މޯޕާ އާއި ޕާލޭ މޯލްޑިވްސް ގުޅިގެން ޕްލާސްޓިކް ރިސައިކަލް ކުރާ "ޕެޓް ރިވާސް ލޮޖިސްޓިކްސް ޕްރޮގްރާމް" ކެފޭތަކުން ޕްލާސްޓިކް ފުޅިތައް ނެގުމަށް ފަހު، ރިސައިކަލް ކުރަން ފޮނުވާނެ
"ޕެޓް ރިވާސް ލޮޖިސްޓިކްސް ޕްރޮގްރާމް" އިފްތިތާހުކުރެއްވުމަށް ފަހު، ޕާލޭ އާއި މޯޕާގެ އިސްވެރިން -- ފޮޓޯ: ނިޝާން އަލީ/މިހާރު
24 ޖެނުއަރީ 2021 - 20:00
2 comments
ޕްލާސްޓިކް ރިސައިކަލް ކުރަން ހާއްސަ ޕްރޮގްރާމެއް މޯލްޑިވްސް އޯޝަން ޕްލާސްޓިކް އަލައިއަންސް (މޯޕާ) އާއި ޕާލޭ މޯލްޑިވްސް ގުޅިގެން މިއަދު ފަށައިފި އެވެ.
"ޕެޓް ރިވާސް ލޮޖިސްޓިކްސް" ޕްރޮގްރާމް އިފްތިތާހުކޮށްދެއްވީ، ސީ ހައުސް ރެސްޓޯރަންޓްގައި ބޭއްވި ރަސްމިއްޔާތެއްގައި އެންވަޔަރަމެންޓް މިނިސްޓަރު ޑރ. ހުސެއިން ރަޝީދު ހަސަން އެވެ.
މި ރަސްމިއްޔާތުގައި މިނިސްޓަރު ވިދާޅުވީ ރާއްޖޭގެ ތިމާވެއްޓަށް ދިމާވެފައިވާ އެންމެ ބޮޑު އެއް މައްސަލަ އަކީ ކުނީގެ މައްސަލަ ކަމަށާއި އެ މައްސަލައަށް ދާއިމީ ހައްލެއް ނުގެނެވޭ ނަމަ ރާއްޖޭގެ ތިމާވެށި ސަލާމަތްނުކުރެވޭނެ ކަމަށެވެ. އަދި މިފަދަ ޕްރޮގްރާމެއް އަމިއްލަ ޖަމިއްޔާއަކުން ކުރިއަށްގެންދާތީ އުފާކުރައްވާ ކަމަށް ވެސް ވިދާޅުވި އެވެ.
Minister @DrHussainHassan as the Chief Guest of the launching ceremony of the 'PET Reverse Logistic Project' of @MOPAMaldives . Under this project PET bottles are collected from restaurants & cafés by the PET bottle producers and handed over to @parleymv for recycling. pic.twitter.com/jop9C2DnK5
— Ministry of Environment (@MoEnvmv) January 24, 2021
"ޕެޓް ރިވާސް ލޮޖިސްޓިކްސް" ޕްރޮގްރާމް އިފްތިތާހުކުރެއްވުމާ ގުޅިގެން މިނިސްޓްރީން ކުރި ޓްވީޓެއް
"މި އަހަރު އަޅުގަނޑުމެންގެ މިނިސްޓްރީން ކުރާނެ އެންމެ މުހިއްމު މަސައްކަތަކީ ކުނީގެ މައްސަލަ ހައްލުކުރަން ކުރާ ހަނގުރާމަ،" މިނިސްޓަރު ވިދާޅުވި އެވެ.
މި ޕްރޮގްރާމް ކުރިއަށް ގެންދަނީ މާލެ ސަރަހައްދުގައި ހުންނަ ރެސްޓޯރަންޓްތަކާއި ކެފޭތަކަށް އަމާޒުކޮށްގެންނެވެ. ފުޅީގައި ބަންދުކުރި ފެނާއި ލުއި ބުއިންތައް ވިއްކާ ހެޕީ މާކެޓާއި މާލޭ އޭރެޓެޑް ވޯޓާ ކޮމްޕެނީ އާއި އައިލެންޑް ބެވަރަޖެސް ވެސް މި ޕްރޮގްރާމުގައި ބައިވެރިވެ އެވެ. އެ ކުންފުނިތަކަށް މި ރަސްމިއްޔާތުގައި ވަނީ ހަނދާނީ ލިޔުން ދީފަ އެވެ.
"ޕެޓް ރިވާސް ލޮޖިސްޓިކްސް" އިފްތިތާހުކުރުމުގެ ރަސްމިއްޔާތުގައި އެންވަޔަރަމެންޓް މިނިސްޓަރު ހުސެން ރަޝީދު. -- ފޮޓޯ: ނިޝާން އަލީ/މިހާރު
މޯޕާގެ ރައީސް އަދި ކުރީގެ އެންވަޔަރަމެންޓް މިނިސްޓަރު ތޯރިގް އިބްރާހިމް ވިދާޅުވީ މި ޕްރޮގްރާމްގައި މިހާރު 120 އަށް ވުރެ ގިނަ ކެފޭ/ރެސްޓޯރަންޓް ބައިވެރިވެފައިވާ ކަމަށެވެ. އެ ޖަމިއްޔާ އާއި ރެސްޓޯރަންޓްތަކާ އެކު ވެފައިވާ އެއްބަސްވުމުގެ ދަށުން، އެ ތަންތަނުން ފެންފުޅި އާއި ޕްލާސްޓިކް އެހެން ބާވަތްތަކުގެ ފުޅި، ބްރޭންޑުތަކަށް ބަލައި ވަކިކުރާނެ އެވެ. ދެން އެތަކެތި އެ ވިޔަފާރިތަކަށް ސަޕްލައިކުރާ ކުންފުނިތަކުން އަލުން ނެގުމަށް ފަހު، ޕާލޭ މޯލްޑިވްސްއާ ހަވާލުކުރާނީ އެވެ. ޕާލޭއިން އެ ޕްލާސްޓިކް ފުޅިތައް ފޮނުވާނީ، އެ ޖަމިއްޔާއާ އެކު މަސައްކަތްކުރަމުން އަންނަ ގައުމުތަކަށެވެ. މީގެ ކުރިން ޓައިވާނާއި ސްރީ ލަންކާ އަށް ޕްލާސްޓިކް ރިސައިކަލް ކުރަން ޕާލޭ އިން ވަނީ ފޮނުވައިފަ އެވެ.
"ޕެޓް ރިވާސް ލޮޖިސްޓިކްސް" އިފްތިތާހުކުރުމުގެ ރަސްމިއްޔާތުގައި މޯޕާގެ ރައީސް ތޯރިގް އިބްރާހިމް ވާހަކަދައްކަވަނީ -- ފޮޓޯ: ނިޝާން އަލީ/މިހާރު
"އަޅުގަނޑުމެން މި ބުނަނީ [ސަޕްލަޔަރުން ގާތު] ރޭގަނޑު ހަމަ ރިވާސްއެއް ގޮތަށް އަލުން ނަގާށޭ، އެތަންތަން ބަންދުކުރާ ވަގުތު،" ތޯރިގް ވިދާޅުވި އެވެ.
އޭނާ ވިދާޅުވީ މި ޕްރޮގްރާމް ރަސްމީކޮށް ފެށުމުގެ ކުރިން އަޖުމަ ބަލަން 45 ދުވަހު މި ޕްރޮގްރާމް ހިންގި ކަމަށެވެ. އަދި އެ މުއްދަތުގައި ހަތަރު ޓަނުގެ ޕްލާސްޓިކް އެއްކުރެވުނު ކަމަށް ވިދާޅުވި އެވެ.
މާލެ އަށް އަމާޒުކޮށްގެން މި ޕްރޮގްރާމް ފެށި ނަމަވެސް ފަހުން މި ޕްރޮގްރާމް ހުޅުމާލޭގައި ހިންގަން ވެސް ވަނީ ރާވައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އޮނަރަބްލް އަފީފު ދީދީ
24 January 2021
ކެފޭތަކުން ފުޅިތައް ނަގައި ރިސަލްކަލް ކުރާށޭ ކިޔާފައި ބަޔަކު ވާވެއްދުމަށް އަޑު ފަތުރާން ނޫޅެ ތަހުޒީބު ދައުލަތް ތަކާއި ތިމާވެއްޓަށް އިސްކަންދޭ ޤައުމު ތަކުގައި ކަންކުރާގޮތަށް ކަންތައްކުރޭ. # ޕެޓް ބޮޓެލްސް ފަދަ ޕްލާސްޓިކް ބޭނުންކޮށްގެން އުފައްދާތަކެތި އުފެއްދުމަށް ހުއްދަދެނީ އެތަނުން އުފައްދާތަކެތި ރިސައިކަލް ކުރާނެ ޕްލާންޓްތައް ހަދާ އެތަންތަން އޮޕަރޭޓް ކުރަން ފެއްޓުމުން. އަދި މަހަކު ވަކިވަރަކަށް ރިސައިކަލްކުރާން މަޖުބޫރުކޮށްފަ. މިއީ މިކަންކުރާގޮތް.
އޮނަރަބްލް އަފީފު ދީދީ
24 January 2021
ޕްލާސްޓިކް މަނާކުރާ ޤާނޫނުގެ ދަށުން ރާއްޖޭގައި ތިޔަފުޅިތައް މަނާކުރާންޖެހޭތީ "ހީލަތްތެރި ރޭވުމެއްގެ ތެރެއިން" ނިކުމެ ތިއުޅެނީ ޤާނޫނު ތަންފީޒު ވިޔަނުދޭން. # ރާއްޖޭގައި ޕެޓް ބޮޓެލްސްގަ ފިޒީ ޑްރިންކްސް ވިއްކާ މަހުޖަނުންނާއި ޕްލާސްޓިކް ފުޅީގައި ފެން ބަންދުކޮށް ވިއްކާ ފަރާތް ތަކާއި ގުޅިގެން ޔާމީނުގެ ވަޒީރަކަށް ހުރެ އެތައް ގޯސްތަކެއް ހަދާފައިވާމީހާ ނިކުމެ ތިހުރީ "ރާއްޖޭގެ ނަން ބޭނުނުްކޮށްގެން" އަދިވެސް ފައިސާފޮއްޗެއް ލިބޭނެ މޮޅުގޮތެއް ހޯދާންވެގެން.