ވެންޓިލޭޓަރުތަކުގެ މައްސަލައިގައި އަމަލުކުރާނެ ގޮތުގެ ލަފާ އޭޖީ ދެއްވައިފި، ތަފުސީލު އަދި އާންމެއް ނުކުރޭ

ކޮވިޑް-19 ގައި ހާލު ދެރަވާ މީހުންނަށް ފަރުވާ ދިނުމަށް ރާއްޖެ އަށް ބޭނުންވި ވެންޓިލޭޓަރުތައް ނުލިބުމުން، އެ މައްސަލައިގައި އަމަލުކުރަންވީ ގޮތުގެ ލަފާ އެޓާނީ ޖެނެރަލް (އޭޖީ) އިބްރާހިމް ރިފްއަތު ދެއްވައިފި އެވެ.

ނަމަވެސް ސަރުކާރުގެ ކަމާގުޅޭ އިދާރާތަކުން އެ ލަފައާ ގުޅޭ ގޮތުން އަދި ވާހަކަ ނުދައްކާތީ ތަފުސީލެއް ނުލިބެ އެވެ. ހެލްތު މިނިސްޓްރީ އާއި ބަންޑާރަ ނައިބުގެ އޮފީހުން ވެސް އަދި އެ ލަފާ ހާމައެއް ނުކުރެ އެވެ.

ދުބާއީގެ އެގްޒެކިއުޓާސް ޖެނެރަލް ޓްރޭޑިން ކުންފުންޏާ ހަވާލުކުރީ 75 ވެންޓިލޭޓަރު ހޯދާށެވެ. އޭގެ ތެރެއިން މިހާތަނަށް ރާއްޖެ ފޮނުވީ 15 ވެންޓިލޭޓަރެވެ. މީގެ ތެރެއިން ފަހުން ފޮނުވި ފަސް ވެންޓިލޭޓަރުގެ ބައެއް އާލާތްތައް މަދުވެ. އެއްބަސްވުމުގައި ބުނާގޮތުން ނަމަ ރާއްޖެއަށް އަދި ވެސް 60 ވެންޓިލޭޓަރު ފޮނުވަން ޖެހެ އެވެ.

ވެންޓިލޭޓަރުތަކާ ގުޅޭގޮތުން ހެލްތު މިނިސްޓަރު އަހުމަދު ނަސީމް މި މަހުގެ 6 ވަނަ ދުވަހު ވިދާޅުވެފައި ވަނީ އެ އެއްޗެހިތައް ލިބޭނެ ސީދާ ތާރީޚެއް އަދި ވެސް ނޭނގޭ ކަމަށެވެ. ދުބާއީގެ ކުންފުނީގެ އަމަލުތައް ހުރި ގޮތުން އެ އެއްޗެހި ލިބޭނެހެން ހީނުވާ ކަމަށާއި އެކަމުގައި އެހެން ގޮތަކަށް ފިޔަވަޅު އަޅަން ޖެހިފައިވާ ކަމަށް ދެކެވަޑައިގަންނަވާ ކަމަށް ވިދާޅުވި އެވެ.

"ކޮންމެ ވެސް އެއްގޮތަކަށް ނިންމަން ޖެހެއެއް ނޫންތޯ ވެންޓިލޭޓަރު ކަންތައް. އަޅުގަނޑުމެން އެ އެއްޗެހި ގަބޫލުކުރާނީތޯ ނުވަތަ އެ މީހުން ފޮނުވާ މުއްދަތަކަށް އަޅުގަނޑުމެން މަޑުމަޑުން ތިބޭނީތޯ،" ނަސީމް ވިދާޅުވި އެވެ.

Ventilator thah libeyne kamuge yageenkan nethumun AG ge lafayakah edhijje

The most trusted news source in the Maldives

Mihaaru

އެކަމާ ގުޅިގެން ހެލްތު މިނިސްޓްރީން ވަނީ މިދިޔަ ހަފުތާގައި އޭޖީގެ ލަފާ ލިބިފައިވާކަން ޔަގީންކޮށްދީފަ އެވެ.

އެގްޒެކިއުޓާސް އަކީ ވެންޓިލޭޓަރުތައް ގަންނަ އެންމެ ބޮޑު އަގުގައި ހަވާލުކުރި ކުންފުންޏެވެ. އެ ކުންފުނިން ވެންޓިލޭޓަރުތައް ފޮނުވަން 34 މިލިއަން ރުފިޔާ ހުށަހެޅުމުން މާލިއްޔަތު ގަވާއިދާ ޚިލާފަށް، އެއްބަސްވުމުގައި ސޮއި ވެސް ނުކޮށް 30 މިލިއަން ރުފިޔާ އެއްފަހަރާ ވަނީ ދީފަ އެވެ.

އެއްބަސްވުމުން ވަކި ފަރާތަކަށް ނާޖާއިޒު މަންފާއެއް ހޯދައިދިން ކަމަށް އެކަށީގެންވާ މިންވަރަށް ހެއްކާއި ގަރީނާ ހުރި ކަމަށް ބުނެ ކުރީގެ ހެލްތު މިނިސްޓަރު އަބްދުﷲ އަމީނާއި އެ މިނިސްޓްރީގެ ބިޑް ކޮމިޓީ ހިމެނޭގޮތުން 12 މީހެއްގެ މައްޗަށް ދައުވާކުރަން އެންޓި ކޮރަޕްޝަން ކޮމިޝަން (އޭސީސީ) އިން ފޮނުވި އެވެ.

އެކަމަކު އެ މައްސަލަތަކުގައި ދައުވާކުރަން އެކަށީގެންވާ ހެކި ނެތް ކަމަށް ބުނެ ޕްރޮސިކިއުޓަ ޖެނެރަލް އަނބުރާ އޭސީސީއަށް އެ މައްސަލަ ފޮނުވާލީ އެވެ. އެ ކޮމިޝަނުން އެދިގެން އަދި ފަހުން ފޮނުވި އިތުރު ކަންކަން ވެސް ބެލުމަށް ފަހު ވެސް ޕީޖީން ނިންމީ ދައުވާ ނުކުރާށެވެ. އެކަމަކު ރައްޔިތުންގެ ކަންބޮޑުވުން ވެސް އިންތިހާ އަށް އޮތް މައްސަލައަކަށް ވާތީ ދައުވާ ނުކުރަން ނިންމި ނިންމުން މުރާޖައާކުރާނެ ކަމަށް ޕީޖީ އޮފީހުން މިއަދު ވަނީ ބުނެފަ އެވެ.

އެ އޮފީހުގެ މި ނިންމުން ބަދަލުކުރީ ސިޔާސީ ގޮތުންނާއި އާންމުންގެ ތެރެއިން ބޮޑެތި ފިއްތުންތަކާއި ފާޑުކިޔުންތައް އިންތިހާ އަށް ޕީޖީ ހުސައިން ޝަމީމަށް އަމާޒުވުމުންނެވެ.