ވީބީގެ "މާސް" ޗޮކްލެޓް ޕްރޮމޯޝަންގެ ނަސީބުވެރިން ހޮވައިފި

ވީބީ ބްރަދާސް އިން ރާއްޖެ އެތެރެކޮށް މާކެޓް ކުރާ "މާސް" ޗޮކްލެޓް ކުންފުނީގެ އުފެއްދުންތަކަށް ހާއްސަކޮށް ކުރިއަށް ގެންދިޔަ ޕްރޮމޯޝަންގެ ނަސީބުވެރިން ހޮވައިފި އެވެ.

މިދިޔަ ސެޕްޓެމްބަރު މަހުން އޮކްޓޯބަރުގެ ނިޔަލަށް ކުރިއަށް ގެންދިޔަ މި ޕްރޮމޯޝަނުގައި މާސް ބްރޭންޑުގެ އުފެއްދުންތަކަށް ހޭދަކުރާ ކޮންމެ 20ރ. އަކަށް ކޫޕަނެއް ދިނެވެ.

ދުނިޔޭގެ މަޝްހޫރު ޗޮކްލެޓް އުފައްދާ "މާސް" ކުންފުނިން އުފައްދާ އެކި ވައްތަރުގެ ޗޮކްލެޓްތައް ދިވެހިންގެ މެދުގައި ވަރަށް މަގުބޫލެވެ. މާސް، ސްނިކާސް، ގެލެކްސީ، ޓްވިކްސް، ބައުންޓީ، އެމްއެންޑްއެމް އަދި މޯލްޓީސަސް އަކީ އޭގެ ތެރެއިން ބައެއް އުފެއްދުންތަކެވެ.

މި ޕްރޮމޯޝަންގައި ފަސް ނަސީބުވެރިން ހޮވާފައިވެ އެވެ. އެ ގޮތުން، އެއްވަނަ އަށް ދިޔަ އަލީ އިބްރާހީމަށް ވެސްޕާ ބްރޭންޑުގެ ސައިކަލެއް ލިބުނު އިރު، ދެވަނަ އަށް ދިޔަ ސައްލަތުރައި އަށް ލިބުނީ އެޕަލް އައިފޯން 7 އެވެ. ތިންވަނަ އަށް ދިޔަ ހުސެއިން ޝާމަލް އަށް ސެމްސަންގް ޓީވީއެއް، ހަތަރުވަނަ އަށް ދިޔަ އަކްރަމް ޖަމީލަށް އެޕަލް އައިޕެޑް މިނީ 4 އަދި ފަސްވަނަ އަށް ދިޔަ އާދަމް އަހުމަދަށް ޕްލޭސްޓޭޝަން 4 އެއް ވަނީ ދީފަ އެވެ.

މި ޕްރޮމޯޝަން ކުރިއަށް ގެންދިޔަ މުއްދަތުގައި ވީބީގެ ބާޒާރު ފިހާރަ އިން ހޯލްސޭލްކޮށް ޗޮކްލެޓް ގަތް ރީޓެއިލް ފިހާރަތަކަށް ވެސް ކޫޕަން ދޫކޮށްފައިވެ އެވެ. އަދި ވީބީގެ ފިހާރަތަކުގެ އިތުރުން 30 އަށް ވުރެ ގިނަ ފިހާރައިގައި ވެސް ކޫޕަން އަޅާ ފޮށި ބަހައްޓާފައި ވެ އެވެ.

ވީބީން ރާއްޖެ އެތެރެކޮށް މާކެޓް ކުރާ ބްރޭންޑުތަކަށް ހާއްސަ ޕްރޮމޯޝަންތައް ދޭތެރެ ދޭތެރެއިން ކުރިއަށް ގެންދެ އެވެ. އެ ގޮތުން، މިހާރު ވެސް އެސްޓީއޯއާ ގުޅިގެން 14 ދުވަސް ތެރޭގައި 14 އިނާމު ލިބޭ ޗޮކްލެޓް ޕްރޮމޯޝަނެއް ކުރިއަށް ގެންދާ ކަމަށް އެ ކުންފުނިން ބުންޏެވެ. މި ޕްރޮމޯޝަންގައި، 25ރ. ގެ ޗޮކްލެޓް ގަނެގެން ބައިވެރިވެވޭ އިރު، މި ޕްރޮމޯޝަން ކުރިއަށް ދާނީ މި މަހު 28 ގެ ނިޔަލަށެވެ.