މިނިއާޕޮލިސް އިން ފްލޮއިޑުގެ އާއިލާ އަށް 27 މިލިއަން ޑޮލަރު

ނޭވާ ނުލެވޭ ކަމަށް ޖޯޖް ފްލޮއިޑް ވަނީ 20 ފަހަރު ބުނެފައި. --ފޮޓޯ:އޭއެފްޕީ

ހަސަން އާމިރު، މިހާރު

13 މާޗް 2021 - 11:58

ވޮޝިންޓަން (މާޗް 13) - އަތުގައި އެއްވެސް ހަތިޔާރެއް ނެތް އެމެރިކާގެ ކަޅު ނަސްލުގެ މީހެއް ކަމަށްވާ ޖޯޖް ފްލޮއިޑް ފުލުހުން ހައްޔަރު ކުރަން އުޅުމުގެ ތެރޭގައި މަރުވި މައްސަލައިގައި ފްލޮއިޑުގެ އާއިލާ އަށް 27 މިލިއަން ޑޮލަރު މިނިއާޕޮލިސް ސިޓީން ދިނުމަށް އެއްބަސްވުމަކަށް އާދެވިއްޖެ އެވެ.

ފްލޮއިޑުގެ އާއިލާ އިން މިދިޔަ ޖުލައި މަހު ވަނީ މިނިއާޕޮލިސް ސިޓީ ކައުންސިލާއި ހަތަރު ޕޮލިސް އޮފިސަރުންނާ ދެކޮޅަށް މައްސަލަ ހުށަހަޅައިފަ އެވެ.

ކަޅު ނަސްލުމުގެ 46 އަހަރުގެ ފްލޮއިޑް ހައްޔަރު ކުރަން އުޅުމުގެ ތެރޭގައި އޭނާ މަރުވީ ފުލުސް އޮފިސަރު ޑެރެކް ޗައުވިން ފްލޮއިޑުގެ ކަރަށް ކަކުލުން އަރައި އެތައް އިރެއްވަންދެން އިނދެ އޭނާ ނޭވާ ފާސްކޮށްލުމުންނެވެ. އޭރު ފްލޮއިޑް ދިޔައީ އޭނާ ހާސްވެގެން މަރުވަނީ ކަމަށް ގޮވަމުންނެވެ. ފޭކް ނޫޓްތަކެއް ގެންގުޅޭ ކަމަށް ތުހުމަތުކޮށް ފްލޮއިޑް ހައްޔަރުކުރަން އުޅުމުގެ ތެރޭގައި އޭނާ މަރާލުމާ ގުޅިގެން އިތުރު ތިން ފުލުހަކު ވެސް ވަނީ ވަޒީފާ އިން ވަކިކޮށްފަ އެވެ.

ޗައުވިން މީހަކު މަރާލި މައްސަލައިގައި ޖޫރީން ކަނޑައެޅުން މިހާރު ދަނީ ކުރިއަށެވެ. މައްސަލައިގެ އަޑުއެހުންތައް ކުރިއަށްދާނީ މިމަހު 29 އިން ފެށިގެންނެވެ.

ޕޮލިސް އޮފިސަރުގެ މައްޗަށް ހިންގާ ޝަރީއަތުގެ ކުރިން ފްލޮއިޑުގެ އާއިލާ އަށް 27 މިލިއަން ޑޮލަރު ދިނުމަށް މިނިއާޕޮލިސްގެ ސިޓީ ކައުންސިލުން އެއްބަސްވީ އެ ފަރާތާ ދެކޮޅަށް ހުށަހެޅި މައްސަލައިގަ އެވެ.