ހުރަވަޅީގެ އެންމެ ފަހު ޓޫރިސްޓު ފުރުވާލުމަށްފަހު މުވައްޒަފުން މޫދަށް ފުއްމާލާ މަންޒަރު ފެންނަ ވީިޑިއޯއެއްގެ ސްކްރީން ޝޮޓެއް--
30 މާޗް 2020 - 12:59
7 comments
ރިސޯޓަށް އަންނަ ޓޫރިސްޓުންނަށް މަރުހަބާ އާއި އޭގެ ފަހުން ރަނގަޅު އަލްވަދާއުއެއް ކިޔުމަކީ ރާއްޖޭގެ ރިސޯޓްތަކުގެ މުވައްޒަފުންގެ ޒަމާންވީ އާދައެކެވެ. ނަމަވެސް މިފަހަރު ޓޫރިސްޓުން ފުރުވާލަން ޖެހިފައި މިވަނީ މުޅިން ތަފާތު އިހުސާސްތަކަކާ އެކު އެވެ.
ކޮވިޑް-19 ގެ ސަބަބުން ދުނިޔޭގެ ދަތުރުފަތުރު ހުއްޓި، ރާއްޖޭގެ ރިސޯޓްތައް ވެސް ބަންދުކުރާ ހިސާބަށް ހިނގައްޖެ އެވެ. ކުރިންސުރެ އައިސް ތިބި ޓޫރިސްޓުންގެ ޗުއްޓީ ހަމަކޮށް ފުރުވާލުމާ އެކު، ފަހަރަކު ރިސޯޓެއް ހުސްވަނީ އެވެ.
ބައެއް ރިސޯޓްތަކުން އެންމެ ފަހު ޓޫރިސްޓަށް އަލްވަދާއު ކިޔާފައި ވަނީ މުޅިން ތަފާތުކޮށެވެ. ހުރަވަޅި އައިލެންޑް ރިސޯޓުގެ މުވައްޒަފުން އެންމެ ފަހުގެ ޓޫރިސްޓް، ލޯންޗުގައި ނައްޓާލުމާ އެކު، ފުއްމާލީ މޫދަށެވެ.
ހުރަވަޅި ރިސޯޓުން އާއްމު ކުރި ވީޑިއޯއިން ފެންނަނީ، އެންމެ ފަހު ޓޫރިސްޓަށް އަލްވަދާއު ކިޔަން ރިސޯޓުގެ ގިނަ އަދަދެއްގެ މުވައްޒަފުން ޖެޓީއަށް ނުކުމެފައި ތިއްބަ އެވެ. ލޯންޗު ނައްޓާލުމާ އެކު އެ ހުރިހާ މުވައްޒަފުން އެކުގައި މޫދަށް ފުއްމާލައި، މޫދުގައި ތިބެގެން ޓޫރިސްޓުންނަށް އަލްވަދާއު ކިޔަ އެވެ.
ހުރަވަޅި ރިސޯޓުގެ ޓޫރިސްޓު ފުރުވާލާ ވީޑިއޯ--
ލަކްސް ސައުތު ރިސޯޓުން ވެސް އެތަނުގެ އެންމެ ފަހު ޓޫރިސްޓުންނަށް އަލްވަދާއުކުރީ ގިނަ އަދަދެއްގެ މުވައްޒަފުން ޖެޓީއަށް ނުކުމެގެންނެވެ. ނަމަވެސް އެ ރިސޯޓުގެ މުވައްޒަފުން މޫދަށް ފުންމައެއް ނުލަ އެވެ.
ލަކްސް ސައުތުގެ އެންމެ ފަހުގެ ޓޫރިސްޓުން ފުރުވާލާ ވީޑިއޯ--
ރާއްޖޭގައި މިހާރު އިއުލާންކޮށްފައިވާ ސިއްހީ ކުއްލި ހާލަތުގައި އަޅާފައިވާ ފިޔަވަޅުތަކުގެ ސަބަބުން ޓޫރިސްޓުން ތިބުމަކީ، ރިސޯޓްތަކުގެ ހުރިހާ މުވައްޒަފުން ރަށުގައި ބަންދުވުމެވެ. އެކަމަކު ހުރިހާ ޓޫރިސްޓުން ފުރުމާ އެކު، 14 ދުވަސް ފަހުން، މުވައްޒަފުންނަށް ރިސޯޓުން ބޭރުވުމުގެ ފުރުސަތު ލިބެ އެވެ. ނުވަތަ އެއަށް ވުރެ އަވަހަށް ވެސް އެ ހުއްދަ، ރަސްމީ ފަރާތްތަކުން ދިނުން އެކަށީގެންވެ އެވެ.
ރާއްޖެއަށް އަންނަ ބޭރު މީހުންނަށް އޮން އެރައިވަލް ވިސާ ދޫކުރުން މިހާރު ވަނީ ހުއްޓާލައިފަ އެވެ. އަދި އެއާލައިންތަކުން ދަތުރުތައް ނުކުރާތީ، އިތުރު ޓޫރިސްޓުން އެހާ އަވަސް މުއްދަތެއްގައި ރާއްޖެ އައުން ވެސް އެކަށީގެންނެއް ނުވެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޕަބްލޯ
30 March 2020
ވަރަށް ރަގަޅު ނަމޫނާއެއް ތިދެއްކީ. ދިވެހިންނަކީ އަބަދުވެސް މެހުމާނުންނަށް ކަމޭހިތާ ބައެއް. އެކަމަކު ހިތާމައަކީ ރިސޯޓުތަކުގެ މުވައްޒަފުން ދެންވާނީ ބިކަ. ހުރިހާ އެންމެންވެސް އެމީހަކުގެ ރަށަށް ގޮސް ކޮންމެވެސް މަސައްކަތެއް ކުރަން ފަށާ. އަހަރެންވެސް މިއުޅެނީ ޅ. އަތޮޅަށް ބަދަލުވާން. ކޮންމެ މީހަކީ ވަޒީފާގައި އުޅެންޖެހޭ މީހެއްނޫން. އަމިއްލަ މަސައްކަތްކޮށްގެން އާއިގުތިސާދެއް ގެނެވޭތޯ ބަލަމާހިގާ.
ޑޮކްޓަރ
30 March 2020
14 ދުވަސް ހަމަކޮއްފަ ނޫނީ މުވައްޒަފުން ރިސޯޓުން ބޭރު ނުކުރާތި. އިންފެކްޓްވެފަ ހުރި މީހަކު ހުރިނަމަ އެމީހެއްގެ ފުށުން އެމީހެއްގެ އާއިލާއަށާއި ގެއަށް ދެވެންދެން ދިމާވި ކޮންމެ މީހަކަށް ނުރައްކަލަކަށް ވެދާނެ. ސިއްރު ނުކޮށް ރޯގާގެ އަސަރުހުރި މީހަކުވިއްޔާ ފްލޫ ކްލިނިކްތަކަށް ދައްކާ. މާސްކް އަޅައިގެން ނޫނީ އެފަސަ މީހުން ފްލޫ ކްލިނިކާ ހަމައަށްވެސް ނުދޭ. އިންފެްކްޓެޑް މީހަކާ ދިމާވިކަމަށް ޝައްކު ކުރެވޭނަމަ ލަސް ނުކޮށް އެޗްޕީއޭއަށް ގުޅާ މައުލޫމާތު ހިއްސާކުރޭ
މަވޭ
30 March 2020
މިހަބަރު ކިޔާފައި ލޮލުންކަރުނަ އައިސްފި.
ފާނު
30 March 2020
ކީއްވެ؟ ދެން ދިވެހި މުއައްޒަފުމީހާ ކަޑާ އެއްލާލާތަން ބަލަންތިބޭ.
އިޔެ
30 March 2020
ފަތުރުވެރިކަމުގެ ސިނާއަތަކީ ދިވެހި ރާއްޖޭގެ ރަން ބިސް އެޅި ކުކުޅު. ހިތާމަޔަކީ ދިވެހި އިގުތިސާދުގެ މުގޫ ކަމަށްވާ މުވައްޒަފުން ބަނޑަށްޖެހި މަގުމަތި ވުމުން، “އޯގާތެރި ސަރުކާރުގެ” އެއްވެސް ޕްލޭނެއް އަދި އެހީއެއް ނެތުމުން. ސަރުކާރުން މިވަގުތަށް ސޯޝަލިސްޓު އުސޫލުތަކެއް ކުރިޔަށް ނެރެން ޖެހޭ. ބަޔަކަށް އެހީވެވޭނެ އެއްވެސް ޤައުމެއް ނެތް. މީވެސް ދުވަހެއް އަދި ފިލާވަޅެއް. މިހާރު ތިބި އެއްވެސް ސީޔާސީ ލީޑަރަކަށް ދެނެއް މަގޭ ވޯޓެއް ނުލިބޭނެ.
އަހުމަދުބޭ
30 March 2020
ދަންނަވާލަންތޯ މިއީކީ ވަކިފަތުރުވެރި ކަމުގައި އުޅޭ މުވައްޒަފުންނަށް އެކަނި އައި ހިއްދަތި ދުވަސްތަކެއްނޫނޭ، ވަކިސިނާއަތެއް ކިޔައިނެކަމެއް ދަޑުވެރިން އެމީހުން ހައްދާ އެތިކޮޅު ގަންނާނެ ބަޔަކުނެތް، މަސްވެރިން އެމީހުން ބާނާ މަސްކޮޅު ގަންނާނެ ބަޔަކުނެތް، މަސައްކަތްތެރީނަށް މަސައްކަތެއް ދޭނެ ބަޔަކުނެތް، ރިސޯޓް ހޯޓާތަށް ހިންގާމީހުންނަށް އެމީހުންގެ ރިސޯޓްތަކަށް އަންނާނެ ބަޔަކުނެތް، ހޯޓާ ކެފޭ ހިންގާމީހުން ބަންދުކޮއްފައި މިހެން ގޮސް ސަރުކާރުން އެހީ ދޭނީ ކާ
ގިޔާސް
31 March 2020
މީ ސިޔާސީ މީހުން ކޮށްގެން އުޅޭ ކަމެއްބާ!، ނޫނީ ސަރުކާރުން ގެނެސްގެން އުޅޭ ހާލަތެއްބާ!؟ ރަނގަޅު ވާހަކައެއް، ރިސޯޓު މުވައްޒަފުންނަށް ވަރަށް ދެރަ ނިކަމެތިކަމެއް މިކަމުން ދިމާވާނެ، ޚާއްސަކޮށް މުސާރަ ނުލިބޭގޮތަށް ޗުއްޓީއަށް ފޮނުވާލީމަ، ރިސޯޓު އޯނަރުގެ އެއްވެސް ގޮތެއް ފޮތެއް ނެތްކަން އެކަމުން އިނގެނީ، ވިހިތިރީސް އަހަރު ދުވަހުތެރޭ ލިބުނު ޑޮލަރުން ތިން ހަތަރު މަހުގެ މުސާރަ މުވައްޒަފުންނަށް ދޭން ނުލިބުމަކީ އޯނަރުގެ ހުރި ހަޔާތްކުޑަކަމުގެ އިންތިހާ.