ހެލްތު މިނިސްޓަރު އަމީން ލޭ ހަދިޔާ ކުރައްވަނީ: ސިއްހަތު ރަނގަޅު މީހެއް ނަމަ އެއް ފަަހަަރަށް ވުރެ ގިނަ ފަހަރު ވެސް ލޭ ހަދިޔާކުރެވިދާނެ -- ފޮޓޯ: ހުސެން ވަހީދު/މިހާރު
23 ޖެނުއަރީ 2019 - 15:00
14 comments
ސިއްހަތުން ރަނގަޅު މީހަކަށް އަހަރަކު ހަތަރު ފަހަރު ލޭ ހަދިޔާކުރެވޭނެ ކަމަށާއި، އެ އާދަ ދިވެހިންގެ ތެރޭގައި ހިފެހެއްޓުން މުހިއްމު ކަމަށް ހެލްތު މިނިސްޓަރު އަބްދުﷲ އަމީން މިއަދު ވިދާޅުވެއްޖެ އެވެ.
ހެލްތު މިނިސްޓްރީގެ މުވައްޒަފުން ލޭ ހަދިޔާކުރަން ފެށި ކޭމްޕުގެ ހުޅުވުމުގެ ރަސްމިއްޔާތުގައި ވާހަކަ ދައްކަވަމުން އަމީން ވިދާޅުވީ ލޭ ހަދިޔާކުރުމަކީ އެއްވެސް މައްސަލައެއް ނޫން ކަމަށެވެ.
"އަހަރަކު ހަތަރު ފަހަރު މަދުވެގެން ލޭ ދެވިދާނެ،" މިނިސްޓަރު ވިދާޅުވި އެވެ.
އޭނާ ވިދާޅުވި ގޮތުގައި ލޭ ހަދިޔާ ކުރުމަކީ ކޮންމެ މީހަކު އަމިއްލައަށް އަޒުމް ކަނޑައަޅައިގެން ކުރަންވީ ކަމެއް ގޮތުގައި ދުށުން ވެސް މުހިންމެވެ. އަދި މިހާރު ވެސް ގަވާއިދުން ލޭ ހަދިޔާކުރާ ދިވެހިން އުޅޭކަން ފާހަގަކުރަައްވައި، އެ މީިހުންނަށް ޝުކުރު އަދާކުރެއްވި އެވެ.
އަމީން ވިދާޅުވީ ރާއްޖޭގައި އުޅޭ ތެލަސީމިއާ ކުދިންނަށް ބޭނުންވާ ލޭ ހަދިޔާކުރަން ހުރިހާ ރައްޔިތުން ވެސް މަސައްކަތްކުރަން ޖެހޭނެ ކަމަށެވެ. އަދި ލޭ ހަދިޔާކުރުމަކީ މީހެއްގެ ފުރާނަ ސަލާމަތް ކުރުމަށްޓަކައި ކުރެވޭނެ އެންމެ ބޮޑު އެއް ސަދަގާތް ކަމަށް ވެސް ވިދާޅުވި އެވެ.
"ލޭ ހަދިޔާ ކުރުމަކީ އިންސާނިއްޔަތަށް ކުރެވޭނެ އެންމެ ބޮޑު އެހީތެރިކަން. އަޅުގަނޑުމެންނަށް މީހުންގެ ފުރާނަ ސަލާމަތް ކޮށްދިނުމަށް ވެވޭނެ އެހީތެރިކަމަކީ، އެންމެ ބޮޑު ސަދަގާތަކީ، ލޭ ހަދިޔާ ކުރުން،" އަމީން ވިދާޅުވި އެވެ.
މޯލްޑިވްސް ބްލަޑް ސާވިސަސް (އެމްބީއެސް) އާ ގުޅިގެން ހެލްތު މިނިސްޓްރީން ކުރިއަށް ގެންދާ މިއީ މިފަދަ ފުރަތަމަ ކޭމްޕެވެ. އެ ކޭމްޕް ކުރިއަށް ގެންދަން މިނިސްޓްރީން ނިންމީ، ލޭ ހަދިޔާ ކުރުމުގައި ހެލްތު މިނިސްޓްރީން ނަމޫނާ މިސާލެއް ދައްކަން ކަމަށް އަމީން ވިދާޅުވި އެވެ.
މި ކޭމްޕު ހުޅުވުމަށް ފަހު، އެންމެ ފުރަތަމަ ލޭ ހަދިޔާކުރެއްވީ ހެލްތު މިނިސްޓަރެވެ.
ހެލްތު މިނިސްޓްރީގެ މުވައްޒަފުން ލޭ ހަދިޔާކުރާ ކޭމްޕުގައި އެމްބީއެސްގެ ޑައިރެކްޓަރު ނަޔާޒު ވާހަކަދައްކަވަނީ -- ފޮޓޯ: ހުސެން ވަހީދު/މިހާރު
މި ރަސްމިއްޔާތުގައި އެމްބީއެސްގެ ޑައިރެކްޓަރު ނަޔާޒު އަހުމަދު ވިދާޅުވީ ތެލަސީމިއާ ކުދިންނަށް ހަފްތާއަކަށް 160 ޕައިންޓު ލޭ ބޭނުންވާ ކަމަށެވެ. އަދި މަހަކަށް 440 ޕައިންޓުގެ ލޭ ބޭނުންވާ އިރު އެކަށީގެންވާ ވަރަށް އެ ތަނުގައި ލޭ ނެތް ކަމަށް ވެސް އޭނާ ވިދާޅުވި އެވެ.
"އަޅުގަނޑުމެންނަށް ލޭ ބޮޑަށް ލިބެމުން ދަނީ ކޮންމެވެސް ތަނަކުން ބްލަޑް ކޭމްޕެއް ބޭއްވުމުން. އަދި ކޮންމެ ވެސް ވަރަކަށް ވޮލަންޓިއަރުން ވެސް މިކަން ކުރިއަށްގެންދޭ،" ނަޔާޒު ވިދާޅުވި އެވެ.
އޭނާ ވިދާޅުވީ މިވަގުތު އެމްބީއެސްގައި ހުރީ، ބޭނުންވާ ނިސްބަތަށް ބަލާ ނަމަ، 33 ޕަސެންޓު ލޭ ކަމަށެެވެ. އެތަނުގެ އަމާޒަކީ ދުނިޔޭގެ ސިއްހަތު ޖަމިއްޔާއިން ކަނޑައަޅައިފައިވާ ގޮތަށް 2020 ވަނަ އަހަރުގެ ނިޔަލަށް އެ ކެޕޭސިޓީ 100 ޕަސެންޓަށް އިތުރު ކުރުން ކަމަށް ވިދާޅުވި އެވެ.
"މިކަން ހައްލުކުރަން ހުރިހާ ރައްޔިތުންގެ އެހީތެރިކަން ބޭނުންވޭ،" އޭނާ ވިދާޅުވި އެވެ.
ތެލަސީމިއާ ކުދިންނަށް ބޭނުންވާ ފަރުވާ އެކުދިން އުޅޭ ރަށަކުން ފޯރުކޮށްދިނުމަކީ އާ ސަރުކާރުގެ ވައުދެކެވެ. އެގޮތުން އެ ވަސީލަތްތައް ފަސޭހައިން ލިބޭނެ ނިޒާމެއް މިދިޔަ މަހު ހެލްތު މިނިސްޓްރީން ވަނީ ހަމަޖައްސައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ބަވަނަ ދުނިޔެ
23 January 2019
ދައްކާ ވާހަކައާއި ކުރާ އަމަލުގައި ބުރަދަން ހުންނަ މީހެއް އަމީންއަކީ.." ދިވެހިންނަށް ރަނގަޅު ބަދަލު ފެނިގެންދާނެ އިރާދަކުރެއްވިއްޔާ
ހެލްތު ވޯކަރު މުނީރު
23 January 2019
އަމީންގެ ރަނގަޅު ކަމަކީ ވަޒީރުކަމަކީ ތިމާއަށް ލިބިފައި އޮތް އަގުބޮޑު މުދާގަނޑެއް ކަމުގައި ނުބަލާ އެއީ ރައްޔިތުންގެ ހައްގުގައި އުފުއްލަވަންޖެހޭ ބޮޑު ބިޔަ ޒިންމާއެއްކަމަށް ބައްލަވައިގެން މި ކަންތައް ކޮށްދޭތީ. އެހެންވީމަ ކަމަށް މި ބަލަނީ އޭނައަށް ނަތީޖާވެސް ނެރެވެނީ. އެކަމަކު ހަމަ ހިތައްއަރާ، މަނިކުފާނުގެ ހުކުުދުވަހާ ހޮނިހިރުދުވަހުވެސް ތިޔަ މީޓިންތައް ޝެޑިއުލްކޮށްގެން ހެލްތު ހިންގަނީ، އަޅެ މަނިކުފާނުގެ ގޭތެރެއިންވެސް ހާދަ ސަޕޯޓެއް ލިބޭތީވެއޭ
ދަންނަކަލޯ
23 January 2019
އަމީންއަކީ ހަމަ ނަމޫނާ މިނިސްޓަރެއް! ކުރިއަށް ހެލްތު!
ވަން ލަވް
23 January 2019
މިހާ ހޭލުންތެރި މީހުން އުޅޭ ޒަމާނަކާ ބަލާފަ އަދިވެސް ފެނޭ ލޭ އަޅާކުދިން ހޯދާތަން. ލޭ ހޯދަން އެހާ ދަތި ތަނެއްގަ އެކުދިންނަށް ކިހާ ބޮޑު ދެރައެއް ދެވޭ.
ގުރައިސާ އަލީ
23 January 2019
މިއީ ނޫންތޯ ވެރިން އުޅެންޖެހޭ ގޮތަކީ! ކޮންމެ ދުވަހަކު އޮފީހަށް ވަޑައިގަަންނަވާނީ އާންމު މީހާ ހެން ސައިކަލެއްގައި..، ބޮޑީގާޑެއް ނުގެންގުޅޭނެ،. ކޮންމެ މީހަކަށްވެސް އެެއް މޭޒެއްގައި އިށީދެ ވާހަކަ ދައްކާލުމުގެ ފުރުސަތު އޮންނާނެ... ބުރޯ ބުނަން، ހަމަ ފައްކާ ރައްޔިތުންގެ ވަޒީރެއް!
ރަމީޒާ، ހިންނަވަރު
23 January 2019
[މީހުންގެ ފުރާނަ ސަލާމަތްކުރުމަށް ކުރެވޭނެ އެންމެ ބޮޑު ސަދަގާތަކީ ލޭ ހަދިޔާކުރުން.] ވަރަށް ރަނގަޅު ވާހަކައެއް މިނިސްޓަރު ތިޔަ ވިދާޅުވީ. މިނިސްޓަރު މި ގޮތަށް ކުރައްވާ ތަގުރީރުތަކުގައި ވަރަށް ބުރަދަން ހުރޭ< ކުރީ ދުވަހެއްގައި އަދި ވިދާޅުވި ޓެކްސީ ހިދުމަތް ކުރާ މީހުންވެސް އެއީ ގައުމީ މަސައްކަތެއްކަމުގައި ބަލައިގެން ކުރާށޭ. އެއީވެސް ވަރަށް ރަނގަޅު ވާޙަކައެއް. އަޅުގަނޑުމެން މި ގޮތަށް މަސައްކަތް ކޮށްގެން ނޫނީ ގައުމެއް ކުރިއެއް ނޭރުވޭނެ.
ފަޒްނާ
23 January 2019
އަޅުގަނޑުމެންގެ ސިއްހީ ވަޒީރަކީ އަބަދުވެސް ބަހަށް ވުރެ ކުރީގައި އެބޭފުޅާގެ އަމަލު ބަހައްޓަވާ ބޭފުޅެއް.. މިފަދަ މީހަކާ ހަވާލުކުރެވޭ ޒިންމާ އޮންނާނީ ވަރަށް ވެސް ފުރިހަމައަށް އަދާކޮށްދީފައި.. ދުއާއަކީ މަނިކުފާނުގެ މަސައްކަތުގައި މާތް ﷲ ބަރަކާތް ލެއްވުން..
ކީކޭބުނާނީ
23 January 2019
އަލަށްދޯ؟! ތިޔަބުނާ ތަނަކުން ލޭހަދިޔާކުރާ ފަރާތްތަކުގެ އަގުވަޒަންކުރި ދުވަސްތައް މާޒީވެ ގޮސްފި. ބުނެލަން ބޭނުންވަނީ ލޭހަދިޔާކުރާމީހުނަށް ހަނދާނީ ލިޔުމެއް ދިނަސް ދޭންވީކީ ހަމައެކަނި ތެލެސީމިޔާ ސެންޓަރށް ލޭހަދިޔާކުރާ މީހުންނަކަށް އެކަންޏެއްނޫނޭ. ކަމެއްކުރަން ބޭނުމިއްޔާ އައިޖީއެމްއެޗް، އޭޑީކޭ، ތެލެސީމިޔާ ސެންޓަރ، އަދި ރާއްޖެތެރޭގެ އެކިތަންތަނަށް ލޭހަދިޔާކުރި ފަރާތްތައްވެސް ހޯދާ އެފަރާތްތަކުގެ އަގު ވަޒަންކޮށްބަލާށޭ؟ ކަޑަވީމަ ކަޑައޭ މިބުނަނީ.
ގްރީން
23 January 2019
ކުރިން ތިޔަމަސައްކަތުގާ އުޅުނު ވަަރަށް ގިނަމީހުން މިހާރު ލޭހަދިޔާކުރުން ހުއްޓާލައިފި. ސަބަބުތައް އެންމެ ރަނގަޅަށް އެނގޭނީ ތިޔަ މުއައްސަސާގެ ބޭބޭފުޅުންނަށް. ދުވަހުން ދުވަހަށް އެކަމުގެ ތެރެއަށް ވަންނަ މީހުން މަދުވަނީ ކީތްވެތޯ ވިސްނާލަބަލަ. ކުރިން އެމީހުންގެ އަގު ވަޒަންކުރޭ. އަހަރަކު އެއްފަހަރު ބޮޑު އިވެންޓެއްބާއްވާ. ހަނދާނީ ލިޔުމާ ސެޓްފިކެޓާ އެވޯޑާއެއްޗެތި ދޭ. ލޭގެ އަގުނުދިނަސް އެބައެއްގެ އަގުވަޒަންކުރުން ރަނގަޅުވާނެ.
ފުންއަސަރު
23 January 2019
ތިޔަ ފެއްޓެވި ފެއްޓެވުން ގޯހެއްނޫން. ހަމަ ވަރަށް ރަނގަޅު މިސާލެއް ދައްކަވަމުން ތިޔަ ގެންދަވަނީ. އެކަމަކު ވިސްނާލަން ޖެހޭނެ ހަގީގަތަކީ އަހަރަކު ހަތަރު ފަހަރު ލޭ ހަދިޔާކުރައްވާއިރު، އެލޭހަދިޔާކުރައްވާ ބޭބޭފުޅުންނަށް ފަސޭހަވާނޭހެން ކަންކަން ހައްލުވެފާ ނެތުން. އަގުވަޒަންނުކުރުން. އަހަރަކު ދެފަހަރު ނޫނީ ތިންފަހަރު ނޫނީ ހަތަރު ފަހަރު ލޭހަދިޔާކުރެއްވި މީހުންހޯދާ އެފަރާތްތަކަށް ހަނދާނީ ލިޔުން ގަނޑެއްވަރުވެސް މިހާރު ނުދިނުން. ލޭގެ އަގުނުދިނަސް މިވަރުވާނެ