އިސްލާމްއާބާދު (ފެބްރުއަރީ 28) - އިންޑިއާގެ ހަނގުރާމަ މަތީ ދެ ބޯޓު ވައްޓާލުމަށް ފަހު ޕާކިސްތާނުން ހައްޔަރު ކުރި ޕައިލެޓުގެ މިޝަންއާ ގުޅޭ ގޮތުން އެތައް ސުވާލެއް ކުރި ނަމަވެސް އޭނާ ޖަވާބެއް ނުދިނެވެ.
މިގް-21 ގެ މަރުކާގެ ހަނގުރާމަ މަތީ ބޯޓު ދުއްވި އިންޑިއާގެ ޕައިލެޓް، ވިންގް ކޮމާންޑަރު އަބިނާދަންއާ މެދު ކަންތައް ކުރަމުންދަނީ "އަސްކަރީ އުސޫލުން" ކަމަށް ޕާކިސްތާނުން ވަނީ ބުނެފަ އެވެ. ޕައިލެޓާ ސުވާލު ކުރަމުންދާ ވީޑިއޯ އިން ޕާކިސްތާނުގެ އިންފޮމޭޝަން މިނިސްޓްރީން އާއްމު ކުރި ނަމަވެސް ފަހުން ވަނީ އެ ވީޑިއޯ ޑިލީޓްކޮށްލައިފަ އެވެ. އެ ވީޑިއޯ އިން ފެންނަ ގޮތުގައި ޕައިލެޓް ކަނުބަނދެފައި ހުރި އިރު އޭނާގެ މޫނުގައި ގިނަ އަދަދަކަށް ލޭ ހުއްޓެވެ. ދެ އަތް ހުރީ ފުރަގަހަށްލައި ބަނދެފަ އެވެ. އޭނާ ހުރީ އިންޑިއާގެ ވައިގެ ސިފައިންގެ ޔުނިފޯމުގަ އެވެ.
ޕާކިސްތާން ސިފައިން ސުވާލު ކުރުމުން އިންޑިއާގެ ޕައިލެޓް ވަނީ އޭނާގެ ނަމާއި ރޭންކް އަދި ސީރިއަލް ނަމްބަރު ބުނެދީފަ އެވެ. ނަމަވެސް އޭނާގެ މިޝަންއާ ބެހޭ ގޮތުން ސުވާލު ކުރުމުން ވަނީ ޖަވާބު ދޭން ދެކޮޅު ހަދައިފަ އެވެ.
ޕައިލެޓާ މެދު އިހާނެތިކޮށް ކަންތައް ކުރާ ވީޑިއޯއެއް އާއްމު ކުރުމުން ޕާކިސްތާނަށް ފާޑުކިޔުންތައް އަމާޒުވުމުން ވަނީ ދެވަނަ ވީޑިއޯއެއް އާއްމުކޮށްފަ އެވެ. އެ ވީޑިއޯ އިން ފެންނަ ގޮތުގައި ޕައިލެޓް އިނީ ކޮޓަރިއެއްގައި ސައި ބޯށެވެ. އޭރު އޭނާގެ މޫނު ވެސް ވަނީ ސާފުކޮށްފަ އެވެ.
"މި ސައި ވަރަށް މީރު،" އިނގިރޭސި ބަހުން ވާހަކަ ދައްކަމުން ޕައިލެޓް ބުންޏެވެ.
އޭނާ އަކީ މީހަކާ އިނދެގެން އުޅޭ މީހެއް ކަމަށާއި ޕާކިސްތާން ސިފައިން ކަންތައް ކުރަމުން ދަނީ ރަނގަޅަށް ކަމަށް ބުންޏެވެ. ނަމަވެސް އިތުރު ސުވާލަކަށް ޖަވާބު ދޭން އަނެއްކާ ވެސް ދެކޮޅު ހެދި އެވެ.
ކަޝްމީރުގައި ޕާކިސްތާނުން ކޮންޓްރޯލް ކުރާ ސަރަހައްދުގައި ޕައިލެޓަށް ބަޔަކު އަނިޔާ ކުރާ މަންޒަރުގެ ވީޑިއޯއެއް ވެސް ކުރިން ވަނީ ދައްކައިފަ އެވެ. އޭރު ޕައިލެޓާ ހަމައަށް ޕާކިސްތާން ސިފައިން ނުދެ އެވެ.
އިންޑިއާ އިން ވަނީ ޕައިލެޓް ވަގުތުން ދޫކޮށްލުމަށް ގޮވާލައިފަ އެވެ. އަދި ޕައިލެޓާ މެދު ކަންތައް ކުރަމުންދަނީ އިންޓަނޭޝަނަލް ހިއުމެނިޓޭރިއަމް ލޯ އާއި ޖެނީވާ ކޮންވެންޝަނާ ޚިލާފަށް ކަމަށް އިންޑިއާ އިން ވަނީ ބުނެފަ އެވެ.
