ތިމަރަފުއްޓަށް މިއަހަރު ކުރި ވިއްސާރައިގައި އެ ރަށުގެ މަގެއްގައި ފެންބޮޑުވެފައި: މި ފަދަ ގުދުރަތީ ކާރިސާތައް ރާއްޖެއަށް ގިނައިން ކުރިމަތިވާ ކަމަށް މިނިސްޓަރު ވިދާޅުވި
13 އޮކްޓޯބަރ 2016 - 12:48
9 comments
ފަހަކަށް އައިސް ރާއްޖެއަށް ގިނަ ކާރިސާތަކެއް ކުރިމަތިވަމުން ދާ ކަމަށާއި މިއީ ގައުމީ ފެންވަރުގައި ވިސްނަން ވެއްޖެ ކަމެއްކަން ފާހަގަ ކުރައްވައި، ޑިފެންސް މިނިސްޓަރު އާދަމް ޝަރީފް ކަންބޮޑުވުން ފާޅުކުރައްވައިފި އެވެ.
މިއަދު ފާހަގަ ކުރާ ކާރިސާތަކުން ލިބޭ ގެއްލުން ކުޑަކުރުމުގެ ބައިނަލްއަގްވާމީ ދުވަހުގެ މުނާސަބަތުގައި މިނިސްޓަރު ނެރުއްވި ހިތޯބެއްގައި ވިދާޅުވީ ދުނިޔޭގެ މޫސުމަށް އަންނަ ބަދަލުތަކުގެ ސަބަބުން ރާއްޖެއަށް ވެސް ގުދުރަތީ ބޮޑެތި ކާރިސާތައް ކުރިމަތިވަމުންދާ ކަމަށެވެ.
އެގޮތުން އާދަމް ޝަރީފް އެންމެ ބޮޑަށް ފާހަގަ ކުރެއްވީ މިދިޔަ އަހަރު އައްޑުއަށް ބޯކޮށް ވާރޭވެހި ފެންބޮޑުވި ހާދިސާ އެވެ.
މިނިސްޓަރު ވިދާޅުވި ގޮތުގައި ދެ ގަޑިއިރުގެ ތެރޭގައި އައްޑުއަށް 228 މިލިމީޓަރުގެ ވާރޭވެހުނު އިރު، މި ވަރަށް 24 ގަޑިއިރުގެ ތެރޭގައި މުޅި ރާއްޖެއަށް ވެސް ވާރޭ ވެހިފައި ނުވާ ކަމަށެވެ.
ޑިފެންސް މިނިސްޓަރު އާދަމް ޝަރީފް ނޫސްވެރިންނާ ވާހަކަދައްކަވަނީ: ގުދުުރަތީ ހާދިސާތައް ގިނަވާތީ ކަންބޮޑުވުން ފާޅުކުރެއްވި-- ފޮޓޯ: ނިޝާން އަލީ/ މިހާރު
"ގުދުރަތީ ކާރިސާތަކުގެ ބާރުގަދަވަމުން އަންނަ މިންވަރު މި ކާރިސާއިން ވަނީ އަޅުގަނޑުމެންނަށް އިތުރަށް ކަށަވަރު ކޮށްދީފަ އެވެ." މިނިސްޓަރުގެ ހިތޯބުގައި ވިދާޅުވެފައި ވެ އެވެ.
ގުދުރަތީ ހާދިސާތަކުގެ އިތުރުން އިންސާނުންގެ ސަބަބުން ހިނގާ މި ފަދަ ހާދިސާތައް އިތުރުވަމުން އަންނަކަން ވެސް އާދަމް ޝަރީފް ފާހަގަ ކުރެއްވި އެވެ.
އެގޮތުން މިއަހަރުގެ ތެރޭގައި މި ފަދަ ތިން ހާދިސާއެއް ހިނގާފައިވާ ކަމަށާއި އޭގެ ސަބަބުން ގިނަ އާއިލާތަކެއްގެ ގެދޮރާއި މުދާ އަނދައި ބޯހިޔާވަހިކަން ގެއްލިފައިވާ ކަމަށް ވިދާޅުވި އެވެ.
މިއީ ގައުމީ ފެންވަރުގައި ވިސްނަން ޖެހިފައިވާ މައްސަލައެއް ކަމަށާއި މިކަން މަދުކުރެވޭނީ ކާރިސާތަކުން ލިބޭ ގެއްލުން ކުޑަކުރުމުގެ އަސާސްތައް ތަރައްގީގެ މަޝްރޫއުތަކުގައި ހިމަނައިގެން ކަމަށް މިނިސްޓަރު ވިދާޅުވި އެވެ.
ވިއްސާރަ ވެހި މާލޭގެ މަގެއްގައި ފެންބޮޑުވެފައި-- —ފޮޓޯ: މުހައްމަދު ޝަރުހާން/މިހާރު
މި ފަދަ ހާދިސާތަކުން ރައްކާތެރިވުމަށް ސަރުކާރުން ގިނަ ފިޔަވަޅުތަކެއް އަޅާފައިވާކަން އޭނާ ފާހަގަ ކުރެއްވި އެވެ. އެގޮތުން ރާއްޖޭގައި އާއްމުކޮށް ފެންބޮޑުވާ 31 ރަށެއްގައި ފެން ހިންދާ ވަސީލަތްތައް ގާއިމުކޮށްފައިވާއިރު އިތުރު 80 ރަށެއްގައި މި މަޝްރޫއު ކުރިއަށް ގެންދިޔުމަށް ރާވާފައިވާ ކަމަށް ވިދާޅުވި އެވެ.
އަދި މާލޭގައި ހިނގާ އަލިފާނުގެ ހާދިސާތަކުން މީހުންގެ މުދަލާއި ފުރާނަ ސަލާމަތް ކުރުމަށް އެކި ހިސާބުތަކަށް ފެނާއި ލޮނު ލިބޭނެ އަށް މިލިޔަން ރުފިޔާގެ މަޝްރޫއެއް ސަރުކާރުން ފަށާފައިވާ ކަމަށް ވެސް އާދަމް ޝަރީފް ވިދާޅުވި އެވެ.
އޭނާ ވިދާޅުވީ މިދިޔަ އަހަރު ދިމާވި މި ފަދަ ހާދިސާތަކުގައި ހާލުގައި ޖެހުނު މީހުންގެ އަސާސީ ބޭނުންތަކަށް ސަރުކާރުން ހަތް މިލިޔަން ރުފިޔާ ހަރަދުކޮށްފައިވާ ކަމަށާއި ހާލުގައި ޖެހުނު އާއިލާތަކުގެ ގެދޮރު މަރާމާތުކޮށް، ބޯހިޔާވަހިކަން ފޯރުކޮށްދިނުމަށް 18 މިލިޔަން ރުފިޔާ ސަރުކާރުން ހަރަދުކޮށްފައިވާ ކަމަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަލްޖިބްރާ
21 December 2016
ޑިފެންސް މިނިސްޓަރު ކަންބޮޑުވީމާ ހުރިހާ ކަމެއްވެސް ހައްލު ވާނެ !
ވައްޑޭ
14 October 2016
މިނިސްޓަރ މުއިއްޒަށާއި މިނިސްޓަރ ތޯބެއަށް މިކަން ހައްލުކުރެވޭނެ! ދެން ބޭނުންވަނީ ޑިފެންސް މިނިސްޓަރގެ އެހީތެރިކަން...........
ދޮންބެ
13 October 2016
ކާރިސާތައް ގިނަވީމަ ގިނަވާވާހަކަ ތި ދައްކަނީ. އުޅެވޭ ގޮތެއް ހިތަކަށް ނާރާ އެކަކުވެސް.
ތަރައްޤީ
13 October 2016
ކާރިސާތަކަކީ ސަބަބުތަކަކާއެކު އަންނަ އެއްޗެކެވެ. އެކަމަކު އެ ސަބަބުތަކަކީ ﷲ މިންވަރު ކުރައްވާ އެއްޗެކެވެ. އުޅުން ރަނގަޅުކޮށް ސަބަބުތައް ނައްތާލައި ދުޢާކޮށްއުޅޭށެވެ. އެއްކަމަކުން ނުފުދޭނެއެވެ. ކުރިން މިފަދަ ކަންކަން މެދުވެރިވާ ކަހަލަ ސަބަބުތައް މެދުވެރިކުރައްވާފަދަ ކަންކަން ދިވެހިންގެ ތެރެއަކު ނެތެވެ. މިހާރުގިނަގުނައެވެ. އެއަށް ކޮންމެނަމެއްވެސް ދެވިދާނެއެވެ. ތިމާވެއްޓަށް ދުނިޔެއަށް އަންނަ ބަދަލޭވެސް ބުނެވިދާނެއެވެ. ލިބުނު ތަނަވަސްކަމެއްގެ ސަބަބުންނޭވެސް ބުނެވިދާނެއެވެ، ވިޔާނުދާ އަމަލު ގިނަވުމޭވެސް ބުނެވިދާނެއެވެ. އެހެންކަމުން ހުރިހާކަމަކަށް ވިސްނައި ފިކުރުކުރުން ރަނގަޅެވެ.
GAN Island
13 October 2016
''ދެ ގަޑިއިރުގެ ތެރޭގައި އައްޑުއަށް 228 މިލިމީޓަރުގެ ވާރޭވެހުނު އިރު، މި ވަރަށް 24 ގަޑިއިރުގެ ތެރޭގައި މުޅި ރާއްޖެއަށް ވެސް ވާރޭ ވެހިފައި ނެތް'' ކަމަށް މިނިސްޓަރ ވިދާޅުވި. މިނިސްޓަރ ވިދާޅުވި އެއްޗެއްގެ މާނަ އެއްގޮތަކަށް ވެސް ނޭގުނު.... ؟؟ ދުވާލެއްގެ 24 ގަނޑި އިރުގެ ވާހަކަތޯ ؟ ނުވަތަ މުޅި އަހަރު ދުވަހުގެ ތެރޭގައި ހިމެނޭ 365 ދުވަހުގެ ތެރޭގައި 24 ގަނޑި އިރު ވެސް އައްޑޫ އަށް ވެހުނު ވަރަށް މުޅި ރާއްޖެ އަށް ވާރޭ ނުވެހޭ ވާހަކަތޯ ؟؟ ތިއީ އެއްގޮތަކަށް ވެސް ''ކަންބޮޑުވާންޖެހޭ'' ވަރުގެ ކަމެއްނޫން. އަދިވެސް އިތުރަށް ؛؛އަތޮޅުތެރޭގެ ރައްޔިތުންނަށް ފިއްތާލާ'' ދައުލަތުން ދޭން ޖެހޭ އަސާސީ ހިދުމަތް މަޑުޖައްސާލާ ރަށްރަށުގައި ވިއްކާ ހަނޑޫ ހަކުރު ފުށް އަދި ކަރަންޓް ގެ އަގު އުފުލާލަނިކޮށް ގޮތް ހުސްވެގެން ''އެބައިގަނޑު'' ތިޔަ މާލެ އަށް މިސްރާބު ޖަހާނެ. އޭރުން ''ތިރަށު ބިންވެރިން'' ގެދޮރު ކުއްޔަށް ދޫކޮށް ލަންކާ ، އިންޑިޔާ މެލޭޝިޔާ އޮސްޓްރޭލިއާ އަދި އެމަރިކާ އަށާއި ލަންޑަނަށް ވަޑައިގަންނަވާނީ. ކުލީ ކޮޓަރި ތަކުގައި ''ދެވަނަ ދަރަޖައިގެ ރައްޔިތުން'' އަދި ތަންކޮޅެއް ތަނަވަސް މީހުން ޔޫތު ސިޓީ ގައި މެންބަރުންނާއި މުއައްސަސާ ތަކުގެ ވެރިން އަދި ޕާޓީ ކުދިން ލަޤްޒަރީ ކޮންޑޯ ތަކުގައި ގްރޭޓަރ މާލޭގައި ދިރިއުޅެނިކޮށް މައްސަލަ ހައްލުވާނެ.
އަބްދުލް މަޖީދު އަބުދުލް ބާރީ
13 October 2016
ހަރީފަށް ބުނެލަން މާބޮޑަށް ދަންނަބޭކަލަކަށް ހެދިގެން ނުޅޭ، ދުވާއަކުން އެކަނި ނުފުދޭނެ
ގގ
13 October 2016
ﷲ އަށް ތައުބާވެ ފާފަކުރުމުން ދުރުހެލިވާންވީ އޭރުން ﷲ ގެ ރަހުމަތާއި ފުއްސެވުމާއި ދިންނެވުން އެބަޔަކަށް ލިބޭނެ!
މީހާ
13 October 2016
އުޅެވޭގޮތެއް އެއްވެސްމީހަކު ހިތަކަށްހަމަ ކުޑަކޮށްވެސްނާރަނީދޯ!!
ހަރީފް
13 October 2016
ދުޢާ ކުރުމުގެ ސަގާފަތް ކޮބައިތަ؟ ހުކުރު ޙުތުބާގަ ރަސޫލާއަށް ސަލަވާތް ކިޔެވުމަކީ އަމުރެކޭ ކިޔާފަ ނިންމާލިމަކާ ނުފުދޭ