ޓައިގާ އަށް ބައްޕަގެ ޑައިރެކްޓަރުގެ ފިލްމެއް

އަހުމަދު އަދްޝަން، މިހާރު

15 އޯގަސްޓް 2021 - 07:22

ޓައިގާ ޝްރޮފްގެ ބައްޕަ ކުރީގެ މަޝްހޫރު އެކްޓަރު ޖެކީ ޝްރޮފްގެ ވިދުން ބޮލީވުޑްގައި ގަދަކުރި ފިލްމު "ހީރޯ" ގެނެސްދިން ޑައިރެކްޓަރު ސުބާޝް ގާއީގެ ފިލްމެއްގައި ޓައިގާ މަސައްކަތްކުރާ ގޮތަށް ހަމަޖެހިއްޖެ އެވެ.

މި ވާހަކަ ޓްވިޓާގައި ހިއްސާކޮށް ގާއީ ބުނީ ވަރުގަދަ ފިލްމަކަށް ތައްޔާރުވާ ކަމަށާއި މިއަށް އިންތިޒާރުކުރަން އެދޭ ކަމަށެވެ. މި ވާހަކަ ގާއީ ބުނެފައި ވަނީ ޓައިގާ އާއި ޑައިރެކްޓަރު އެހުމަދު ޚާންގެ އިތުރުން ގާއީ މިހާތަނަށް ގެނެސްދިން ގިނަ ފިލްމުތަކުގެ ސިނަމަޓޯގްރާފަރު ކަބީރް ލާލްއާ އެކި ނަގާފައިވާ ފޮޓޯތަކަކާ އެކީގަ އެވެ. އެ މީހުން ބައްދަލުކޮށްފައި ވަނީ ގާއީގެ އޮފީހުގަ އެވެ.

ޓައިގާ މިހާރު އަންނަނީ އެހުމަދު ޑައިރެކްޓްކުރާ "ހީރޯޕަންތީ 2" ގެ މަސައްކަތްކުރަމުންނެވެ. އެ ފިލްމަކީ މި އަހަރުގެ ޑިސެންބަރު 3 ގައި އަޅުވަން ތާވަލުކޮށްފައި އޮތް ފިލްމެކެވެ. މީގެ މަސައްކަތް ނިންމައިލުމަށް ފަހު، ޒުވާން އެކްޓަރު ދެން ވަގުތު ދޭނީ ޑައިރެކްޓަރު ވިކާސް ބާލް ހަދާ "ގަނަޕަތު" އަށެވެ. ދެ ބަޔަކަށް ހަދަން ނިންމާފައިވާ މި ފިލްމުގެ ޝޫޓިން އަންނަ މަހުގެ ތެރޭގައި އިނގިރޭސިވިލާތުގައި ފަށާނެ ކަމަށް މީޑިއާތަކުން ބުންޏެވެ.

What a Delightful lunch together in my office today with my Super hero @tigershroff, director @ahmedkhan and my cinematographer friend @kabirlall sharing our cinema in past n cinema in future n looking forward to make a great motion picture together🎥
Let’s wait n watch👍 pic.twitter.com/h3zaWowBAy
— Subhash Ghai (@SubhashGhai1) August 10, 2021

ބައްޕަ ޖެކީގެ ކެރިއަރުގެ ވަރަށް ކާމިޔާބު ފިލްމުތައް ޑައިރެކްޓްކުރި ގާއީގެ ޕްރޮޖެކްޓަކުން ޓައިގާ އަށް ފުރުސަތު ލިބުނު އިރު، އޭނާ އަކީ މި ވަގުތު ބޮލީވުޑްގައި ތިބި އެންމެ ވަރުގަދަ އެކްޝަން ތަރިންގެ ތެރެއިން އެކެކެވެ. އަދި ގާއީގެ ޓްވީޓްގައި ޓައިގާ ސިފަކޮށްފައި ވަނީ "ސުޕަހީރޯއެއް" ގެ ގޮތުގަ އެވެ.

What a Delightful lunch together in my office today with my Super hero @tigershroff, director @ahmedkhan and my cinematographer @kabirlall sharing experience of cinema past n what the future holds for the big screen n looking forward to make a great motion picture together🎥😊 pic.twitter.com/QdtVZR4tht
— Subhash Ghai (@SubhashGhai1) August 10, 2021

ޓައިގާއާ އެކު ގާއީ ހަދާ ފިލްމަކީ އޭނާ ޑައިރެކްޓްކުރާނެ ފިލްމެއް ކަމެއް އަދި ސާފެއް ނުވެ އެވެ. "ކަރުޒު" އާއި "ތާލް" އާއި "ޕަރުދޭސް" އަދި "ސޯދާގަރު" ފަދަ ކާމިޔާބު ފިލްމުތައް ގެނެސްދިން ގާއީ އެންމެ ފަހުން ޑައިރެކްޓްކުރި ފިލްމަކީ ކާތިކް އާރިޔަނާ އެކު ހެދި 2014 ގެ "ކާންޗީ: ދި އަންބްރޭކަބަލް" އެވެ.

ޓައިގާގެ ބައްޕަ ޖެކީއާ އެކު ގާއީ ގެނެސްދިން ފިލްމުތަކުގެ ތެރެގައި 1983 ގެ "ހީރޯ" ގެ އިތުރުން ކަރްމާ (1986)، ރާމް ލަކަން (1989)، ކަލްނަޔަކް (1993) އަދި ޔާދޭ (2001) ހިމެނެ އެވެ.