ސިރިސޭނާގެ އުއްމީދަކީ ކޮރަޕްޝަން އެންމެ ކުޑަ ގައުމަކަށް ލަންކާ ހެދުން

ސްރީ ލަންކާގެ ރައީސް ސިރިސޭނާ.

ހަސަން އާމިރު، މިހާރު

29 ޖުލައި 2018 - 14:08

ކޮލަމްބޯ (ޖުލައި 29) - އުއްމީދަކީ ކޮރަޕްޝަން އެންމެ ކުޑަ ގައުމުތަކުގެ ލިސްޓަށް ސްރީ ލަންކާ އެރުވުން ކަމަށް އެ ގައުމުގެ ރައީސް މައިތުރިޕާލާ ސިރިސޭނާ ވިދާޅުވެއްޖެ އެވެ.

އިންޑޮނީޝިއާ އަށް ކުރެއްވި ދަތުރުގައި ސިރިސޭނާ ވިދާޅުވީ ތަރައްގީވަމުން އަންނަ ގައުމުތައް ކުރިއަރަން ކުރިމަތިވެފައިވާ އެންމެ ބޮޑު ގޮންޖެހުމަކީ ވެރިކަމުގެ ގަދަބާރާއި ކޮރަޕްޝަނާއި ރިޝްވަތާއި ކުށްކުރުމާއި ޑްރަގު ކަމަށެވެ.

ވެރިކަމަށް ވަޑައިގެންނެވި ފަހުން ކުރެއްވި ކަންތައްތަކުގެ ތެރޭގައި އެކްޒެކެޓިވް ޕްރެޒިޑެންސީއެއްގެ ދަށުން އެމަނިކުފާނަށް ލިބިވަޑައިގެންފައިވާ ބައެއް ބާރުތައް ދޫކޮށްލެއްވުމާއި ކޮރަޕްޝަނުގެ މައްސަލަތައް ބަލަން ބްރައިބަރީ ކޮމިޝަނެއް އުފެއްދުމާއި ކޯޓުތަކުގެ މިނިވަންކަން ކަށަވަރުކޮށް ދިނުން ހިމެނޭ ކަމަށް ވިދާޅުވި އެވެ. އެމަނިކުފާން ފައްޓަވާފައިވާ ކޮރަޕްޝަން ހުއްޓުވުމުގެ މަސައްކަތް މަޑުޖެއްސުމަށް ކޮރަޕްޓް ބައެއް ސިޔާސީ ފަރާތްތަކުން މަސައްކަތް ކުރަމުންދާ ކަމަށް ސިރިސޭނާ ވަނީ ތުހުމަތު ކުރައްވައިފަ އެވެ.