އުތީމުން 500 އަހަރު ކުރީގެ ވަޅެއް ފެނިއްޖެ

ހއ. އުތީމުގެ ހުޅަނގު ފަރާތު ތުނޑި ވަރަށް ބޮޑަށް ގިރައި، އެ ސަރަހައްދުން އާސާރީ ވަޅެއް މިއަދު ފެނިއްޖެ އެވެ.

ކައުންސިލްގެ ރައީސް އަބްދުﷲ ރަޝީދު "މިހާރު" އަށް ވިދާޅުވީ، އެއީ އުތީމު ގަނޑުވަރަށް ވީހާ ދުވަހެއް ވެފައިވާ ވަޅެއް ކަމަށް ބެލެވޭ ކަމަށެވެ. އެހެން ކަމަށް ވާ ނަމަ އެ ވަޅަށް 500 އަހަރު ކުރީގެ ވަޅެއް ކަމަށް އޭނާ ވިދާޅުވި އެވެ.

ރަޝީދު ވިދާޅުވީ ވަޅު ފެނުނީ ކުރީ ޒަމާނުގައި އުތީމު ބޮޑުތަކުރުފާނު ދޫނި ހިފަން ވަަޑައިގެން އުޅުއްވި ކަމަށް ބުނާ ސަރަހައްދުން ކަމަށެވެ. އެއީ ރަށުގެ މީހުން އާންމުކޮށް ވަރަށް މަދުން ގޮސް އުޅޭ ސަރަހައްދެކެވެ.

އެ ތަަނުން އެ ވަޅު ފެނިގެން ކައުންސިލަށް މިއަދު ރިޕޯޓު ކުރިއިރު، އެ ސަރަހައްދު އޮތީ ވަރަށް ބޮޑަށް ގިރައިގެން ގޮސްފަ އެވެ. އެކަމަކު، ވެލި ގަލުން ހަދާފައިވާ ހަތަރެސްކަން އެ ވަޅު ހުރި ސަރަހައްދަށް އިތުރު ބަޔަކަށް ނުވަދެވޭނެ ގޮތަށް މިހާރު އިންތިޒާމުތައް ހަމަޖައްސާފައިވާ ކަމަށް ކައުންސިލް ރައީސް ވިދާޅުވި އެވެ.

ހއ. އުތީމުން ފެނުނު އާސާރީ ވަޅު ހުރި ސަރަހައްދަށް މީހުންނަށް ނުވަދެވޭނެ ގޮތަށް ހަދާފައި-- ފޮޓޯ: އުތީމު ކައުންސިލް

"އުތީމު މީހެއްގެ ހައިސިއްޔަތުން އަޅުގަނޑުމެން ހައިރާނެއް ނުވޭ އާސާރީ އެއްޗެއް ފެނިގެން. މިއީ ވަރަށް އާސާރީ ތަކެތިން މުއްސަނދި ރަށެއް،" އޭނާ ވިދާޅުވި އެވެ.

އެ ވަޅު ފެނިގެން އެކަން މިހާރު ވަނީ ހެރިޓޭޖްގެ ސަމާލުކަމަށް ގެނެސްފައި ކަމަށް ރަޝީދު ވިދާޅުވެ އެވެ. ހެރިޓޭޖް މިނިސްޓްރީގެ ލަފާގެ މަތިން ތާރީހީ ތަކެތި ހިމާޔަތް ކުރުމުގެ ކަންކަން ކުރާ ކަން ފާހަގަކުރައްވައި އޭނާ ވިދާޅުވީ، ރަށުގެ އެހެން ސަރަހައްދަކަށް އެ ވަޅު ބަދަލުކުރުމުގެ މަސައްކަތް ކުރަމުން އަންނަ ކަމަށެވެ.

"މިހާރު ވަޅު ހުރި ސަރަހައްދަށް އެހެން މީހުންނަށް ނުވަދެވޭނެ އިންތިޒާމު ހަމަޖައްސާފައި ހުރީ. އަޅުގަނޑުމެން މި މަސައްކަތް ކުރަނީ އެ ސަރަހައްދު ގިރަމުންދާތީ ވަޅު އެހެން ތަނަކަށް ބަދަލުކުރުމަށް. ވަޅަށް ގެއްލުމެއް ލިބިދާނެތީ،" ރަޝީދު ވިދާޅުވި އެވެ.

ވަޅު މިހާރު ހުރި ތަނުން ނަގައިގެން ރައްކާ ކުރާނީ ދިގު މުއްދަތަކަށް ރައްކާތެރިކަމާ އެކު އެ ވަޅު ހުންނާނެ ތަނެއްގައި ކަމަށް އޭނާ ވިދާޅުވި އެވެ.