ޑެންވާ (ފެބްރުއަރީ 21) - ބޯއިން މަރުކާގެ ޖެޓެއް އެއާޕޯޓުން ނައްޓާލިތަނާހެން އެއް އިންޖީނަށް މައްސަލައެއް ދިމާވެ، އިންޖީނުގެ ބައިތައް އެމެރިކާގެ ޑެންވާ ސިޓީގައި މީހުން ދިރިއުޅޭ ސަރަހައްދަކަށް ވެއްޓިއްޖެ އެވެ.
މައްސަލަ ދިމާވި ބޯއިން 777 ގެ ބޯޓުން 231 ފަސިންޖަރުންނާއި 10 ކްރޫން ދަތުރުކުރި އެވެ. އެ ހާދިސާގައި އެއްވެސް މީހަކަށް ގެއްލުމެއް ނުލިބެ އެވެ. ބޯޓު ވަނީ ސަލާމަތުން ޑެންވާ އެއާޕޯޓަށް ޖައްސައިފަ އެވެ.
ބްރޫމްފީލްޑް ޓައުންގެ ފުލުހުން ވަނީ ގެއެއްގެ ބަގީޗާ ކައިރިއަށް ވެއްޓިފައިވާ، މަތިންދާ ބޯޓެއްގެ އިންޖީނުގެ ކޭސިންގެ ފޮޓޯތައް އާއްމުކޮށްފަ އެވެ. ބޯޓުގެ އެއް އިންޖީނުން ދުން އަރާ މަންޒަރުގެ ފޮޓޯތަކެއް ވެސް ވަނީ އާއްމުކޮށްފަ އެވެ.
ޕަސިންޖަރުން ވަނީ ބޯޓު ނައްޓާލުމާ އެކު ގަދަ އަޑުފައްގަނޑެއް އިވުނު ކަމަށް ބުނެފަ އެވެ. ފްލައިޓުގައި އިން ފަސިންޖަރަކު އޭޕީ ނިއުސް އެޖެންސީ އަށް ބުނީ ބާރު އަޑެއް އިވުމާ އެކު ޕައިލެޓް އެނައުންސްމަންޓެއް ދިން ކަމަށެވެ.
"ދެން ބޯޓު ވަރަށް ބާރަށް ތެޅެން ފެށި. އަދި ތިރިއަށް ދާހެން ހީވި،" ބޯޓުން ދަތުރުކުރި ޑޭވިޑް ޑެލޫސިއާ ބުންޏެވެ.
ބްލޫމްފީލްޑުގެ ބައެއް މީހުން ވެސް ބުނެފައި ވަނީ ބާރު އަޑެއް އިވުނު ކަމަށާއި މަތިންދާ ބޯޓުގެ އިންޖީނުން ބައިތައް ވެއްޓުނު މަންޒަރު ފެނުނު ކަމަށެވެ.
ޔުނައިޓެޑް އެއާލައިންސްގެ ފްލައިޓް 328 ދަތުރު ކުރަން ހަމަޖެހިފައި އޮތީ ހޮނޮލުލޫ އަށެވެ. މައްސަލަ ދިމާވީ އެ ބޯޓުގެ ކަނާތްފަރާތުގެ އިންޖީނަށް ކަމަށް ފެޑެރަލް އޭވިއޭޝަން އެޑްމިނިސްޓްރޭޝަން (އެފްއޭއޭ) އިން ބުންޏެވެ. އެފްއޭއޭ އާއި ނޭޝަނަލް ޓްރާންސްޕޮޓޭޝަން ސޭފްޓީ ބޯޑުން ވަނީ އެ ހާދިސާ ތަހުގީގު ކުރުމަށް ނިންމައިފަ އެވެ.
