ފޭދޫގެ މާރާމާރީއާ ގުޅިގެން ފަސް މީހަކު ހައްޔަރުކޮށްފި

މިދިޔަ ބުރާސްފަތިދުވަހު އައްޑޫ ފޭދޫގައި ހިންގި މާރާމާރީއާ ގުޅިގެން ފަސް މީހަކު ހައްޔަރުކޮށްފައިވާ ކަމަށް ފުލުހުން ބުނެފި އެވެ.

ދެ ގްރޫޕެއްގެ ދެމެދުގައި ހިންގި މާރާމާރީގައި ހަތް މީހަކު ޒަހަމްވެގެން ފަރުވާ ދޭން ޖެހުނެވެ. މި މާރާމާރީއާ ގުޅިގެން ކޯޓް އަމުރެއްގެ ދަށުން ގަން ޕޮލިސް ސްޓޭޝަނުން މިއަދު ހައްޔަރުކުރީ 18 އަހަރާއި 20 އަހަރާއި 32 އަހަރުގެ މީހެއްގެ އިތުރުން 21 އަހަރުގެ ދެ މީހެކެވެ.

ނަމަވެސް އެ މީހުންނާ ބެހޭ އިތުރު އެއްވެސް ތަފުސީލެއް ފުލުހުން ހާމައެއް ނުކުރެ އެވެ. މައްސަލަ އިތުރަށް ތަހުގީގުކުރަމުން އަންނަ ކަމަށް ފުލުހުން ބުންޏެވެ.

މިދިޔަ ބުރާސްފަތި ދުވަހުގެ ރޭ ހިތަދޫގައި ވެސް މާރާމާރީއެއް ހިންގައި މީހެއްގެ ބޯ ތޫނު އެއްޗަކުން ހަމަލާދީ ފަޅާލާފައިވެ އެވެ. އެ ހާދިސާއާ ގުޅިގެން އަދި އެއްވެސް މީހަކު ހައްޔަރެއް ނުކުރެ އެވެ.