ރެއާލުން ފުރުސަތު ނުލިބެންޏާ ކްލަބް ބަދަލުކުރަން އިސްކޯ ތައްޔާރު

ރެއާލް މެޑްރިޑުގެ މިޑްފީލްޑަރު އިސްކޯ.

މުހައްމަދު ހަމްދޫން، މިހާރު

05 އޮކްޓޯބަރ 2016 - 10:17

މެޑްރިޑް (އޮކްޓޯބަރު 5) - ރެއާލް މެޑްރިޑުގައި ކުޅުމުގެ އެކަށީގެންވާ ފުރުސަތު ނުލިބޭ ނަމަ ކްލަބް ދޫކޮށްލަން ތައްޔާރަށް ހުރި ކަމަށް އެ ޓީމުގެ ސްޕެނިޝް މިޑްފީލްޑަރު އިސްކޯ ބުނެފި އެވެ.

މަލާގާ އިން މީގެ ތިން އަހަރު ކުރިން 30 މިލިއަން ޔޫރޯއަށް ރެއާލާ ގުޅުނު މިޑްފީލްޑަރަށް ކާލޯ އަންޗެލޮޓީ އަދި ޒައިނުއްދީން ޒިދާންގެ ކޯޗުކަމުގެ ދަށުން ވެސް ފުރުސަތެއް ނުލިބެ އެވެ.

"ރަނގަޅަށް ޕްރެކްޓިހުގައި މަސައްކަތްކުރާއިރު ވެސް ކޯޗު ފުރުސަތު ނުދިނުމަކީ ވަރަށް އުނދަގޫކަމެއް. އެކަމަކު މީގައި އޮތީ އަހަރެންގެ މައްސަލައެއް. ފުރުސަތު ނުލިބެންޏާ ޒިންމާވާން ޖެހޭނީ އަހަރެން،" އިސްކޯ ބުންޏެވެ.

އިސްކޯ ބުނީ ކާމިޔާބު ކުޅުންތެރިޔަކަށް ވާނެ ކަމުގެ ޔަގީންކަން އެބައޮތް ކަމަށާއި ފަހަރުގައި އެކަން ރެއާލް މެޑްރިޑުގައި ހާސިލްނުވާނެ ކަމަށެވެ.

"ކޮންޓްރެކްޓުގައި ދެ އަހަރު އެބައޮތް. ކްލަބުން އަހަންނާ އަދި މަޝްވަރާއެއް ނުކުރޭ. އަހަރެން ވެސް އަދި އެހެން ކްލަބަކާ މެދު ނުވިސްނަން. އެކަމަކު ރެއާލް މެޑްރިޑުގައި ކާމިޔާބު ކުޅުންތެރިޔަކަށް ނުވަންޏާ ކޮންމެވެސް އެހެން ކްލަބެއްގައި އެކަން ހާސިލްވާނެ. އެކަމަކު އަދިވެސް އުއްމީދަކީ ރެއާލުގެ މުހިއްމު ކުޅުންތެރިޔަކަށް ވުން،" އިސްކޯ ބުންޏެވެ.

އިސްކޯ އަށް ޕްރިމިއާ ލީގުގެ މެންޗެސްޓާ ޔުނައިޓެޑާއި ޓޮޓެންހަމް ހޮޓްސްޕާސް އިން ޝައުގުވެރިވެ އެވެ.