ލަންޑަން (ނޮވެމްބަރު 27) - އީއޭ ސްޕޯޓްސް އިން އަހަރަކު އެއް ފަހަރު ނެރޭ ފީފާ ގޭމުން ހުއްދަނެތި ގަރެތު ބޭލް އާއި ޒަލަޓާން އިބްރަހޮމޮވިޗްގެ ނަމުގައި ފައިދާތަކެއް ހޯދާ ކަމަށް ބުނެ އެކަމާ ދެކޮޅަށް ގާނޫނީ ގޮތުން ފިޔަވަޅު އެޅުމުގެ މަސައްކަތްތައް ފަށައިފި އެވެ.
އޭސީ މިލާނަށް ކުޅެމުން އަންނަ އިބްރަހިމޮވިޗް އެންމެ ފުރަތަމަ މި ކަމުގެ ވާހަކަ ދެއްކީ ޓްވިޓާގަ އެވެ. އިބްރަހިމޮވިޗް ބުނީ އޭނާގެ ހުއްދައެއް ނެތި އޭނާގެ ނަމާއި މޫނު ބޭނުންކޮށްގެން މިހާތަނަށް ފީފާ ގޭމުން ވަރަށް ބޮޑެތި ފައިދާތަކެއް ހޯދާފައިވާ ކަމަށެވެ.
އީއޭ ސްޕޯޓްސް އިން ވަނީ ގޭމްގައި ކުޅުންތެރިންގެ ނަމާއި މޫނު ބޭނުންކުރުމުގައި ކޮންޓްރެކްޓްތަކެއްގެ ތެރެއިން ހުއްދަ އެބައޮތް ކަމަށެވެ. އެކަމަށް އިޝާރާތްކޮށް ބޭލް ބުނީ މިއީ ބަލަން ޖެހޭ ކަމެއް ކަމަށާއި އެ ހުއްދަ ލިބިފައި އޮތް ގޮތެއް ހޯދަން ޖެހޭ ކަމަށެވެ.
ބޭލް އާއި އިބްރަހިމޮވިޗްގެ އިތުރުން ދުނިޔޭގެ ފުޓްބޯޅައިގައި މަސައްކަތްކުރާ ގިނަ އޭޖެންޓުން މިހާރު އަންނަނީ އީއޭ ސްޕޯޓްސްއާ ދެކޮޅަށް މި މައްސަލަައިގައި އެޅޭނެ ފިޔަވަޅެއް ހޯދޭނެ މަގެއް ބަލަން ގާނޫނީ ލަފާ ހޯދަން ފަށައިފަ އެވެ.
މީގެ ކުރިން އީއޭ ސްޕޯޓްސް އިން ބްރެޒިލްގެ އެތުލީޓުންތަކެއްގެ ހުއްދަނެތި ވީޑިއޯ ގޭމެއް ހެދި މައްސަލައެއްގައި ކޯޓު މެދުވެރިކޮށް ވަނީ މާލީ ބަދަލުދޭން ޖެހިފަ އެވެ.
ފީފާ އަކީ ދުނިޔޭގެ އެންމެ މަޝްހޫރު ފުޓްބޯޅަ ގޭމެވެ. ކޮންމެ އަހަރަކު އެތައް ކޮޕީއެއް ވިކޭ މި ސީރީސްގެ އެންމެ ގިނަ ކޮޕީ ވިކުނީ 2018 ވަނަ އަހަރު އެވެ. އެ ފަހަރު 260 މިލިއަން ކޮޕީ ވިއްކި އެވެ. އެންމެ ފަހުން މިދިޔަ އޮކްޓޫބަރު މަހުގައި ނެރުނު ފީފާ 21 ގައި 700 އަށް ވުރެ ގިނަ ޓީމުގެ 7000 އަށް ވުރެ ގިނަ ކުޅުންތެރިން ވަނީ ހިމަނައިފަ އެވެ. އަދި ލައިސަންސް ހޯދައިގެން ޕްރިމިއާ ލީގާއި ޗެމްޕިއަންސް ލީގު ކުޅެވޭ ގޮތް ވަނީ ހަދައިފަ އެވެ.
ކުޅުންތެރިންގެ ނަމާއި މޫނު ބޭނުންކުރަނީ ހުއްދަ ހޯދައިގެން - އީއޭ ސްޕޯޓްސް
ސޯޝަލް މީޑިއާގައި މިހާރު ދައުރުވަމުން އަންނަ ފީފާ ގޭމްގެ މި ވާހަކައާ ގުޅިގެން އީއޭ ސްޕޯޓްސް އިން ބުނީ ކޮންޓްރެކްޓެއްގެ ތެރެއިން ކުޅުންތެރިންގެ ނަމާއި މޫނުގެ އިތުރުން ޒާތީ މައުލޫމާތު ބޭނުންކުރުމުގެ ހުއްދަތަކެއް އެބައޮތް ކަމަށެވެ. އަދި މިހާރު މި ފެންމަތިވެގެން މި އުޅޭ މައްސަލަ އަކީ އެހެން ވާދަވެރި ގޭމެއްގެ ހިއްސާ އޮންނަ ތާޑް ޕާޓީން ފީފާ 21 ގެ ޕްރޮމޯޝަން ހުއްޓުވަން ކުރާ ކަމެއްގެ ގޮތުގައި ދެކޭ ކަމަށް ބުނެފައިވެ އެވެ.
ފީފާއާ އެންމެ ވާދަވެރިކޮށް ނެރޭ ގޭމަކީ ޕްރޯ އިވޮލޫޝަން ސޮކާ (ޕެސް) އެވެ.
އިބްރަހިމޮވިޗާއި ބޭލް ވަނީ ފީފާގެ އެކި އަހަރުތަކުގައި ނެރުނު ގޭމްތަކުގައި ހިމެނިފަ އެވެ. އަދި ފީފާގެ ކަވަރުގައި ވެސް މި ކުޅުންތެރިންގެ ފޮޓޯ ވަނީ ޖަހައިފަ އެވެ. އެ ގޮތުން 2014 ވަނަ އަހަރުގެ ފީފާގައި ލިއޮނަލް މެސީއާ އެކު ކަވަރުގައި އިނީ ބޭލްގެ ފޮޓޯ އެކެވެ.
އިބްރަހިމޮވިޗާއި ބޭލް ބުނީ އީއޭ ސްޕޯޓްސް އަށް އެ ހުއްދަ ދީފައިވަނީ ފީފާގެ ރުހުން ވެސް ލިބޭ ގޮތަށް ހަދާފައިވާ ފިފްޕްރޯ އިން ކަމަށްވާނަމަ އެކަން ވެސް ސާފުކޮށް އެނގެން އޮންނަން ޖެހޭ ކަމަށެވެ. ފިފްޕްރޯ އަކީ 65 މެމްބަރު ގައުމު ހިމެނޭ ގޮތަށް ހަދާފައިވާ ފެޑެރޭޝަނެކެވެ. އެ ވާހަކަތަކަށް ރިއާޔަތްކޮށް ފިފްޕްރޯ އިން ނެރުނު ބަޔާނެއްގައި ބުނެފައިވަނީ ވަކިވަކި ކުޅުންތެރިންގެ އިމޭޖް ރައިޓްސްއާ ގުޅޭ ކަންތައްތައް ހިމެނޭ ކޮންޓްރެކްޓެއް ހަދާފައި ނޯންނާނެ ކަމަށާއި އެއީ ކުޅުންތެރިން ކުޅޭ ކްލަބްތަކާއި ވާދަކުރާ ލީގުތަކުން ގޭމިން އިންޑަސްޓްރީއާ އެކު ވާ އެއްބަސްވުންތަކުގެ ތެރެއިން ކުރިއަށްދާ ކަމެއް ކަމަށެވެ.
މި އަހަރުގެ ކުރީކޮޅުގައި އިބްރަހިމޮވިޗް މިހާރު ކުޅެމުން އަންނަ އޭސީ މިލާނުން ވަނީ އީއޭ ސްޕޯޓްސްއާ އެކު ޕާޓްނާޝިޕް އެއްބަސްވުމެއްގައި ސޮއިކޮށްފަ އެވެ. އަނެއް ކޮޅުން އިނގިރޭސި ޕްރިމިއާ ލީގުގެ ޓީވީ ރައިޓްސް ޑީލްގެ ތެރެއިން ލީގުން ގޭމިން ރައިޓްސް ވިއްކަނީ ހުރިހާ ޓީމެއްގެ ހުރިހާ ކުޅުންތެރިން ހިމެނޭ ގޮތަށް ގަނޑުކޮށެވެ.
