ބޯއިން 777 ގެ ބޯޓުތައް ގްރައުންޑް ކުރަން އަންގައިފި

ޔުނައިޓެޑް އެއާލައިންސްގެ ބޯޓުގެ އިންޖީނުގެ ބައިތައް ޑެންވާ ސިޓީގައި މީހުން ދިރިއުޅޭ ސަރަހައްދަކަށް ވެއްޓިފައި. --ފޮޓޯ:އޭއެފްޕީ

ހަސަން އާމިރު، މިހާރު

22 ފެބުރުއަރީ 2021 - 14:03

ވޮޝިންޓަން (ފެބްރުއަރީ 22) - ބޯއިން މަރުކާގެ ޖެޓެއް އެއާޕޯޓުން ނައްޓާލިތަނާހެން އެއް އިންޖީނަށް މައްސަލައެއް ދިމާވެ، އިންޖީނުގެ ބައިތައް އެމެރިކާގެ ޑެންވާ ސިޓީގައި މީހުން ދިރިއުޅޭ ސަރަހައްދަކަށް ވެއްޓުނު ހާދިސާ އަށް ފަހު ބޯއިން 777 ގެ ބޯޓުތައް ގްރައުންޑް ކުރަން އެ ކުންފުނިން އަންގައިފި އެވެ.

މައްސަލަ ދިމާވި ބޯއިން 777 ގެ ބޯޓުން 231 ފަސިންޖަރުންނާއި 10 ކްރޫން ދަތުރުކުރި އެވެ. އެ ހާދިސާގައި އެއްވެސް މީހަކަށް ގެއްލުމެއް ނުލިބެ އެވެ. ބޯޓު ވަނީ ސަލާމަތުން ޑެންވާ އެއާޕޯޓަށް ޖައްސައިފަ އެވެ.

ބޯއިން 777 ގެ ބޯޓުތައް ބޭނުންކުރާ ޔުނައިޓެޑް އެއާލައިންސް އާއި ޖަޕާނުގެ ބޮޑު ދެ އެއާލައިނަކުން ވަނީ 62 ބޯޓުގެ ދަތުރުތައް ހުއްޓާލައިފަ އެވެ. ކޮރެއަން އެއާ އިން ވެސް ވަނީ ހަ ބޯޓު ގްރައުންޑް ކުރާނެ ކަމަށް ބުނެފަ އެވެ.

ބޯއިން އިން ބުނީ ޑެންވާގައި މައްސަލަ ޖެހުނު ބޯޓުގައި އަޅާފައިވާ އިންޖީނު ބޭނުންކުރާ 128 މަތިންދާ ބޯޓު ގްރައުންޑް ކުރަން އަންގާފައިވާނެ ކަމަށެވެ.

"އިންޖީނަށް ދިމާވި މައްސަލަ ތަހުގީގު ކުރަމުން ދިޔަ ނަމަވެސް، މިހާރު ބޭނުންކުރާ 69 ބޯޓާއި ބޭނުންކުރަން ތައްޔާރުވެފައިވާ 777 ގެ 59 ބޯޓުގެ އޮޕަރޭޝަންތައް ހުއްޓާލުމަށް ވާނީ އެދިފައި،" ބޯއިން އިން ނެރުނު ބަޔާނެއްގައި ބުނެފައިވެ އެވެ.

މައްސަލަ ޖެހުނު ބޯޓުގައި ބޭނުންކޮށްފައިވަނީ ޕްރެޓް އެންޑް ވިޓްނީ 4000-112 ގެ އިންޖީނެވެ.

ފެޑެރަލް އޭވިއޭޝަން އެޑްމިނިސްޓްރޭޝަން (އެފްއޭއޭ) އިން ބުނެފައި ވަނީ 777 ގެ މޮޑެލްގެ ބޯޓުތައް ބޭނުންކުރާ އެމެރިކާގެ ހަމައެކަނި އެއާލައިނަކީ ޔުނައިޓެޑް އެއާލައިންސް ކަމަށެވެ. ދެން އެ މަރުކާގެ ބޯޓުތައް ބޭނުން ކުރަނީ ޖަޕާނާއި ސައުތު ކޮރެއާގެ ބޯޓުތަކުގަ އެވެ.