ދަނޑުވެރިން ހައްދާ ތަކެތި ގަންނަން އެސްޓީއޯ އިން މާދަމާ ފަށާނެ

ދަނޑުވެރިން ހައްދާ ތަކެތި ގަންނަން އެސްޓީއޯ އިން "އެގްރިސެންޓާ" ގެ ނަމުގައި ސެންޓަރެއް މިރޭ ހުޅުވައިފި އެވެ.

އެސްޓީއޯގެ ކުރީގެ ސިމެންތި ގުދަން ހުރި ތަނުގައި ހުޅުވި، އެގްރިސެންޓަރުން މާދަމާ އިން ފެށިގެން ތަކެތި ގަންނަން ފަށާނެ އެވެ.

އެގްރިސެންޓަރަށް ތަކެތި ވިއްކޭނީ ހަމައެކަނި އެ ސެންޓަރުގައި ރަޖިސްޓަރީ ވެފައިވާ ދަނޑުވެރިންނަށެވެ. މިހާތަނަށް 200 އެއްހާ މީހުން ވަނީ މި ސެންޓަރުގައި ރަޖިސްޓަރީވެފަ އެވެ.

އެސްޓީއޯގެ މެނޭޖިން ޑިރެކްޓަރު ހުސައިން އަމްރު ވިދާޅުވީ، މިއީ ރާއްޖޭގެ ދަނޑުވެރިންނަށް ފުޅާ ދާއިރާއެއްގައި ދަނޑުވެރިކަމުގެ ވިޔަފާރި ކުރުމުގެ ފުރުސަތު ހޯދައި ދިނުމަށް ހުޅުވި ސެންޓަރެއް ކަމަށެވެ. މި ސެންޓަރު މެދުވެރިކޮށް، ދަނޑުވެރިންނަށް ހަމަ އަގުގައި ތަކެތި ވިއްކޭނެ ކަމަށް އޭނާ ވިދާޅުވި އެވެ.

"ވިޔަފާރިއެއްގެ ގޮތުގައި ދަނޑު ހައްދާ ކަމަށް ވަންޏާ ހިސާބެއް ޖެހެން ޖެހޭނެ. ފަޅޯ ހައްދައިފިއްޔާ އެނގެން ޖެހޭނެ ލިބޭނީ ކިހާވަރެެއްތޯ. އަޅުގަނޑުމެންގެ ބޭނުމަކީ ރާއްޖޭގައި މި ހައްދާ އެއްޗެހި ރަނގަޅު އަގެއް ލިބޭނެ ކަމުގެ ޔަގީންކަން ދިނުން. އޭރުން އަޅުގަނޑަށް ޔަގީން ރާއްޖޭގެ ދަނޑުވެރިކަން ކުރިއަރައިގެންދާނެ ކަން،" އަމްރު ވިދާޅުވި އެވެ.

"ރަޖިސްޓަރީ ކުރާ މީހުން ތަކެތި ފީވުމުގެ ކުރިން އަޅުގަނޑުމެންނަށް އެބަ އަންގާ ކިހާވަރެއްކަން ފޮނުވަނީ. އެ ހިސާބުން ފެށިގެން އެނގޭނެ ކިހާވަރެއްކަން ލިބޭނީ. މި ކޮޅަށް ލިބުނީމާ އަނެއްކާ އަންގާނެ ކިހާވަރެއްކަން ލިބެނީ. އެ އަށް ފަހު ވަގުތުން ބޭންކް ޓްރާންސްފާ މެދުވެރިކޮށް ފައިސާ ޖަމާކޮށްދޭނެ."

އެގްރޯ ސެންޓަރުން ގަންނަ ތަކެތި ވިއްކާނީ ހޯލްސޭލްކޮށެވެ. ރިސޯޓުތަކަށް މި ތަކެތި ވިއްކަން ރާވާފައިވާ ކަމަށް އަމްރު ވިދާޅުވި އެވެ. މި ކަމުގައި ރިސޯޓުތަކުގެ އެއްބާރުލުން ލިބޭނެ ކަމަށް ވެސް އެ ކުންފުނިން ބުންޏެވެ.

ސަރުކާރުން ވެސް ވަނީ ދަނޑުވެރިކަމަށް ހާއްސަ ކުންފުންޏެއް އުފައްދައިފަ އެވެ. އެގްރޯ ނެޓްގެ ނަމުގައި އުފެއްދި މި ކުންފުންޏާއި އެސްޓީއޯގެ އެގްރޯސެންޓަރުގެ މަސައްކަތްތައް ތަފާތުވާނެ ކަމަށް އަމްރު ވިދާޅުވި އެވެ.

އެސްޓީއޯ އެގްރިސެންޓަރުން ވަނީ އެ ސެންޓަރުން ގަންނާނެ 15 ބާވަތަކާއި އެ ބާވަތްތައް ގަންނާނެ އެންމެ ކުޑަ އަގެއް ވެސް ކަނޑައަޅައިފަ އެވެ. މި އަގުތައް ކަނޑައެޅުމުގައި ދަނޑުވެރިންނާ މަޝްވަރާކޮށް މާލޭގެ މާރުކޭޓުން ތަކެތި ލިބެން ހުރި އަގުތަކަށް ބަލާފައިވާނެ ކަމަށް އެސްޓީއޯއިން ބުނެ އެވެ.

އެ ކުންފުނިން ބުނިގޮތުގައި ކުރިއަށް އޮތްތާނުގައި އެ ސެންޓަރުން ގަންނަ ތަކެތި އިތުރުވާނެ އެވެ.

އެސްޓީއޯ އިން ދަނޑުވެރިން އަތުން ގަންނަ ތަކެއްޗާއި އެންމެ ކުޑަ އަގު:

- ކަރާ ކިލޯއެއް 22ރ.

- ކެޕްސިކަމް ކިލޯއެއް 65ރ.

- ޓޮމާޓޯ ކިލޯއެއް 20ރ.

- ކައްޓަލަ ކިލޯއެއް 50ރ.

- ދަނޑި އަލުވި ކިލޯއެއް 50ރ.

- ކިޔުކަމްބާ ކިލޯއެއް 32ރ.

- މެލަން ކިލޯއެއް 35ރ.

- ލެޓިއުސް ކިލޯއެއް 90ރ.

- ޗައިނީޒް ކެބެޖް ކިލޯއެއް 70ރ.

- ބީންސް ކިލޮއެއް 50ރ.

- ބަށި ކިލޯއެއް 55ރ.

- ބަރަބޯ ކިލޯއެއް 30ރ.

- ބަޓާނާ ކިލޯއެއް 40ރ.

- ފަތްކެޔޮ ކޮލޯއެއް 32ރ.

މީގެ އިތުރުން މިރުސް ވެސް އެސްޓީއޯ އެގްރިސެންޓަރުން ގަންނާނެ އެވެ. ނަމަވެސް މިރުސް ގަންނާނެ އެންމެ ކުޑަ އަގު އަދި ކަނޑައަޅައިފައެއް ނުވެ އެވެ.