އިންޑޮމީ ނޫޑްލްސްގެ އެންމެ މަގުބޫލު ރަހައިގެ ވެރިޔާ މަރުވެއްޖެ

އަހުމަދު އަދްޝަން، މިހާރު

30 ޖެނުއަރީ 2021 - 06:28

އިންޑޮނީޝިއާގެ މަޝްހޫރު ނޫޑުލްސް ބްރޭންޑެއް ކަމަށްވާ "އިންޑޮމީ" ގެ އެންމެ މަގުބޫލު އެއް ރަހަ ކަމަށްވާ "މި ގޮރެން" ގެ މޭސްތިރިޔާ ނުނަކް ނޫރައިނީ މަރުވެއްޖެ އެވެ.

އުމުރުން 59 އަހަރުގައި އޭނާ މަރުވީ ބުދަ ދުވަހު އެވެ. މަރާ މެދު ހިތާމަ ފާޅުކޮށް ސޯޝަލް މީޑިއާގައި ވާހަކަ ދެއްކި އެތައް ބަޔަކު ވަނީ ނޫޑްސްލްގެ ހިތްގައިމު ރަހައެއް ގެނެސްދޭން ނޫރައިނީ ކުރި މަސައްކަތްތަކަށް ޝުކުރު އަދާކޮށް އޭނާގެ ލެގަސީ އިންޑޮމީން ދަމަހައްޓަން ގޮވާލައިފަ އެވެ.

އިންޑޮމީގެ ތަރުޖަމާނު ވިދާޅުވީ ނޫރައިނީ ވަކިވެ ދިއުމަކީ ކުންފުންޏަށް ލިބޭނެ ވަރަށް ބޮޑު ދެރައެއް ކަމަށާއި އޭނާ އަކީ އެ ކުންފުނި ބައްޓަންވުމުގައި ވަރަށް ބޮޑު ހިއްސާއެއް އަދާކުރި މީހެއް ކަމަށެވެ. "މި ގޮރެން" ފްލެވާ އެހާ މަގުބޫލު އެއްޗަށްވީ ވެސް ނޫރައިނީ އެ ރަހަ ތަރައްގީކުރަން ކުރި ހިތްވަރުގަދަ މަސައްކަތުން ކަމަށް އޭނާ ވިދާޅުވި އެވެ.

ނަމަވެސް ކުއްލި ގޮތަށް ނޫރައިނީ މަރުވި ސަބަބެއް އިންޑޮމީން ހާމައެއްނުކުރެ އެވެ.

we just lost Mrs. Nunuk Nuraini, the genius flavor developer of people's beloved instant noodles 'Indomie' today. may her soul rest in love and her legacies will definitely forever live on. you are truly a legend for indonesians. pic.twitter.com/IDn8M682a2
— gustirapi (@gustirapi) January 27, 2021

"މި ގޮރެން" ގެ ރަހަ އާންމުންގެ މެދުގައި ވަރަށް ބޮޑު މަގުބޫލުކަމެއް ހޯދި އިރު ނޫރައިނީ ވަނީ އިންޑޮމީ ކުންފުނީގައި ފްލެވާ ޑިވެލޮޕްމަންޓް މެނޭޖަރެއްގެ ގޮތުގައި ގާތްގަނޑަކަށް 30 އަހަރު މަސައްކަތްކޮށްފަ އެވެ.

އިންސްޓެންޓް ނޫޑްލްސްއެއްގެ ގޮތުގައި "އިންޑޮމީ" ބާޒާރަށް ނެރުނީ 1972 ގަ އެވެ. އަދި އެ ބްރޭންޑްގެ "ކަލްޓް" ފްލެވާއެއްގެ މަގާމު ހޯދި "މި ގޮރެން" ބާޒާރަށް ނެރުނީ 1983 ގަ އެވެ. އޭގެ ފަހުން 2006 ގައި "މި ގޮރެން" ގެ އެއްބަނޑު ރަހައެއްގެ ގޮތުގައި "މި ގޮރެން ކިރޫކް 8އެކްސް" ގެ ނަމުގައި އާ ވޭރިއަންޓެއް ވެސް ނެރެފައިވެ އެވެ.