ޚަބަރު

ހަނިފަރު ފަރަށް އެރި ދޯނި ފުންކޮށްފި

ހަނިފަރު ފަރަށް އެރި އުޅަނދު ވަނީ ފުންކޮށްފައި، ފަރަށް ލިބުނު ގެއްލުންތައް ދަނީ ބަލަމުން..-- ފޮޓޯ: ހަނިފަރު ފޭސްބުކް

މުހައްމަދު ޔާމީން، މިހާރު

28 އޮކްޓޯބަރ 2016 - 17:49

1 comments

ހިޔާމަތް ކޮށްފައިވާ ބ. ހަނިފަރަށް ދޯނި އެރިތާ ހަތަރު ދުވަސް ފަހުން ރޭ ފުންކޮށްފި އެވެ.

ބަޔޮސްފިއާ ރިޒާވް އޮފީހުގެ އޮފިޝަލަކު މިއަދު ވިދާޅުވީ ބޯޓު ފުން ކުރުމަށް ފަހު، ފަރަށް ލިބުނު ގެއްލުންތައް އިތުރަށް ބަލައި ދިރާސާ ކުރުމުގެ މަސައްކަތް ކުރަމުންދާ ކަމަށެވެ.

"ދޮށި ދޯނި 1" ނަމަކަށް ކިޔާ ދޯނި ފުން ކުރީ ޓަގެއް ބޭނުންކޮށްގެންނެވެ. އެ ބޯޓު ފުން ކުރުމަށް ފަހު މިހާރު ވަނީ ބ.ދަރަވަންދޫއަށް ގެންގޮސްފަ އެވެ.

ޔުނެސްކޯ ބަޔޮފިއާ ރިޒާވްގެ ގޮތުގައި ކަނޑައަޅާފައިވާ ހަނިފަރަށް ދޯނި އެރުމުން ލިބުނު ގެއްލުންތަކަށް ބެލުމަށް ފަހު އެ އުޅަނދުގެ ވެރިފަރާތް ޖޫރިމަނާ ކުރާނެ ކަމަށް ބެލެވެ އެވެ.

ބަޔޮސްފިއާ ރިޒާވުގެ ދަށުން ބ. އަތޮޅުގައި ކަނޑައަޅާފައިވާ ކޯ އޭރިޔާތަކުގެ ތެރެއިން އެންމެ ހާއްސަ ތަނަކީ ހަނިފަރެވެ. އެއީ އެ ސަރަހައްދުގައި އެންމަޑި އާއި ފެހުރިހި އުޅޭތީ އެވެ. އެ ސަރަހައްދަކީ ރާއްޖެ އަންނަ ޓޫރިސްޓުންގެ ވެސް ވަރަށް މުހިންމު މަންޒިލެކެވެ. ތަފާސް ހިސާބުތަކުން ދައްކާ ގޮތުގައި ހަނިފަރަށް ފީނާ މީހުންގެ އަތުން ބޮޑު އާމްދަނީއެއް ލިބެ އެވެ.