ވެކްސިނާ އެކު ރައީސްގެ އުއްމީދަކީ ހަ މަސް ތެރޭ ކޮވިޑުން އަރައިގަތުން

ރާއްޖޭގައި ދިރިއުޅޭ ހުރިހާ އެންމެންނަށް ކޮވިޑް-19 ވެކްސިން ޖަހައި، އުއްމީދަކީ ކުރިއަށް އޮތް ހަ މަސް ތެރޭގައި ބަލިން އަރައިގަތުން ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.

ކޮވިޑް-19 އިން ރައްކާތެރިވުމަށް ރާއްޖޭގައި ވެކްސިން ޕްރޮގްރާމް ފެށުމަށް ސޯޝަލް ސެންޓަރުގައި ބޭއްވި ރަސްމިއްޔާތުގައި ބައިވެރިވެވަޑައިގެން ރައީސް ވިދާޅުވީ ވޭތުވެދިޔަ އަހަރެއްހާ ދުވަހުގެ ތެރޭގައި ކޮވިޑާ ހެދި ރައްޔިތުން އުޅެން ޖެހިފައިވާ ދަތި އުނދަގުލުން އަރައިގަތުމުގެ މަގު ރާއްޖެއަށް ވެސް ފަހިވެފައިވާ ކަމަށެވެ. ކޮވިޑުގެ ވައިރަހުން ސަލާމަތްވުމަށް އޮތް ހަމައެކަނި ގޮތަކީ ވެކްސިން ކަމަށް ސިއްހީ މާހިރުން ދެއްވާ ލަފާ ގަބޫލުކުރަން ޖެހޭ ކަމަށް ރައީސް ވިދާޅުވި އެވެ.

އެ މަނިކުފާނު މިއަދު ވެސް ޔަގީންކަން ދެއްވީ ރައްޔިތުންނަށް ބޭނުންވާ މިންވަރަށް ވެކްސިން ހަމަޖެހޭނެ ކަަމަށެވެ. ރާއްޖޭގައި މިހާރު ވެކްސިން ހުރީ 50،000 މީހުންނަށް ޖެހޭވަރަށެވެ. ވެކްސިންގައި އިސްކަންދޭނެ ތަރުތީބެއް ކަނޑައަޅާފައިވާ އިރު މާލެ އާއި ރަށްރަށުގައި ވެސް ފުރަތަމަ ވެކްސިން ދެނީ ސިއްހީ ހިދުމަތްތެރިންނަށެވެ.

ރާއްޖެ ގެނެސްފައިވާ އިންޑިއާގެ ސީރަމް އިންސްޓިޓިއުޓްގައި ހަދާ އޮކްސްފޯޑް ވެކްސިން، ރައްކާތެރިކަމުގެ ޔަގީންކަން ރައްޔިތުންނަށް ދެއްވުމުގެ ގޮތުން ރައީސް އާއި އަނބިކަނބަލުން ފަޒްނާ އަހްމަދު މިއަދު ވަނީ ކޮވިޝީލްޑްގެ ފުރަތަމަ ޑޯޒް ޖައްސަވައިފަ އެވެ. މީގެ އިތުރުން ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދާއި އުއްތަމަފަނޑިޔާރު މުއުތަސިމް އަދުނާނާއި ބައެއް ވަޒީރުންނާއި ސިއްހީ ދާއިރާ ހިމެނޭ ގޮތުން ޖުމްލަ 34 މީހަކަށް އެތަނުގައި ވެކްސިން ޖެހި އެވެ.

ވެކްސިން ޕްރޮގްރާމް ފައްޓަވައި ދެއްވަން ރައީސް ވާހަކަފުޅު ދައްކަވަނީ. -- ފޮޓޯ: އަހްމަދު އަވްޝަން އިލްޔާސް

ކޮވިޑުން ރައްކާތެރިވެ ތިބެން ރައްޔިތުން ވަރަށް ބޮޑު އެއްބާރުލުމެއް ދިން ކަމަށާއި ވެކްސިންގައި ވެސް އެ ނަމޫނާ ދައްކަވަން ރައީސް އެދިވަޑައިގަތެވެ. އަދި ހުރިހާ ރައްޔިތުން ވެސް ވެކްސިން ޖެހުމަށް އިލްތިމާސްކުރައްވައިފަ އެވެ.

"އިރާދަކުރެއްވިއްޔާ މާ ލަހެއް ނުވެ މިކަމުން އަރައިގަނެވޭނެ،" ރައީސް ވިދާޅުވި އެވެ.

ވެކްސިން ޖައްސަވައި 15 މިނެޓް މަޑުކުރެއްވުމަށް ފަހު ރައީސް ވަނީ ރާއްޖެ އިން އެންމެ ފުރަތަމަ ވެކްސިން ޖެއްސެވި އައިޖީއެމްއެޗުގެ ޑޮކްޓަރު ޝިރާނީ އަބްދުއްރަހީމްއާ ބައްދަލުކުރައްވައިފަ އެވެ. ސޯޝަލް ސެންޓަރުގައި ވެކްސިން ޕްރޮގްރާމް ފެށުމުގެ ރަސްމިއްޔާތު ބޭއްވުމާ އެކު އައިޖީއެމްއެޗާއި އޭޑީކޭ އާއި ހުޅުމާލެ ހޮސްޕިޓަލްގެ އިތުރުން ޓްރީ ޓޮޕް ހޮސްޕިޓަލުގައި ވަނީ ވެކްސިން ދޭން ފަށައިފަ އެވެ. މީގެ އިތުރުން ހދ. ކުޅުދުއްފުއްޓާއި އައްޑޫގައި ވެސް މިއަދު ވެކްސިން ޖަހަން ފަށާނެ އެވެ.