ވިޔަފާރި / ދިވެހި އިންޝުއަރެންސް ކޮމްޕެނީ

އިތުރު ކުންފުންޏަކަށް އިންޝުއަރެންސްގެ ލައިސަންސް ދީފި

ދިވެހި އިންޝުއަރެންސް ކުންފުންޏަށް އެމްއެމްއޭގެ ގަވަރުނަރު އަޒީމާ އާދަމް މިއަދު ލައިސަންސް ހަވާލުކޮށްދެއްވަނީ. ފޮޓޯ: އެމްއެމްއޭ

އަބްދުﷲ ޖަމީލު، މިހާރު

02 ޖޫން 2016 - 19:19

2 comments

ރާއްޖޭގައި އިންޝުއަރެންސްގެ ހިދުމަތް ދިނުމަށް އިތުރު ކުންފުންޏަކަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ލައިސަންސް ދީފި އެވެ.

މަރުކަޒީ ބޭންކުން އިންޝުއަރެންސްގެ ހިދުމަތް ދިނުމަށް މިއަދު ލައިސަންސް ދިނީ ދިވެހި އިންޝުއަރެންސް ކިޔާ 100 ޕަސެންޓް ދިވެހިން ހިއްސާވާ ކުންފުންޏަކަށެވެ. އެ ކުންފުނީގެ އިސް ބޭފުޅެއްގެ ގޮތުގައި ހަރަކާތްތެރިވަނީ އެލައިޑް އިންޝުއަރެންސްގައި ގިނަ ދުވަސްތަކެއް ވަންދެން އިސް މަގާމުތަކެއް ފުރުއްވާފައިވާ އަދި އެ ކުންފުނީގެ ކުރީގެ މެނޭޖިން ޑިރެކްޓަރު އަބްދުލް ވާހިދު ތައުފީގެވެ. އޭގެ އިތުރުން އެންސިސް މެނޭޖިން ޑިރެކްޓަރު މުހައްމަދު ވަސީމް ވެސް ހިމެނިވަޑައިގަންނަވަ އެވެ.

އެމްއެމްއޭ އިން ބުނީ އެ ކުންފުންޏަށް ލައިސަންސް ދިނީ ރާއްޖޭގައި ޖެނެރަލް އިންޝުއަރެންސްގެ ހިދުމަތް ދިނުމަށް ކަމަށެވެ. އަދި އެ ކުންފުންޏަށް ލައިސަންސް ދިނީ ހަ މަސް ދުވަހުގެ ތެރޭގައި ހިދުމަތް ދޭން ފަށާ ގޮތަށް ކަމަށް ވެސް އެ އެ އޮތޯރިޓީން ބުންޏެވެ.

"މި އިންޝުއަރެންސް ކުންފުނި ގާއިމުކުރުމުން އިންޝުއަރެންސް ދާއިރާ ފުޅާވެ ތަރައްގީވުމަށް މަގުފަހިވެގެންދާނެ. އަދި އިންޝުއަރެންސް ދާއިރާގެ ވާދަވެރިކަން އިތުރުވެ ރައްޔިތުންނާ ވިޔަފާރިތަކަށް ބޭނުންވާ އިންޝުއަރެންސްގެ ހިދުމަތްތައް އެކަށީގެންވާ ގޮތަށް ފޯރުކޮށްދިނުމަށް ވެސް ބާރުއެޅިގެންދާނެ،" އެމްއެމްއޭ އިން ނެރުނު ނޫސްބަޔާނެއްގައި ބުނެފައިވެ އެވެ.

ރާއްޖޭގައި އިންޝުއަރެންސްގެ ހިދުމަތް ދިނުމަށް މިދިޔަ މާޗް މަހު ފަހުކޮޅު ސޮލަރެލް އިންޝުއަރެންސް އަށް ލައިސަންސް ދީފައިވެ އެވެ. އަދި އެއީ އިންޝުއަރެންސްގެ ހިދުމަތް ދިނުމަށް ލައިސަންސް ދިން ފުރަތަމަ ދިވެހި ކުންފުންޏެވެ.

ރާއްޖޭގައި މި ވަގުތު އިންޝުއަރެންސްގެ ހިދުމަތް ދެނީ އެލައިޑް އިންޝުއަރެންސް އާއި ސޮލަރެލް އިންޝުއަރެންސް އަދި ލަންކާގެ ދެ ކުންފުންޏަކުންނެވެ.