ކިޓްކެޓް ވަގަށް ނެގުމުން ބަދަލުގައި 6500 ކިޓްކެޓް ދީފި

ހަންޓަ ޖޮބިންސް އަށް ހަދިޔާ އަށް ލިބުނު 6500 ކިޓްކެޓާ އެކު ކާރުގައި. -- ފޮޓޯ: އޭޕީ

ނިއުމަތުﷲ އިދުރީސް، މިހާރު

11 ނޮވެމްބަރ 2016 - 06:24

އެމެރިކާގެ ކޮލެޖެއްގައި އުޅޭ ދަރިވަރަކު ކާރުގައި ކިޓްކެޓް ޗޮކްލެޓެއް ބާއްވާފައި އޮއްވައި ވަގަށް ނެގުމުން، ކިޓްކެޓް ކުންފުނިން އެ ދަރިވަރަށް 6500 ކިޓްކެޓް ހަދިޔާއަކަށް ދީފި އެވެ.

ކަންސަސް ސްޓޭޓް ޔުނިވަސިޓީގެ ދަރިވަރެއް ކަމަށްވާ ހަންޓަ ޖޮބިންސް ނޫހަކަށް ކިޔައިދީފައިވާ ގޮތުގައި އޭނާގެ ކިޓްކެޓް ވަގަށް ނެގީ މިދިޔަ މަހު ފަހުކޮޅު ކާރުގެ ކަޕް ހޯލްޑާ ތެރޭގައި ބާއްވާފައި ޔުނިވަސިޓީ އިމާރާތުގެ ތެރެއަށް ވަން ވަގުތު އެވެ. ކިޓްކެޓް ވަގަށް ނެގި މީހާ ނޯޓެއް ބާއްވާފައި އޮތެވެ.

"އަހަންނަށް ކިޓްކެޓް ވަރަށް މީރެވެ. އެހެންވެ ކާރުގެ ދޮރު ހުޅެވޭތޯ ބެލި އިރު ހުރީ ތަޅު ނުލަ އެވެ. ކިޓްކެޓް ނޫން އެހެން އެެއްވެސް އެއްޗެއް ނުނަގަމެވެ. މައާފްކުރާށެވެ. އަހަރެން މި ހުރީ ވަރަށް ބަނޑުހައިވެފަ އެވެ." ވަގުގެ ނޯޓްގައި ލިޔެފައިވެ އެވެ.

ޖޮބިންސް އަށް އެތައް ބައިވަރު ކިޓްކެޓެއް ލިބުނީ ވަގު ކަލޭގެ ބޭއްވި ނޯޓްގެ ފޮޓޯއެއް ޓްވީޓްކުރުމާ އެކު ސޯޝަލް މީޑިއާގައި ވައިރަލް ވެގެން ދިއުމަށް ފަހުގަ އެވެ. ކިޓްކެޓް އުފައްދާ ހާޝީ ކުންފުންޏަށް މި ޕޯސްޓް ފެނުމުން ޖޮބިންސް އަށް 6500 ކިޓްކެޓް ބާ ފޮނުވި އެވެ. އޭނާ މި ހުރިހާ ކިޓްކެޓްތަކެއް ކާރުގައި ބަހައްޓައިގެން އޭނާގެ އެކުވެރިންނަށް ބަހާ ހުސްކޮށްލީ އެވެ.