ބީއެމްއެލްގެ އެހީގައި ބައްތި ހަރުކުރި މަގު-- ފޮޓޯ: ބީއެމްއެލް
08 އެޕްރީލް 2021 - 17:58
ށ. ގޮއިދޫގައި އިޔާދަ ކުރަނިވި ހަކަތަ އިން ދިއްލޭ ބައްތި ހަރުކުރުމަށް ބީއެމްއެލުން އެހީތެރިކަން ފޯރުކޮށްދީފި އެވެ.
"އަހަރެންގެ ބޭންކް" ކޮމިއުނިޓީ ފަންޑު ޕްރޮޖެކްޓްގެ ދަށުން ގޮއިދޫގެ ޕާކުތަކާއި ޕިކްނިކް ސަރަހައްދަށް ދިއުމަށް ބޭނުންކުރާ މައި މަގުގެ ދެ ކިލޯމީޓަރުގެ ސަރަހައްދެއްގައި 50 ބައްތި ވަނީ ހަރުކޮށްފަ އެވެ.
މި ޕްރޮޖެކްޓު ހިންގަން ކޮމިއުނިޓީ ފަންޑަށް ޕްރޮޕޯސަލް ހުށަހެޅީ ގޮއިދޫގެ އިބްރާހިމް ނިޝާމް އަހުމަދު އެވެ.
އޭނާ ބުނިގޮތުގައި، ޕްރޮޕޯސަލް ހުށަހެޅީ ރޭގަނޑު އެ ސަރަހައްދު އަދިރިކޮށް އޮތުމުން ދަތިތަކާ ދިމާވާތީ އެވެ. މި ޕްރޮޖެކްޓުގެ އަމަލީ ހުރިހާ މަސައްކަތެއްގައި ރަށުގެ ޒުވާނުން ބައިވެރިވި ކަމަށް އޭނާ ބުންޏެވެ.
"މީގެ ކުރިން މި ސަރަހައްދުގައި އެއްވެސް ލައިޓެއް ނުހުރޭ. މި ޕްރޮޖެކްޓްގެ ސަބަބުން މި ރަށުގެ ދަނޑުވެރިންނާއި ފަންވިޔާ ފަރާތްތަކާއި ކަނަމަދު އެއްކޮށް އެކަމުގެ މަސައްކަތްކުރާ ފަރާތްތަކާއި ފަތިހާއި ރޭގަނޑު ކަސްރަތަށް މި މަގު ބޭނުންކުރާ ފަރާތްތަކަށާއި ޕާކުތަކާއި ޕިކްނިކްދާ މީހުންނަށް ވަރަށް ބޮޑަށް ފަސޭހަ ވެގެންދާނެ،" ނިޝާމް ބުންޏެވެ.
ބީއެމްއެލުން ވަނީ ކޮމިއުނިޓީ ފަންޑުގެ ދަށުން ހދ. ކުމުންދޫގެ މަގު ބައްތިތައް ސޯލާ ބައްތިތަކަށް ބަދަލުކޮށް، އަލަށް މީހުން އާބާދުވަމުންދާ ސަރަހައްދުގެ ބޮޑު މަގުގެ ބައްތިތައް އިޔާދަ ކުރަނިވި ހަކަތަ އިން ދިއްލޭ ބައްތިތަކަށް ބަދަލުކޮށްފަ އެވެ.
ކޮމިއުނިޓީ ފަންޑަށް ހުށަހަޅާ ޕްރޮޕޯސަލްތަކުގެ ތެރެއިން ކޮންމެ ފިޔަވައްސަކު ފަސް ޕްރޮޖެކްޓަކަށް ބޭންކުން އެހީތެރިކަން ފޯރުކޮށްދެ އެވެ.
Copyright © 2025 Mihaaru · Terms and Conditions · Privacy Policy