ހުޅުމާލޭ މަތިން ގޮސް ސީޕްލޭނެއް ޖައްސަނީ: ސަރަހައްދު ބޮޑުކުރުމުން ހުޅުމާލޭ މަތިން ފްލައިޓްތައް ދަތުރެއް ނުކުރާނެ
14 ޖުލައި 2019 - 15:38
35 comments
ހުޅުމާލެ އާއި ހުޅުލެއާ ދެމެދު ދަތުރުކުރަން ކުރިން ބޭނުންކުރި މަގު، މޫދުގެ ބަޔަކަށް ހަދައި، ސީޕްލޭނަށް ހާއްސަ ސަރަހައްދު ބޮޑުކުރުމުގެ މަސައްކަތް ފަށައިފި އެވެ.
އެމްއޭސީއެލްގެ ކޯޕަރޭޓް ކޮމިއުނިކޭޝަން ޖެނެރަލް މެނޭޖަރު ހަސަން އަރީފު "މިހާރު"އަށް ވިދާޅުވީ އާ ސީޕްލޭން ޓާމިނަލް ނިމެންވާ އިރަށް ސީޕްލޭން ޖައްސާ ސަރަހައްދު ފުޅާކޮށް އަދި ބޮޑުކުރުމުގެ މަސައްކަތް ވެސް ނިމެނޭނެ ކަމަށެވެ. އަދި އޭރުން ސީޕްލޭން ޖައްސާށާއި، ފުރަން ބޭނުންކުރާ ސަރަހައްދު ތަނަވަސްވާނެ ކަމަށް ވެސް އޭނާ ވިދާޅުވި އެވެ.
"ސަލާމަތީ ގޮތުން އިތުރު ފުރިހަމަކަމެއް ލިބޭނެ،" ހަސަން ވިދާޅުވި އެވެ.
ސީޕްލޭނަށް މޫދު ސަރަހައްދު ބޮޑުކުރުމުން ހުޅުމާލޭ މަތިން ބޯޓު ފަހަރު ދަތުރުކުރުން ވެސް ނިމުމަކަށް އަންނާނެ އެވެ. މިހާރު ބައެއް ފަހަރަށް ސީޕްލޭންތައް ޖައްސަނީ ހުޅުމާލޭ މަތިން ގޮހެވެ.
އެ މަސައްކަތްތައް ނިމުމުން ސީޕްލޭންތައް ދެން އަންނާނީ ހުޅުމާލޭގެ އިރުމަތީ ފަރާތު [ފަރުމަތިން]،" ހަސަން ވިދާޅުވި އެވެ.
އޭނާ ވިދާޅުވި ގޮތުގައި ސީޕްލޭން ޖައްސާ ސަރަހައްދު ބޮޑުކުރުމުން ސީޕްލޭން ޖައްސާ ސަރަހައްދު އޮންނާނީ އާ ހައިވޭއާ ހަމައަށެވެ.
ސީޕްލޭން ޖައްސަން ކުރީގެ ލިންކް ރޯޑުގެ ފަސްތައް ނަގައި ސަރަހައްދު ބޮޑުކުރަނީ: ތިން މަސްދުވަހުގެ ތެރޭގައި މަސައްކަތް ނިމޭނެ --ފޮޓޯ:ހުސައިން ވަހީދު/މިހާރު
ސީޕްލޭން ޖައްސާ ސަރަހައްދު ފުޅާކުރުމުގެ މަސައްކަތް ކުރަމުން އަންނަނީ ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިންނެވެ.
އެޗުޑީސީގެ މެނޭޖިން ޑިރެކްޓަރު ސުހައިލް އަހުމަދު ވިދާޅުވީ އެއީ އާ ލިންކް ރޯޑް މަޝްރޫއުގެ ބައެއް ކަމަށެވެ.
"ތިން މަސްދުވަހުގެ ތެރޭގައި އެ ސަރަަހައްދު ކޮނުމުގެ މަސައްކަތް ނިންމާ ގޮތަށް އޮތީ،" ސުހައިލް ވިދާޅުވި އެވެ.
އާ ބްރިޖާ އެކު ހެދި ލިންކް ރޯޑް ހެދީ 24 މިލިއަން ޑޮލަރު (370 މިލިއަން ރުފިޔާ) އަށް ޗައިނާގެ ހުނާން އިންޖިނިއަރިންއާ ހަވާލުކޮށްގެންނެވެ.
އާ ސީޕްލޭން ޓާމިނަލަކީ އެމްއޭސީއެލް އިން 40 މިލިއަން ޑޮލަރު (616 މިލިއަން ރުފިޔާ) ހޭދަކޮށްގެން ތަރައްގީ ކުރަމުން އަންނަ ތަނެކެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އާދަން
16 July 2019
ހަމަ ސުރުޚީ ކިޔާލާފަ ލިޔެންފަށަނީ. ކޮންނަ މަަގަކީ ކުރިނ ހުޅުމާލެއިން ހުޅުލެއަށް ދާން އޮތްމަގު. ޚާއްސަކޮށް ސީޕްލޭން އޮޕަރޭޝަން އޮންނަ ހިސާބުގަނޑަށްދާން އޮންނަ މަގު. އެތަން ކޮނެ ނިމުނީމަ މިހާރު އޮތް ހައިވޭގެ ނަރުދާ ޖަހާފަ ހުރި ހިސާބަށް އޮންނާނީ މޫދު.
ސުރުހީ
16 July 2019
ކޮމެންޓުތައް ކިޔާލީމަ ހީވަނީ ހަމައެކަނި ސުރުހީކިޔާލާފަ ހިތުހުރި އެއްޗެއް ގޮވަންފަށަންވީހެން!!
ތަނެއްދޮރެއް
16 July 2019
ކޮމެންޓްކޮއްފަހުރިގިނަމީހުން ކޮމެންޓްކޮއްފައެހުރީ މާބޮޑުތަނެއްދޮރެއްނޭންގިކަންފާހަގަކޮއްލެވޭ އެތަނުން ކޮނެފަނަގަނީފަހުންހެދިމަގެއްނޫން އެއީކުރީގަ ހުޅުލެޔައްދާންއޮންނަ ހަނިމަގު ވާނުވާނޭންގުނަކަސްބޮޑުވަރު
މައްލަ
15 July 2019
އެހެން މީހުން މޫދު ހިއްކައިގެން މަގާ ބްރިޖާ އެހެން ތަންތަން ހަދާއިރު އަނެއް ބަޔަކު މަގު ދިޔަކޮށްގެން މޫދު ހަދަނީ. ފުރަތަމަ ފަހަރަށް މަގެއް މޫދަށް ހެދީމަ މި ސަރުކާރަށް އާ ކަމެއް ކޮށްލެވުނީ.
ޒުންނޫރާން
15 July 2019
ތިޔަބުނާތަން އެއޮތީ މަހުޖަނުންނަށް ވުމަށް ބަޔަކަށް މަގުފަހިކޮށް ދެއްވާފަ ނޫންތޯ؟
ބުރިގިޓާ
15 July 2019
އަޅުގަނޑެއް ނުދަނެހުރީމް އަައްޑޫ އެއަރ ޕޯޓް ތަރައްގީ ކުރެވުނު ކަމަކަށް.އެއީ ރައީސް މައުމޫނު އެމްމެ ފުރަތަ އޭތި އިންޓަނޭޝަނަލް ކޮއްފަ ބުނީ މިތަނަށް ޖައްސާނީ ރަންބިސް އަޅާ ކުކުޅު ކަަމަށް.އަދި މަ ނުދެކެން އޭގެ އެއްޗެއްވެސް
ރެސްޓްއޮފްރާއްޖެ
16 July 2019
އައްޑޫއަށް ކިތައްމެ ކަމެއްކޮށްދިނަސް ނުފެންނާނެ.
ބޭރު
15 July 2019
އެކަމަކު ދެން 10 ވަރަކަށް ފޫޓްގެ ފުޅާ މިނުގެ ޖާގައެއް ހޯދަން ރަގަޅު ފެންވަރަކަށް ހަދާފައި އޮތް މަގެއް ސުންނާފަތި ކޮށްލާކަށް ނުވާނެއެއް ނޫންތޯއެވެ.
ފޫޓް
17 July 2019
އެމަގު ކޮނެލީމަ އެބޮޑުވަނީ 10 ފޫޓްތަ؟
ދެރަވ
15 July 2019
އެއްވެސް ޕްލޭނެއްނެތް. އަދި ތިޔަތަން އަނެއްކާވެސް ހިއްކާނެ. މިހާރުވެސް ތިޔަ ލިންކް ރޯޑް އިންތިހާއަށް ހަނި. އަދި ހުޅުމާލެއާ ވީކޮޅުޚާއްސަކޮށް ހަނި. ތިޔަ ސީ ޕްލޭން އެހެންތާކަށް ބަދަލުކުރަންޖެހޭ. އަޞުލު ވެރިންގެ ނުބައިކަމުން ގައުމަށް ހުރިހާވެސް ގެއްލުމެއްލިބެނީ. އެނބޫދޫ ލެގޫންގައި ބޮޑު ބިޔަ ބައިނަލްއަޤުވާމީ އެއަރޕޯޓެއް އަޅާ މީހުން އާބާދުކުރިނަމަ އަބަދު މުންޑު ގައި ފޮތި އަޅާކަށް ނުޖެހޭނެ.
މީރުބަހުރު
15 July 2019
މިސާގަފަތް ހުއްޓޭނީ ކޮންދުވަހަކުންބާ؟ އެކަކު ތަރައްގީ ކުރާ ތަންތަން އަނެކަކު ނަގާ އުކާލަނީ ކޮންމެވެސް ނަމެއް ކިޔައިގެން ދައުލަތަށް ލިބޭ ގެއްލުން ވީހާވެސް ކުޑަކުރެވޭނެ ގޮތަކަށް މަޝްރޫއުތައް ރޭވުމަކީ ކޮންމެ ރައީސެއްގެވެސް ޒިންމާއެއް. މިކަން ތަކުރާރު ނުކުރެވޭނެ ވިސްނުމެއް ގެންގުޅެން ޖެހޭނެ.
މާލީ
15 July 2019
އާ ބްރިޖާ އެކު ހެދި ލިންކް ރޯޑް ހެދީ 24 މިލިއަން ޑޮލަރު (370 މިލިއަން ރުފިޔާ) އަށް ޗައިނާގެ ހުނާން އިންޖިނިއަރިންއާ ހަވާލުކޮށްގެންނެވެ. އާ ސީޕްލޭން ޓާމިނަލަކީ އެމްއޭސީއެލް އިން 40 މިލިއަން ޑޮލަރު (616 މިލިއަން ރުފިޔާ) ހޭދަކޮށްގެން ތަރައްގީ ކުރަމުން އަންނަ ތަނެކެވެ.