅު ކުޅުން ތަކުރާރުކުރި ނަމަވެސް އޭނާ މިހާރު ބޭނުންވަނީ ކްލަބް ބަދަލުކުރާށެވެ.

މެޑްރިޑުން ކްރިސްޓިއާނޯ ރޮނާލްޑޯ ޔުވެންޓަސް އަށް ވިއްކާލާފައިވާއިރު އެ ޓީމުން ނަން މަޝްހޫރު އިތުރު ތަރިން ގެންނާނެ އެވެ. އެގޮތުން ކޯޓުއާއާ އެއްކޮށް ބެލްޖިއަމާއި ޗެލްސީ އަށް ކުޅޭ އެޑެން ހަޒާޑް ވެސް އެ ލިސްޓުގައި ހިމެނެ އެވެ.

ކޯޓުއާ ނެތްތަން ފޫބައްދަން ޗެލްސީން އަންނަނީ ރޯމާގެ ބްރެޒިލް ގޯލްކީޕަރު އެލިސަން ބެކާ ހޯދުމުގެ މަސައްކަތް ކުރަމުން ކަމަށް ވެސް ރިޕޯޓްތައް ބުނެ އެވެ. އަދި އޭނާ ނުލިބޭ ނަމަ ދެން މަސައްކަތްކުރާނީ މެޑްރިޑުގެ އެއް ވަނަ ކީޕަރު ކޮސްޓާ ރީކާގެ ކޭލާ ނާވަސް ގެނައުމަށް ކަމަށް ވެސް ވާހަކަތައް ދެކެވެ އެވެ.

މި ފަހަރުގެ ޓްރާންސްފާ ބާޒާރުގައި ގޯލްކީޕަރުންގެ ވިޔަފާރި ވަރަށް ބޮޑަށް ކުރެވޭނެ ކަމަށް މިހާރު ބެލެވެ އެވެ. އެގޮތުން ލިވަޕޫލުން ރޯމާގެ އެލިސަން ނުވަތަ ބާސެލޯނާގެ ބަދަލި ކީޕަރު ކެސްޕާ ސިލެސެން ހޯދުމަށް މަސައްކަތްކުރާ ކަމަށް ރިޕޯޓްތައް ބުނެ އެވެ. މިދިޔަ ސީޒަނުގައި މޮޅު ކުޅުމެއް ދެއްކި އެލިސަން ވިއްކާލައިފި ނަމަ ރޯމާ އިން ބަދަލުގައި ގެންނަން މަސައްކަތްކުރާނީ ޕީއެސްޖީގެ ފްރާންސް ގޯލްކީޕަރު އަލްފޮންސޭ އަރެއޯލާ ނުވަތަ އޭސީ މިލާނުގެ އިޓަލީ ގޯލްކީޕަރު ޖިއަންލުއިޖީ ޑޮންނަރުއްމާ އެވެ. ޔުވެންޓަސްގެ ޖިއަންލުއިޖީ ބުފޮން ޕީއެސްޖީ އަށް ބަދަލުވެފައިވާއިރު އަރެއޯލާ އެ ކްލަބް ދޫކޮށްލާނެ ކަމަށް ވަނީ ބެލެވިފަ އެެވެ. އަދި މިލާނުގައި ވެސް ޕެޕޭ ރެއިނާ ހުުރުމާ އެކު ޑޮންނަރުއްމާ ވިއްކާލުމުގެ ފުުރުސަތު ބޮޑެވެ.