ޕީޕީއެމަކީ ރާއްޖޭގައި އުފެދުނު އެންމެ ކާމިޔާބު ޕާޓީ: އަދުރޭ

ރާއްޖޭގައި މިހާތަނަށް އުފެއްދި އެންމެ ކާމިޔާބު ޕާޓީއަކީ ޕީޕީއެމް ކަމަށް އިދިކޮޅު ޕްރޮގްރެސިވް ކޯލިޝަން ހިންގުމާ ހަވާލުވެ ހުންނެވި އަބްދުއްރަހީމް އަބްދުﷲ (އަދުރޭ) މިރޭ ވިދާޅުވެއްޖެ އެވެ.

ޕީޕީއެމަށް 10 އަހަރު ފުރުމުގެ މުނާސަބަތުގައި އެ ޕާޓީގެ އޮފީސް ދޮށުގައި ބޭއްވި ދިދަ ނެގުމުގެ ހަފުލާގައި އޭނާ ވިދާޅުވީ، މިދިޔަ އަހަރުތަކުގައި އެ ޕާޓީ ވަނީ ދިވެހި ތާރީހުން ޖާގަ ހޯދާފައި ކަމަށެވެ.

"މި ޕާޓީއަކީ މިހާތަނަށް ދިވެހިރާއްޖޭގައި އުފެދުނު އެންމެ ކާމިޔާބު ޕާޓީ،" ކުރީގެ ރައީސް މައުމޫން އަބްދުލްގައްޔޫމް އިސްވެ އުފެއްދެވި ނަމަވެސް އެ މަނިކުފާނުގެ ކޮއްކޯފުޅު ކުރީގެ ރައީސް އަބްދުﷲ ޔާމީންގެ ބާރުގެ ދަށަށް މިހާރު ގެނެސްފައިވާ ޕީޕީއެމާ ގުޅޭ ގޮތުން އަބްދުއްރަހީމް ވިދާޅުވި އެވެ.

މަލްޓި ޕާޓީ ޑިމޮކްރަސީގައި ރާއްޖޭގައި ބޭއްވި ފުރަތަމަ އިންތިހާބު 2008 ގައި ކާމިޔާބުކުރީ އެމްޑީޕީ ކަމަށް ވިޔަސް ބަދަލަކަށް ގެނައި އެ ސަރުކާރުގެ ސަބަބުން ދިވެހިންނަށް އެތައް ތަކުލީފަކާއި ވޭނެއް އުފުލަން ޖެހުނު ކަމަށް އޭނާ ވިދާޅުވި އެވެ.

"ގައުމުގެ މިނިވަންކަމަށް ދިޔައީ ލޮޅުން އަރައިގެން. އަޅުގަނޑުމެންގެ ހަރު މުދާތައް ދިޔައީ ވިއްކަމުން. ދިވެހިރާއްޖޭގައި ތަފާތު ދީންތަކަށް ދިޔައީ ފުރުސަތު ދެމުން. ރައްޔިތުން ތިބީ ބިކަވެ، ނިކަމެތިވެ މަގުމަތިވެފައި. ވަޒީފާގެ ފުރުސަތެއް ނެތް. ރައްޔިތުން ތިބީ އަނގަ އާއި އަތާ ދިމާނުވާ ހާލަތުގައި،" އެމްޑީޕީން އެންމެ ފުރަތަމަ ރާއްޖޭގައި ވެރިކަން ކުރި ތިން އަހަރުގެ ހާލަތު ބަޔާން ކޮށްދެއްވަމުން އަބްދުއްރަހީމް ވިދާޅުވި އެވެ.

ޕީޕީއެމްގެ 10 ވަނަ އަހަރީ ދުވަސް ފާހަގަކުރުމަށް މިރޭ ބޭއްވި ހަފުލާގައި ބައިވެރިވި ބައެއް މީހުން.---ފޮޓޯ: ޕީޕީއެމް

އޭނާ ވިދާޅުވިގޮތުގައި އެމްޑީޕީގެ ވެރިކަމުގައި ރާއްޖޭގެ ހާލަތު ވަރަށް ބޮޑަށް ދަށްވި ނަމަވެސް އޭރު އިދިކޮޅުގައި އޮތް ޑީއާރުޕީ އަށް ސަރުކާރު ޒިންމާދާރު ކުރުމަށް އިދިކޮޅު ޕާޓީއެއްގެ ދައުރު އަދައެއް ނުކުރެވުނެވެ. އެހެންވެ، ސަރުކާރު ޒިންމާދާރު ކުރެވޭނެ ގޮތެއް ހޯދުމަށް ކުރީގެ ރައީސް ޔާމީނާއި އޭރު ޑީއާރުޕީގެ ރައީސްގެ ގޮތުގައި ހުންނެވި މައުމޫނާ ދެ ބޭފުޅުން ގުޅިވަޑައިގެން ޕީޕީއެމް އުފެއްދެވީ ކަމަށް އަބްދުއްރަހީމް ވިދާޅުވި އެވެ.

"ޕީޕީއެމް އުފެދިގެން އަޅުގަނޑުމެން ވަގުތުން ފެށީ ދިވެހި ގައުމު ސަލާމަތް ކުރުމުގެ މަސައްކަތް. އޭރު އެންމެ ބޮޑު މައްސަލައަކަށްވީ ރާއްޖޭގެ ވައިގެ ބަނދަރު އިންޑިއާގެ ވިޔަފާރި ކުންފުންޏަކަށް ވިއްކާލާފައި އޮތް އޮތުން. މި މަސައްކަތުގައި ސާބިތުކަމާ އެކު ހުންނެވި ބޭފުޅަކީ ރައީސް ޔާމީން،" އިންޑިއާގެ ޖީއެމްއާރުގެ އަތުން ވެލާނާ އިންޓަނޭޝަނަލް އެއާޕޯޓް ހޯދަން ކުރި މަސައްކަތްތަކުގެ ހަނދާން އާ ކުރައްވަމުން ފޮނަދޫ ދާއިރާގެ ކުރީގެ މެމްބަރު ވިދާޅުވި އެވެ.

ޕީޕީއެމްގެ 10 ވަނަ އަހަރީ ދުވަސް ފާހަގަކުރުމަށް މިރޭ ބޭއްވި ހަފުލާގައި އެ ޕާޓީގެ ބައެއް އިސްވެރިން ބައިވެރިވެވަޑައިގަންނަވަނީ.---ފޮޓޯ: ޕީޕީއެމް

ރާއްޖޭގެ މައި ވައިގެ ބަނދަރު ދިވެހިންނަށް ހޯދައިދިނުމަށް ހިންގި ކާމިޔާބު ކަންކަމާއެކު، ޕީޕީއެމްގެ މަަސައްކަތް ފެށިގެން ކުރިއަށް ދިޔަކަން ފާހަގަކުރައްވައި އޭނާ ވިދާޅުވީ، އެ ޕާޓީ އަށް ދެ އަހަރުވީއިރު އޭރު އޮތް "އަނިޔާވެރި" ވެރިކަން ބަދަލުކުރެވުނު ކަމަށެވެ.

އޭގެ ފަހުން ޕީޕީއެމަށް ވެރިކަން ލިބި، އެ ޕާޓީގެ ފަސް އަހަރަކީ ހުރިހާ ގޮތަކުން ބެލި ނަމަވެސް ރާއްޖެ ދުށް އެންމެ އުފާ ފާގަތި ދުވަސްތައް ކަމަށް އަބްދުއްރައްހީމް ވިދާޅުވި އެވެ.

"ރާއްޖޭގެ ޗާޓަށް ބަދަލުގެނެސް ދިވެހިން އުއްމީދު ނުކުރާ ތަރައްގީގެ ބިޔަ މަޝްރޫއުތައް ރާއްޖޭގައި ހިންގައި، ރައްޔތުންގެ ފުއްދުންތެރިކަން އިތުރުކޮށް، ގައުމުގަ ސުލްހަ މަސަލަސްކަން ގާއިމުކޮށް، އަދުލު އިންސާފު ގާއިމުކޮށް، ޒުވާނުންނަށް ފަހި ފުރުސަތުތަކެއް ހޯދައި ދެއްވި ފަސް އަހަރު،" ޔާމީންގެ ވެރިކަން ސިފަކޮށްދެއްވައި އަބްދުއްރަހީމް ވިދާޅުވި އެވެ.

އެކަަމަކު ޔާމީންގެ ވެރިކަން ނިމި އަނެއްކާ ވެސް އަނިޔާވެރިކަން މިހާރު ފެށިފައިވާ ކަމަށް އޭނާ ވިދާޅުވި އެވެ. އަބްދުއްރަހީމް ވިދާޅުވިގޮތުގައި މި ވެރިކަމުގައި ކުރާހާ ވެސް ކަމަކީ ޔާމީނަށް އަނިޔާކުރުމެވެ.