ވިއްސާރައާ އެކު އައްޑޫ ފެން ހިންދުމުގައި

ރޯދަ މަހުގެ ފަހު ދުވަސްތައް އައްޑޫ ރައްޔިތުން ނިންމައިލަން ޖެހުނީ ބޯވާރެއާ އެކު ފެންބޮޑުވެ ލިބުނު ގެއްލުންތަކާ އެކު އެވެ. އެހެންވެ އީދު ދުވަހުގެ ބޮޑުބައި ގިނަ ބަޔަކަށް ހޭދަކުރަން ޖެހުނީ ގޭތެރެ އާއި ގޯތިތެރޭގައި ބޮޑުވި ފެންގަނޑު ހިންދުމުގަ އެވެ. އަދިވެސް އައްޑޫގެ އަވަށްތަކުގެ ބައެއް މީހުން ތިބީ ހާލުގަ އެވެ.

އެމްއެންޑީފާއި ފުލުހުން ވެސް މެދުކެނޑު ނެތި ފެން ހިންދުމާއި ރައްޔިތުންނަށް އެހީވުމުގަ އެވެ. ބޮޑަށް ފެންބޮޑުވެފައިވާ ސަރަހައްދަކުގައި ޕަންޕް ބަހައްޓައިގެން އެމްއެންޑީއެފުން ފެން ހިންދުމުގެ މަސައްކަތްކުރަމުން އަންނަ އިރު އާންމު ރައްޔިތުންގެ ތެރެއިން ބައެއް މީހުން ވެސް އަމިއްލަ ޕަންޕުން ފެން ހިންދުމުގަ އެވެ.

އެހެން ބައެއް މީހުން ފުލުހުންނާއި ސިފައިންގެ އެހީތެރިކަމާ އެކު ވެލި ބަސްތާތައް ޖެހުން ފަދަ މަސައްކަތުގަ އެވެ.

"އީދާ ކުރިމަތިލާން މި ޖެހުނީ ވަރަށް ހިތްދަތިކޮށް. ވިއްސާރައިގައި ބޮޑެތި ގެއްލުންތަކެއް ލިބި ވަރަށް ހާލުގައި މިހާރު މި ތިބީ." ފޭދޫން ވާހަކަ ދެއްކި މީހަކު ބުންޏެވެ.

ރޯދަ މަހުގެ ބޮޑު ބައި މި ފަހަރު ދިޔައީ ވަރަށް ހޫނު ގަދަކޮށެވެ. ދޭތެރެއަކުން ވެހިލި ވާރޭކޮޅެއް ފިޔަވައި ރޯދަ މަހަކު ވާރެއެއް ނުވެ އެވެ. އެހެންވެ ގިނަ މީހުން ތިބީ ހިރަފުސް އޮބިގެންދާނެ ވަރަށް ވާރޭ ވެހި ބިންމަތި ތެމިލާނެ ކަމަށް އުންމީދުކޮށްގެންނެވެ.

ނަމަވެސް ރޯދަ މަހުގެ ފަހު ދުވަހާއާ އެކު ކުރިމަތިލާން ޖެހުނީ ގަދަ ވިއްސާރަ އެވެ. ބުދަ ދުވަހު ހުއްޓުމެއް ނެތި އައްޑު އަށް ބޯކޮށް ވާރޭހި، ގެތަކަށް ގެއްލުންވި ނަމަވެސް ބުރާސްފަތި ދުވަހުގެ ރޭގަނޑާ ހަމައަށް މޫސުން އޮތީ އަލިކޮށެވެ.

ނަމަވެސް ހުކުރު ދުވަހުގެ ރެއިން ފެށިގެން އަނެއްކާ ވެސް ވާރެ އެވެ. އެހެންވެ ބުދަ ދުވަހު ވެހުނު ވާރޭގެ ފެންގަނޑު ނުހިދި ހާލުގައި ތިއްބައި އަނެއްކާ ވެސް ވާރޭ ވެހެން ފެށުމުން އިތުރު ހިތްދަތި ކަމެކެވެ. އެހެންވެ ގިނަ ގެތަކުން ފެންނަނީ ފެންހިންދުމުގެ މަސައްކަތްކުރާ ތަނާއި ގޯތިތެރެ ސާފުކުރާ މަންޒަރެކެވެ.

ވިއްސާރައިގައި ފެންބޮޑުވުމުގެ ސަބަބުން އައްޑޫގެ 300 އަށް ވުރެ ގެތަކަށް އެކި ވަރުގެ ގެއްލުން ލިބުމެވެ. އެގޮތުން ގޭތެރެގައި ހުރި ފަރުނީޗަރާއި ކަރަންޓް ސާމާނާއި ހިފައިގެންގުޅޭ އެތައް އެއްޗަކަށް ގެއްލުންވެފައިވެ އެވެ.

އެގޮތުން އެންމެ ގިނަ އަދަދަކަށް ގެއްލުންވީ ހިތަދު އާއި ފޭދޫގެ ގެތަކަށެވެ.

އައްޑު އަކީ އަބަދު ވެސް ވާރޭ ވެހިލާ އިރަށް ފެންބޮޑުވުމުގެ މައްސަލަ ބޮޑު ތަނެކެވެ. މިކަން ހައްލުކުރަން ފެން ހިންދާ ނިޒާމު ގާއިމުކޮށް މިހާރު އެ ބޭނުން ކުރަން ފަށާފައި އޮތަސް އޭގެ ހަގީގީ ނަތީޖާއެއް ނުފެނެ އެވެ. އެކަން އެނގޭ ކަށަވަރުވާ އެއް ކަމަކީ ވާރޭ ވެހިލާ އިރަށް ތާރު އެޅި މަގުތަކުގައިު ވެސް ފެންބޮޑުވެ، ފެން ހިންދާ ޖަންކްޝަންތައް ފުރުމެވެ. ބައެއް އަވަށްތަކުގެ ބައެއް ހިސާބުތަކުގެ ނަޖިސް ޖަންކްޝަންތައް ފުރިގެން ނަޖިސް ވެސް ބޭރުވެފައިވެ އެވެ.

އެެހެންވެ އައްޑޫ ފެންހިންދާ ނިޒާމުގެ މަސައްކަތްކުރި ފަރާތްތަކަށް ވެސް އާންމުންގެ ފާޑުކިޔުންތައް އަމާޒުވެފައިވެ އެވެ.

"މިއީ ކޮން ބަޔަކު ޑިޒައިންކޮށްގެން އުޅޭ ފެންހިންދާ ނިޒާމެއް." ފޭސްބުކްގައި މީހަކު އަހާފައިވެ އެވެ.

ވާރޭ ވެހި އައްޑޫގެ ގެތަކަށް ފެން ވަންނަ އެ މައްސަލަ އަކީ މަގުތައް މިހާރު ގެތަކަށް ވުރެ އުސްކޮށް އޮތިމެވެ. މިގޮތަށް ދިމާވެފައި ވަނީ މަގު ހަދާ އިރު އެކި ފަހަރު މަތިން ވެލި އަޅަމުން ގޮސް މަގު އުސްވެފައި އޮތުނެވެ. ނަތީޖާ އަކީ މަގުމައްޗަށް ވެހޭހާ ފެން ވެސް ގޭގޭގެ ގޯތިތެރެއަށް ޖަމާވެ، ގޯތިތެރެ އާއި ގޭތެރެ ފެން ވަނުމެވެ.

މި މައްސަލަ ބޮޑުވެގެން ބައެއް އަވަށްތަކުގެ ގެތައް އުސްކޮށްފައިވެ އެވެ.

"އެއީ މި ވަގުތަށް އަހަރެމެންނަށް ކުރެވެން އޮތް ކަމަކީ ގެ ވަރަށް ބޮޑަށް އުސްކޮށްފައި ހުރީމަ ނަސީބަކުން މިގެއަކަށް ފެނެއް ނުވަދޭ." ހިތަދޫގެ މީހަކު ބުންޏެވެ.

ފޭދޫން ވެސް ވާހަކަ ދެއްކި ބައެއް މީހުން ބުނި ގޮތުގައި ވާރޭވެހޭ ކޮންމެ ފަހަރަކު ގެއަށް ފެން ވަންނަ މައްސަލަ ދިމާވާތީ އެކަމަށް މިހާރު ހޯދިފައި އޮތް ހައްލަކީ ގެ އުސްކުރުމެވެ.

"އަހަރެމެން ގެއަކީ ވަރަށް ފަހުން ހެދި ގެއެއް. އެހެންވެ ފުދޭވަރަށް އުސްކޮށް މީގެ ތަޅުންގަނޑު އޮންނާނީ." ފޭދޫ މީހަކު ބުންޏެވެ.