ބޮލީވުޑްގެ ޚަބަރުތައް ކުރުކޮށް

ދެހާސް ފަނަރައިގައި ރިލީޒްކުރި ހޮލީވުޑްގެ ފިލްމު "ދަ ގާލް އޮން ދަ ޓްރޭން" އަސްލަކަށް ބަލައިގެން ހަދާފައިވާ ހިންދީ ފިލްމު އަންނަ އަހަރުގެ މެއި 8 ގައި ރިލީޒްކުރާ ގޮތަށް ހަމަޖައްސައިފި އެވެ.

އަދިވެސް ނަން އިއުލާންނުކުރާ މި ފިލްމުގައި އޮރިޖިނަލް ފިލްމުގައި އެމިލީ ބްލަންޓް ކުޅުނު ރޯލުން ފެނިގެންދާނީ ޕަރިތީނީ ޗޯޕްޅާ އެވެ. މި ފިލްމުގެ ޝޫޓިން މިދިޔަ އޮގަސްޓް މަހުގެ ތެރޭގައި ނިންމާލާފައިވާ އިރު، ޕަރިނީތީ ބުނެފައި ވަނީ މިއީ އޭނާގެ ކެރިއަރުގައި މިހާތަނަށް ކުޅުނު އެންމެ އުނދަގޫ ރޯލް ކަމަށެވެ.

ފިލްމުގެ އިތުރު ކާސްޓުންގެ ތެރޭގައި އަދިތީ ރާއޯ ހަދައިރީ އާއި ކިރްތީ ކުލްހާރީގެ އިތުރުން އަވިނާޝް ތިވާރީ ހިމެނެ އެވެ.

ރިލައިންސް އެންޓަޓައިންމަންޓުން ޕްރޮޑިއުސްކޮށްފައިވާ ފިލްމު ޑައިރެކްޓްކޮށްފައި ވަނީ ރިބޫ ދާސްގުޕްތާ އެވެ.

"ސަބް ކުޝަލް މަންގަލް" ގެ ޓްރެއިލާ އަންގާރައިގައި

ކުރީގެ މަޝްހޫރު ބަތަލާ ޕަދުމިނީ ކޯލަޕޫރީގެ ފިރިހެން ދަރިފުޅު ޕްރިޔާންކް ޝަރުމާ އާއި އެކްޓަރު ރަވީ ކިޝަންގެ އަންހެން ދަރިފުޅު ރިވާ ކިޝަން ބޮލީވުޑަށް ތައާރަފުކުރާ ފިލްމު "ސަބް ކުޝަލް މަންގަލް" ގެ ޓްރެއިލާ އަންގާރަ ދުވަހު ބެލުންތެރިންނަށް ދޫކޮށްލަން ނިންމައިފި އެވެ.

އަކްޝަޔޭ ކަންނާ ވެސް މުހިއްމު ރޯލަކުން ފެނިގެންދާ މި ފިލްމުގެ ޝޫޓިން ނިންމާލައި، ޕޯސްޓް ޕްރޮޑަކްޝަން މަސައްކަތްތައް ކުރަމުން އަންނަ އިރު، ފިލްމު ސިނަމާތަކަށް ގެންނަން ނިންމާފައި ވަނީ އަންނަ މަހުގެ 3 ވަނަ ދުވަހު އެވެ.

"ސަބް ކުޝަލް މަންގަލް" ޑައިރެކްޓްކޮށްފައި ވަނީ އަލަށް ޑައިރެކްޝަނަށް ނުކުތް ކަރަން ވިޝްވަނާތު ކެޝަޕެވެ.

ދަރިފުޅު ޕްރިޔާންކް ބޮލީވުޑަށް ތައާރަފުވާ އިރު، ޕަދުމިނީ ވެސް ގިނަ ދުވަސްތަކެއް ފަހުން އަލުން ސްކްރީނަށް އަންނަ "ޕާނިޕަތު" މި މަހުގެ 6 ގައި ސިނަމާތަކަށް އަންނާނެ އެވެ.

ކަރަންގެ ކުރު ފިލްމެއް

އަންހެނުންގެ ރައްކާތެރިކަމާ ބެހޭ ގޮތުން ހަދާފައިވާ ފިލްމެއްގައި ކަރަން ޖޯހަރު ހިއްސާވެއްޖެ އެވެ.

ޔޫޓިއުބްގައި އާންމުކޮށްފައިވާ ދެ މިނިޓްގެ "ގާލްސް ގޮޓް ޓެލެންޓް" ގައި ކަރަން ހިއްސާވަނީ ނެރޭޓާއެއްގެ ގޮތުގަ އެވެ. އަދި ފިލްމުގެ މަންޒަރުތަކުން ފެންނަނީ މިތިލާ ޕަލްކަރެވެ.

"ގާލްސް ގޮޓް ޓެލެންޓް" ޑައިރެކްޓްކޮށްފައި ވަނީ ގެބްރިއެލް ގޮޑެރާއޯ އެވެ. ސްކްރީންޕްލޭ ލިޔުނީ ގަރީމާ އޮބްރާ އެވެ.

ޓްވިޓާގައި ފިލްމު ހިއްސާކުރަމުން ކަރަން ބުނީ މި ފިލްމުގައި ބައިވެރިވުމަކީ އޭނާ އަށް ލިބުނު ޝަރަފެއް ކަމަށެވެ.

ޝްވޭތާގެ ވެބް ސީރީޒްގެ ޓްރެއިލާ ދައްކާލައިފި

ކުރީގެ ސިލްސިލާ "ކަސޯޓީ ޒިންދަގީ ކޭ" ގެ ޕްރޭނާގެ ރޯލް ކުޅެގެން މަޝްހޫރުވި ބަތަލާ ޝްވޭތާ ތިވާރީގެ އަލަތު ވެބް ސީރީޒް "ހަމް ތުމް އެންޑް ދެމް" ގެ ޓްރެއިލާ ދައްކާލައިފި އެވެ.

އެކްތާ ކަޕޫރްގެ އޯލްޓް ބަލާޖީން ހަދާފައިވާ މި ވެބް ސީރީޒަކީ ބޮޑެތި ދަރިންތަކެއް ތިބި އެކަނިވެރި މަޔަކާއި އޭނާގެ ލޯބިވެރިޔާ އާއި ދަރިންގެ ވާހަކަ ކިޔައިދޭނެ އަސަރު ގަދަ ސިލްސިލާއަކަށް ވާނެ އެވެ.

ޝްވޭތާއާ އެކު "ހަމް ތުމް އެންޑް ދެމް" ގެ ބަތަލުގެ ރޯލުން ފެނިގެންދާނީ ބޮލީވުޑްގެ ފިލްމުތަކުގެ ސަޕޯޓިން ރޯލްތަކުން ވެސް ފެންނަ އަކްޝޭ އޮބެރޯއީ އެވެ. މީތި ސްޓްރީމްކުރަން ފަށާނީ މި މަހުގެ 6 ގަ އެވެ.

ޝްވޭތާ މުހިއްމު ރޯލެއް ކުޅެމުން އަންނަ ސިލްސިލާއެއް ސޮނީ ޓީވީން ވެސް މިހާރު ދައްކަ އެވެ. އެއީ "މޭރޭ ޑޭޑް ކީ ދުލްހަން" އެވެ.