ހިރިޔާ ސްކޫލުގައި ޓީޗަރުންތަކެއް: ޓީޗަރުންގެ ކަންބޮޑުވުން އޮތީ އިންތިހާގައި-- ފޮޓޯ: ނިޝާން އަލީ\ މިހާރު
25 ޖުލައި 2019 - 13:43
99 comments
ސްކޫލްތަކުގެ ލީޑިން ޓީޗަރުންގެ މަގާމު ސިވިލް ސާވިސް ކޮމިޝަން (ސީއެސްސީ) އިން އުވައިލުމާ ގުޅިގެން އެ މަގާމުތަކުގައި ތިބި ޓީޗަރުން ކަންބޮޑުވުން ފާޅުކުރަން ފަށައިފި އެވެ.
އެ ކޮމިޝަނުން އާއްމުކުރި އުސޫލުގައި ބުނެފައި ވަނީ ލީޑިން ޓީޗަރުންގެ މަގާމު އުވައިލުވުމުން، އެ ޒިންމާތައް ދެން އަދާކުރާނީ އާންމު ޓީޗަރުން ކަމަށެވެ. އެ އުސޫލަށް މި މަހުގެ ހަތް ވަނަ ދުވަހުން ފެށިގެން އަމަލުކުރަން ފެށި ނަމަވެސް މިހާރު ލީޑިން ޓީޗަރުންގެ ގޮތުގައި ތިބި މީހުންގެ މަގާމު މި އަހަަރުގެ ނިޔަލަށް ދެމި އޮންނާނެ އެވެ.
ލީޑިން ޓީޗަރުންނަށް ޓެނުއަލްޝިޕްގެ ގޮތުގައި މަހަކު 1،000ރ. ގެ އެލަވަންސެއް ލިބެ އެވެ. އެ މަގާމު އުވައިލިޔަސް، ލީޑިން ޓީޗަރުންގެ ޒިންމާ އުފުލާ ޓީޗަރުންނަށް އެ އެލަވަންސް ދޭނެ އެވެ. ނަމަވެސް ހައިސިއްޔަތެއް ނެތި ޒިންމާ އުފުލަން ބޭނުން ނުވާ ކަމަށް، ކަންބޮޑުވުން ފާޅުކޮށް "މިހާރު" އާ ވާހަކަ ދެއްކި ޓީޗަރުން ބުންޏެވެ.
ތައުލީމީ ދާއިރާގައި ގިނަ އަހަރުތަކެއް ވަންދެން މަސައްކަތް ކޮށްފައިވާ ލީޑިން ޓީޗަރަކު އިއްޔެ ބުނީ، ތައުލީމީ ދާއިރާ މިހާރު ޓީޗަރުންނަށް ޖެހިފައި ވަނިކޮށް، އެގޮތަށް ނިންމާ ނިންމުންތަކުގެ ސަބަބުން މުޅި ދާއިރާ އަށް އަސަރުކުރާނެ ކަމަށެވެ. އެ މީހުންގެ ކަންބޮޑުވުމަކީ އެއީ ކަމަށާއި އެއްވެސް ހައިސިއްޔަތެއް ނެތި، ޒިންމާއެއް އަދާކުރަން ބޭނުން ނުވާ ކަމަށް ޓީޗަރަކު ބުންޏެވެ.
"ޓީޗަރެއްގެ މަގާމުގައި ހުރެ، ޑެޕިއުޓީ ޕްރިންސިޕަލަކަށް ލިބޭ މުސާރައެއް ލިބުނަސް އެ ޒިންމާތައް އަދާކުރާކަށް ބޭނުމެއް ނުވާނެ. މީގައި ހައިސިއްޔަތު މުހިއްމު ވަނީ. މުސާރައެއް ނޫން،" އޭނާ ބުންޏެވެ.
ލީޑިން ޓީޗަރުންގެ މަގާމު އުވައިލިޔަސް، އެ މީހުންގެ ޒިންމާ އަދާކުރާނެ މީހުން ހޯދަން ޖެހެނީ އުސޫލުގައިވާ ގޮތުން އެކަން އެ ސްކޫލެއްގައި އާންމުކޮށް އިއުލާން ކުރުމަށް ފަހު އެވެ. އެ ޒިންމާތައް ހަވާލުވާ މީހުން، ކިޔަވައިދިނުމުގައި ދެ އަހަރުގެ ތަޖުރިބާ ހުރުމަކީ ޝަރުތެކެވެ.
އިއުލާނު ކުރާއިރު އެކަމަށް ޝަރުތު ހަމަވާ ޓީޗަރަކު ކުރިމަތިނުލާ ނަމަ، ވަގުތީ ގޮތުން އެ ޒިންމާ ހަވާލުކުރާނެ މީހަކު ކަނޑައަޅަން ޖެހޭނެ އެވެ. ވަގުތީ ގޮތުން ޒިންމާ ހަވާލުކުރުމުގައި އެންމެ ފުރަތަމަ އިސްކަމެއް ދޭން ޖެހޭނީ، އުސޫލުގައި ބުނެފައިވާ ގޮތުން، އެ އިދާރާއެއްގައި ހިމެނޭ ލީޑިން ޓީޗަރެއްގެ ޝަރުތު ހަމަވާ މީހުންގެ ތެރެއިން އެންމެ މަތީ މަގާމުގައި ހުރި މީހެކެވެ. އެންމެ މަތީ މަގާމުގައި އެކަކަށް ވުރެ ގިނަ މީހުން ތިބި ނަމަ، ލީޑިން ޓީޗަރުންގެ ޒިންމާ ހަވާލުކުރާނެ ފަރާތެއް ކަނޑައަޅާނީ އެ ސްކޫލެއްގެ ޕްރިންސިޕަލްގެ މަގާމުގައި ހުންނަވާ ބޭފުޅެކެވެ.
އުސޫލުގައި އެހެން ބުނެފައި ވުމަކީ ވެސް ޓީޗަރުންގެ ކަންބޮޑުވުމެކެވެ.
އެހެން ޓީޗަރަކު ބުނީ ލީޑިން ޓީޗަރުންނަކީ ބިނާކުރުވަނިވި ފާޑުކިޔާ ބަޔަކަށް ވާއިރު، ޕްރިންސިޕަލުން ހިތްހަމަނުޖެހޭ ނަމަ އެ ކުރިއެރުންތަކެއް ނުލިބޭނެ ކަމަށެވެ. އެހެންވެ، އެއީ ހަމަޖެހޭ އުސޫލެއް ނޫން ކަމަށް ބުންޏެވެ.
އެ އުސޫލަށް އަމަލުކުރަން ފެށުމާ އެކު، ލީޑިން ޓީޗަރުންގެ މަގާމުގައި ތިބި މީހުން، އެ މުވައްޒަފަކު ކުރިން ހުރި މަގާމަކަށް ބަދަލުވާނެ އެވެ. އަދި އެ އިދާރާގެ އޮނިގަނޑުގައި ހުސް މަގާމެއް ނެތް ނަމަ، އެ މަގާމެއް އުފައްދައި ބަދަލު ކުރަންޖެހޭނެ ކަމަށް އުސޫލުގައި ވެ އެވެ.
ލީޑިން ޓީޗަރުގެ މަގާމުގައި ތިބި މީހުންގެ ތެރެއިން ވަކި ހާއްސަ ދާއިރާއެއް ނޭނގޭ މުވައްޒަފުން ބަދަލުކުރާނީ، ލީޑިން ޓީޗަރަކަށް ބަދަލުވުމުގެ ކުރިން ހުރީ ސެކަންޑްރީ ޓީޗަރު/ ސުޕަވައިޒަރު/ގްރެޖުއޭޓް ޓީޗަރު/ކޮލިފައިޑް ޓީޗަރު ފަދަ މަގާމުތަކުގައި ވާނަމަ އެ މަގާމުތަކަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ފެނޭ
27 July 2019
އެޑިއުކޭޝަންގެ ކޮލިޓީ ބަލަހައްޓާ ޔުނިޓް ކަމެއްނުކުރަންޔާ ވާގިތް މި ވަނީ. އެތާތިބި އެންމެން އެހެންތާކަށް ބަދަލު ކުރަން ފެނޭ.
މީނަ
27 July 2019
ލީޑިންގް ޓީޗަރުން މިބުނަނީ އެމީހުންގެ ހައިޞިއްޔަތޭ މުހިންމީ. އެހެންވީމާ މިމީހުން މަދަރުސާޔަށް މިދަނީ އެމީހުންގެ ބޮޑުކަން ދައްކަންތާ. ތިއީ މިހާރުވެސް ކުރަންޖެހިފައިއޮތް ކަމެއް. ގިނަ ސްކޫލްތަކުގެ ލީޑިންގް ޓީޗަރުންނަކީ އާދައިގެ ޓީޗަރުންނަށްވުރެ ފެންވަރު ދަށް ބައެއް. ކަމުގެ ހަގީގަތް ވަރަށް ރަނގަޅަަށް އެނގިގެން މިބުނަނީ. ގިނަ ލީޑިން ޓީޗަރުން ޒިންމާއިން ރެކެން ވަރަށް މަސައްކަތްކުރޭ.
ތެދު
26 July 2019
ތަނެއްގަ މީހަކު ނުވަނަސް, ކުލާހައްވަދެ ކިޔަވައިދޭ ލީޑިން ޓީޗަރުން ވަރަށް ގިނަ. ތިހެން ނުކިޔާ އެންމެނަށް, ކަން ނުކުރާ މީހުން ބަދަލު ކުރުމުގެ ބާރު މިހާރުވެސް ޕްރިންސިޕަލުންނަށް ދީފަ އޮންނާނެ. ބަދަލު ކުރޭ. ދެތިން ޓީޗަރުން ދުވާލަކު އެބްޒެންޓް ވާއިރު އެކަން ކަން ހަމަޖައްސަނީ ކޮންބައެއްބާ. ހިނގާ ކޮންމެ ހަރަކާތެއްގެ ޒިންމާ ނަގަނީ ކޮންބައެއް. ޓީޗަރަކަށް ތިބީމަ މާބޮލަށް ފަސޭހަވާނެ. އެއްމެން ތިބެންވީ ޓީޗަރުންނަށް, މާ ސަޅިވާނެ.
ޤާސިމް
27 July 2019
ވަރަށް ބޮޑު ތެދެއް. ސްކޫލުތަކުގަ އެންމެ ސިކުނޑިއަށް ބަރުވެފަ ތިބެން ޖެހެނި ލީޑިންގ ޓީޗަރުންނަށް. ހެނދުނު ހެނދުނާ އެހެން ހުރިހާ މުވައްޒަފުންނަށް ވުރެން ކުރިން ސްކޫލަށް ދަނީ އެދުވަހު ސަލާމުގަ ތިބެނި ކިތައް ޓީޗަރުންކަމެއް ނޭނގޭތީ ދަރިވަރުން ހާޒިރުވާން ވާއިރަށް ބަދަލުގަޑީގެ ކަންކަން ހަމަޖައްސަން! އެސެމްބްލީ ކަންކަން ހަމަޖައްސަން.
ދަދި
26 July 2019
ތީހަމަކުރަންވީ ކަމެއް މާލަސްވެއްޖެ ކޮންމެދުވަހަކު އެއްގަޑި ނަގާފަ ތިބެނީ ބޮޑުހެދިފަ! ބެލެނި ވެރިންނާ ބައްދަލުކުރަންޖެހެނީ، ޓީޗަރުންނާ ބެލެނިވެރިންނަށް ފޯނުކޮށްގެންނަން ޖެހެނީ ޓީޗަރުންނާ! ކަންކަން ރާވާފަ ބޮޑުގޮނޑީގަތިބެނީ! ސާބަސް ހަބޭސް
ނާމާން
26 July 2019
ކުލާސް ޓީޗަަރުންނަން މަސްއޫލިއްޔަތު ހަވާލުކޮށް އެއްވެސް އެއްޗެން ނުލިބޭ ގޮތަށް މަސައްކަތްތައް ކުރުވަން ލީޑިން ޓީޗަރުން ހަމަ އޯކޭ... ސާބަސް .... ހަމަ ބާރާއި ނުފޫޒު ބޭނުންވަނީ ... ކުލާސްތަކަށް ވަންނަން ޖެހިލުންވަނީ
އަށްޑޫ ކަތީބު
26 July 2019
ލީޑީން ޓީޗަރެކޭ ކިޔާފަ ތިޔަ ތިބި މީހުން ނެގި ޒިންމާއެއް މިހާތަނަކަށް އަހަރުމެންނަކަށް ނުފެނޭ. އަދި ނުވިތާކަށް ތިޔަ ބުނާ ލީޑިންޓީޗަރުން ކުރާކަމެއް ނުވެސް ފެނޭ. ކޮންމެ ކުލާހެއްގަ އުޅޭ ޓީޗަރުންނާ ބެލެނިވެރިން ހުރިހާ ޒިންމާއެއްމިހާރުވެސް ނަގަނީ. އަހަރުމެންގެ 3 ދަރިން ސްކޫލެއްގަ އެބަކިޔަވާ. އެކުދިންކައިރިން އަހާލީމަ ބުނީ ލީޑިންޓީޗަރެއް ހުރެޔޯ އެމީހުންކައިރީގަ ބުނެގެން ވާ އެއްވެސް ކަމެއްނޯނަކަމަށް ގިނަ ދަރިވަރުން ބުނަނީ. އުވާލާފަ ބަހައްޓާ ބޭކާރު...
ވާނުވާމީހާ
26 July 2019
ޓީޗަރުންގެ ޣައުރުޒިންމާދާރު ކަމުން އުފަންވާ އެތައް އަޙްލާޤީ މައްސައެއް ބަލަން ޖެހެނި ލީޑިންގ ޓީޗަރުންނަށް. ޓީޗަރު ހަމަ ކިޔަވާލަދީފަ ގޮސް ހަމަޖެހިލައިގެން އިންނަނި ސްޓާފް ރޫމްގަ. ޓީޗަރުންގެ ކިޔަވައިދިނުމުގަ ހުންނަ އެތައް މައްސަކަތަކެއް ހައްލުކޮށް ހަމަ މަގަށް ކިޔަވައިދިނުން އަޅުވަނީވެސް ލީޑިންގ ޓީޗަރުން.
މީނަ
27 July 2019
ވާނުވާމީހާޔަށް. ތިޔަބުނާ ގޮތަށް ކަންތައްނުކުރާ ލީޑިންގް ޓީޗަރުން ވަރަށް ބައިވަރު. ގިނަ މީހުންނަށް ނޭނގެ ކިޔަވައިދޭކަށް. އަދި ދުވަހަކުވެސް ލީޑިންގް ޓީޗަރުންގެ ގަޑިތަށް އޮބްޒާވެއް ނުކުރާނެ. އޮބްޒާމްކުރާ ދުވަހު ކޮންމެވެސް ބަހަނާއެއް ދައްކާފައި ފިލަން އުޅެނީ. ޓީޗަރުންނަކީ ހަގީގީ ޤުރުބާނީ ވާމީހުން.
ޢަބޭ
27 July 2019
މީނަ އަދިތަންކޮޅެއް ޅަކަންނޭ މިކަހަލަ ލިޔުމަކަށް ކޮމެންޓް ކުރަން. ގިނަ ސުކޫލުތަކުގަ ކަންހިނގާ ގޮތް އަޅުގަނޑު މިބުނީ! ރަނގަޅަށް ކަންކަން ދިރާސާކޮށްލާ ބައްލަވާލަ އެސެމްބުލީގަ ވާހަކަ ދައްކަން ޖެހުނީމަ ސުކޫލަށް ނާއްނަނި ކިތައް ޓީޗަރުންތޯ، ނުވަނި އެސްކިޑް ޓީމް އަންނަ ވީކްގަ ބަލިވަނި ކިތައް ޓީޗަރުންތޯ، ޕީޑީ ހިންގާ ދުވަހު ސަލާމް ބުނަނި ކިތައް މީހުންތޯ
ާއުނިމާ
26 July 2019
އެޑިޔުކޭޝަން މިނިސްޓަރުގެ މަޤާމު އުވާލާ، އެޒިންމާ ސިވިލް ސަރވަންޓަކާއި ހަވާލުކުރަންފެނޭ!
ފަރީ
26 July 2019
ތިޔަ ނިންމެވުން ރަގަޅު، ބޭކާރު ބައެެއް ރަސްމީގަޑީގައި އަ ކުރާކަމެއްނެއް. ތިމަންނަމެންނަށް ވުރެ މޮޅުބައެއް ނެއްކަމަށް ހެދިގެން ހުސް އަނަތައް ތިބޭ ބައެއް. ވޯކްޝޮޕްއަކަށް ދިޔައެއް އެމީހުންނޫއެހެން ބަޔަކަށްނުދެވޭ. މާކުރިންވެސް ކުރަން ޖެހިފަ އޮތްކަމެއް
ގަމު މީހާ
26 July 2019
ތީ ގުއިރޯނުގަ ޖެހިފަ ތިބި ޕްރިންސިޕަލުންނަށް އަންނަ ޕްރެޝަރ ކުޑަކުރަން ކުޅޭ ގޭމެއް..ފުރަތަމަ ޑެޕިއުޓީން އުވާލީ...މިހާރު އެލްޓީން...މީ ވަރަށް ދެރަކމެއް..ކޮންމެ ބަޔަކު ވެރިކމަށް އަރާފަ މުޅި ނިޒާމު ހަލާކު ކުރަނީ...
ޢައިޝާ މުދައްރިސް
26 July 2019
ލީޑިން ޓީޗަރަކަށްވުމުން އެމީހަކަށް ދުވާލަކު 2 ގަޑި ނަގަން ޖައްސާފައި ، އެހެނިހެން ޒިންމާ ތަކެއް ހަވާލު ކުރިޔަސް އެކަމެއް ނުކުރޭ. ޢަހަރަކު އެއްފަހަރުވެސް ޓީޗަރަކު އޮބްޒާރވެއް ނުކުރެވޭ. ލެސަން ޕްލޭންނަކަށް ފާޑެއް ނުކިޔާނެ. ޙަމަ އެކަނި ތައްގަނޑު ޖަހަން ތިބޭ ބައެއްތީ. 2 އަހަރުން ދެ އަހަރުން ބަދަލުވާ ގޮތަށް އޮތަސް ހީވަނީ ސިލް ޖަހާފައިވާ އެއްޗެއްހެން. ލީޑިން ޓީޗަރުގެ މަޤާމަށް އިއްލާން ކުރާނީވެސް ވަކި މީހަކަށް ކޯޓް ފަހާފައި.
ހަކީމު
26 July 2019
ރަންކޮޅާ ބައެއް ސުކޫލުތަކުގައި "އެލްޓީ" އަކަށް ވުމުން ނަގަނީ ހަފުތާއަކު 5 ގަޑި. އަދި ބައެއް ސުކޫލުތަކުގައި އެވެރިންނަކީ ކުލާހަށް ވަންނަންވެސް ނުޖެހޭ ބައެއް. އެބައިމީހުންނީ ދަރިވަރުންނާއި މުދައްރިސުންގެ ގައިގަ ހަންމުށިއަޅަން ތިބޭ ބައެއް ކަހަލަ. "ލީޑިންގ ޓީޗަރުންގެ މަގާމަށް އިއުލާން ކުރާނީވެސް ވަކިމީހަކަށް ކޯޓް ފަހާފައޭ" << ލޮލުން ބޮލުން ތާއީދު