ބޮލީވުޑްގެ ޚަބަރުތައް ކުރުކޮށް

ސައިފް އަލީ ހާނާއި ފާތިމާ ސަނާ ޝެއިހް އަދި އަލީ ފަޒަލް އެކީގައި ފެނިގެންދާ ހޮރޯ ކޮމެޑީ "ބޫތު ޕޮލިސް" ގެ ޝޫޓިން އަންނަ އޮގަސްޓް މަހު ފަށާ ގޮތަށް ނިންމައިފި އެވެ.

މިއީ ފޮކްސް ސްޓާ ސްޓޫޑިއޯ އިން ޕްރޮޑިއުސްކޮށް، ޕަވަން ކިރްޕަލާނީ ޑައިރެކްޓް ކުރާ ފިލްމެކެވެ. "ބޫތު ޕޮލިސް" ގެ ޝޫޓިން އޮގަސްޓްގައި ފެށި ނަމަވެސް 3ޑީ ފޯމެޓްގައި ގެނެސް ދޭން ނިންމާފައިވާ ފިލްމު ރިލީޒް ކުރާނެ ތާރީހެއް އަދި އިއުލާނެއް ނުކުރެ އެވެ.

ސައިފް މި ވަގުތު އަޖޭ ދޭވްގަންއާ އެކު "ތާނަޖީ: ދި އަންސަންގް ވޮރިއާ" ގެ މަސައްކަތް ކުރަމުން އަންނަ އިރު، އޭނާ ޕްރޮޑިއުސްކޮށް ބަތަލުގެ ރޯލް ކުޅޭ ފިލްމު "ޖަވާނީ ޖާނެމަން" ގެ ޝޫޓިން ޖޫން މަހު ލަންޑަނުގައި ފަށަން ވަނީ ތާވަލުކޮށްފަ އެވެ.

ފާތިމާ ދާދި ފަހުން އަނޫރާގް ބާސޫގެ އެންތޮލޮޖީ ފިލްމުގެ ޝޫޓިން ނިންމާލާފައިވާ އިރު، އަލީގެ ކުރިއަށް އޮތް ފިލްމަކީ "ޕްރަސްތާނަމް" އެވެ.

"ސްޓޫޑަންޓް 2" ގެ ޕްރޮމޯޝަން ފަށައިފި

އަންނަ މަހު ކަރަން ޖޯހަރުގެ ދަރުމާ ޕްރޮޑަކްޝަނުން ގެނެސްދޭ ފިލްމު "ސްޓޫޑަންޓް އޮފް ދި އިޔާ 2" ގެ ޕްރޮމޯޝަންތައް ފަށައިފި އެވެ.

ކަރަން ވަނީ ފިލްމުގެ ޕޯސްޓަރުތަކެއް ވެސް ޓްވިޓާގައި ހިއްސާކޮށް ކުރިއަށް އޮތް ދުވަސްތަކުގައި ފިލްމާ ބެހޭ ގިނަ ކަންކަން ހިއްސާ ކުރަމުން ދާނެ ކަމަށް ބުނެފަ އެވެ. ފިލްމުގެ ޓްރެއިލާ ވެސް މިއަދު ދައްކައިލާނެ އެވެ.

"ސްޓޫޑަންޓް އޮފް ދި އިޔާ 2" އަކީ ކަރަން ޑައިރެކްޓްކޮށް 2012 ގައި ގެނެސް ދިން "ސްޓޫޑަންޓް އޮފް ދި އިޔާ" ސީރީޒްގެ ދެވަނަ ފިލްމެވެ. މި ފަހަރު މުޅިން ތަފާތު ކާސްޓަކާ އެކު ފިލްމު ޑައިރެކްޓްކޮށްފައި ވަނީ "އައި ހޭޓް ލަވް ސްޓޯރީޒް" ގެ ޑައިރެކްޓަރު ޕުނިތު މަލްއުތުރާ އެވެ. ފިލްމުގެ ތަރިންނަކީ ޓައިގާ ޝްރޮފާ އެކު އަލަށް ތައާރަފުވާ އަނަންޔާ ޕާންޑޭ އާއި ތާރާ ސުތާރިއާ އެވެ.

ފިލްމު ރިލީޒް ކުރަން ނިންމާފައި ވަނީ އަންނަ މަހުގެ 10 ގަ އެވެ.

އަމީތާބާއި އިމްރާންގެ ފިލްމު އަންނަ އަހަރު

އަމީތާބް ބައްޗަން އާއި އިމްރާން ހާޝިމީ އެކީގައި ފެނިގެންދާ ފުރަތަމަ ފިލްމު އަންނަ އަހަރު ގެނެސް ދޭން ނިންމައިފި އެވެ.

ކޮމެޑީ އެތައް ފިލްމެއްގެ ސްކްރީންޕްލޭ ލިޔެ، ބައެއް ފިލްމުތައް ޑައިރެކްޓް ވެސް ކޮށްފައިވާ ރޫމީ ޖެފްރީ ޑައިރެކްޓް ކުރާ މި ފިލްމުގެ ނަން އަދި އިއުލާން ނުކުރި ނަމަވެސް ފިލްމު ސިނަމާތަކަށް ގެންނާނެ ތާރީހަކަށް ހަމަޖައްސާފައި ވަނީ ފެބްރުއަރީ، 21، 2020 އެވެ.

މި މިސްޓްރީ ތުރިލާގެ ޝޫޓިން އަންނަ މަހު ފަށަން ވަނީ ނިންމައިފަ އެވެ. އަމީތާބް އެންމެ ފަހުން ފެނިފައި ވަނީ މިދިޔަ މަހު ރިލީޒް ކުރާ "ބަދުލާ" އިންނެވެ. އަދި އިމްރާންގެ އެންމެ ފަހުގެ ފިލްމަކީ ޖެނުއަރީ މަހު ރިލީޒް ކުރި "ވާއި ޗީޓް އިންޑިއާ؟ އެވެ.

ރޫމީ ވަނީ 2008 ގައި އަމީތާބާއި ސަލްމާން ހާނާއި ޕްރިޔަންކާ ޗޯޕްޅާއާ އެކު "ގޯޑް ތުސީ ގްރޭޓް ހޯ" ކިޔާ ފިލްމެއް ވެސް ގެނެސް ދީފަ އެވެ.

"83" ރިލީޒް ކުރާ ތާރީހު އިއުލާންކޮށްފި

އިންޑިއާ އިން 1983 ގެ ކްރިކެޓް ވޯލްޑް ކަޕް ކާމިޔާބު ކުރި ހާދިސާ އަށް ބިނާކޮށް ކަބީރު ހާން ޑައިރެކްޓް ކުރާ ފިލްމު "83" ރިލީޒް ކުރާ ތާރީހަކަށް އަންނަ އަހަރުގެ އެޕްރީލް މަހުގެ 10 ހަމަޖައްސައިފި އެވެ.

މި ފިލްމުގެ ޝޫޓިން އަންނަ މަހު އިނގިރޭސިވިލާތުގައި ފަށަން ނިންމާފައިވާ އިރު، ފިލްމުގެ މައިގަނޑު ކާސްޓް ވެސް މިހާރު އެއްކޮށް ފައިނަލްކޮށްފަ އެވެ. ރަންވީރު ސިންގް "83" ގައި ފެނިގެން ދާނީ 83 ގެ މުބާރާތް ކާމިޔާބު ކުރި އިރު ޓީމްގެ ކެޕްޓަނެއްގެ ގޮތުގައި ހުރި ކަޕިލް ދޭވްގެ ރޯލުންނެވެ.

އޭނާއާ އެކު މި ފިލްމުން ގިނަ އެކްޓަރުންތަކެއް ފެނިގެން ދާނެ އެވެ. އޭގެ ތެރޭގައި ސާގިބް ސަލީމް، ތާހިރު ރާޖް ބާސިން، އައްމީ ވާކް، ޗިރާގް ޕަޓިލް، ޖީވާ، އަދިނާތު ކޮތާރޭ، އާރް ބަދުރީ، ޑިންކަރު ޝަރުމާ، ހާޑީ ސަންދޫ، ވިޖޭ ވަރުމާ، ދައިރިއާ ކަރްވާ އަދި ޖަތިން ސަރްނާ ހިމެނެ އެވެ. މިއިން ކޮންމެ އެކްޓަރަކު ފެންނާނީ ޓީމްގެ ކުޅުންތެރިއެއްގެ ރޯލުންނެވެ.

އަދި ޕަންކަޖް ތުރިޕަތީ ފެނިގެން ދާނީ ޓީމްގެ ކޯޗްގެ ރޯލުންނެވެ. "83" ގެ ފަސްޓްލުކް ވެސް މިހާރު ވަނީ ފުލް ޓީމާ އެކު ދައްކާލައިފަ އެވެ.