އާމިނައަށް އިނދެވުނީ ގަބުވެފައެވެ. މެދުޢުމުރަށް ދިޔައިރު ލިބިފައިވާ ހަމައެކަނި ދަރިފުޅުގެ ފުރާނަނެތް ހަށިގަނޑާ ދިމާއަށް ބަލަހައްޓައިގެން އިނދެ ހުއްޓުން އަރައިފައެވެ. ނުހާއަކީ އާމިނަގެ ދެލޮލުގެ ނޫރެވެ. ހިތުގެ ފިނިކަމެވެ. އޭނާގެ ގުލްޝަންގައި ފޮޅިފައި އިން ހަމައެކަނި މަލެވެ. ނަމަވެސް، ފަނާކުރުވަނިވި މި ދުނިޔޭގައި އެ ނޫރު އާމިނައާ އެކު ހޭދަކުރީ އެންމެ ފަސް އަހަރެވެ. ވަކިވާން ކިތަންމެ ބޭނުން ނުވިޔަސް، އަތުން ބީވެގެން ހިނގައްޖެއެވެ. އެ ކުއްޖާފުޅަށް ޖެހުނު ގަދަ ހުމަކާއެކު، އެ ކުޑަކުޑަ ހަށިގަނޑުގެ ނިޒާމުތައް އެކީ ހުއްޓުމަކަށް އައީއެވެ. އެއީ އެތަކެއް ފައިސާއެއް ޚަރަދު ކޮށްގެން، ބޭހެއް ކޮށްގެން ލިބުނު ދަރިއެއް ކަމުގައި ވީނަމަވެސް، ތަގުދީރުގައި އޮތް ގޮތަކީ މިއީއެވެ.
ނުހާގެ މޫނުގައި ކަފުން އަޅައި ފޮރުވައިލުމާ އެކު އާމިނަގެ ހިތް ހީވީ އިރައިގެން ދިޔަހެންނެވެ. ހަށިގަނޑުން ބައެއް ވަކިވީހެންނެވެ. ފައިން ވަރު ދޫވެގެން، އޭނާ ކުޑަކަކޫ މައްޗަށް ވެއްޓުނެވެ. އަޑުން އަޑުނަގައި އޭނާއަށް ރޯވެން ފެށިއެވެ. އޭނާގެ ފިރިމީހާ، ހަސަނު ދިޔައީ އެނާ މަސަލަސް ކުރެވޭތޯ މަސައްކަތް ކުރަމުންނެވެ. ނަމަވެސް، ލޯބިވާ ދަރިފުޅަށް ޢުމުރަށް ސަލާމޭ ބުނަން މައިލަގޮނޑިއަށް ކެތްވާނީ ކިހިނަކުން ހެއްޔެވެ؟
އެރޭ އާމިނަގެ ލޮލަކަށް ނިންޖެއް ނައެވެ. ލޯ މަރައިލުމާއެކު ހީވަނީ ނުހާގެ ލޯބިލޯބި މޫނު އޭނާގެ ކުރިމަތިން ފެންނަހެނެވެ. އެއާއެކު އަނެއްކާވެސް ރޮވެން ފަށަނީއެވެ. އެޙާލުގައި ފުރޮޅި ފުރޮޅ އޮއްވާ އޭނާގެ ލޮލަށް ބަރުކަން އިޙުސާސް ކުރެވެން ފެށިއެވެ. ނިދިޖެހޭގޮތް ވިއެވެ.
ކުއްލިއަކަށް، ކުއްޖެއްގެ ރުއިމުގެ އަޑު ކޮޓަރިން ބޭރުގައި ގުގުމައިލިއެވެ. އާމިނައަށް ފުންމައިގެން ތެދުވެވުނެވެ. އޭނާއަށް އިވުނީ ދެވަނަ އެހެން އަޑެއް ނޫނެވެ. އޭނާގެ ލޯބިވާ ދަރިފުޅުގެ ރުއިމުގެ އަޑެވެ. ހަސަނަށް ގޮވައިލަން ބެލިއިރު، އެނދު އޮތީ ހުހަށެވެ. އަނެއްކާވެސް، އެ ރުއިމުގެ އަޑު އާމިނަގެ ކަންފަތުގައި ޖެހުނެވެ. ކޮޓަރިން ނުކުމެ، އެ އަޑު އިވެމުންދާ ދިމާއަށް އޭނާ މިސްރާބު ޖެހިއެވެ. އަޑު އިވެމުންދިޔައީ، އެޕާޓުމެންޓުގެ މައި ދޮރުގެ އަނެއް ފަރާތުން، ވަރަށް ކައރިންނެވެ. ތުރުތުރު އަޅަމުންދިޔަ ދެ އަތައިގެން، އޭނާ ދޮރު ހުޅުވައިލިއެވެ. ފެނުނު މަންޒަރުން އޭނާއަށް ރަނގަޅަށް ރޮވުނެވެ. އޭނާގެ ލޯބިވާ ނުހާއެއް ދޮރުން ބޭރަކު ނެތެވެ. އޮތީ ހުސް ސިޑިގޮޅިއެކެވެ.
"އާމިނާ! ކީއް ތިކުރަނީ؟" ހަސަނު ފާޚާނާއިން ނުކުތްތަނާހެން ފެނުނީ، އާމިނަ އެޕާޓުމަންޓުގެ ދޮރު ހުޅުވައިގެން ބޭރަށް ބަލަން ހުއްޓައެވެ.
އާމިނަ ސިހިފައި ހަސަނާ ދިމާއަށް އެނބުރުނެވެ. އޭރު އޭނާގެ ދެލޮލުން ހުއްޓުމެއް ނެތި ކަރުނަ ފައިބަމުން ދިޔައެވެ.
"ނުހާ... އަހަރެންނަށް އިވުނީ ނުހާ ރޯ އަޑު..." އާމިނަގެ އަޑުގައި ތުރުތުރެއް އެކުލެވިފައި ހުއްޓެވެ.
ހަސަނަށް ފުން ނޭވާއެއް ބޭރުކޮށްލެވުނެވެ. ފަސް އަހަރު ވަންދެން އެކުގައި އުޅެފައި ވަކިވުމުން، އާމިނަގެ ކަންފަތުގައި ނުހާގެ އަޑު ހަރުލާފައި ހުރީތާއެވެ. އޭނާ އާމިނަގެ ކޮނޑުގައި އޯގާތެރި ކަމާއެކު އަތް ބާއްވައިލިއެވެ. އަދި ބުންޏެވެ.
"ނުހާގެ އަޑު އާމިނައަށް އިވުނީހެން ހީވީ ކަމަށް ވާނީ. މިކަމަށް ހޭނެން އަދި ދުވަސްކޮޅެއް ނަގާނެ." ހަސަނަށް ވިސްނުނު ގޮތް އޭނާ ބުންޏެވެ.
އާމިނައަށް ހިތާހިތުން ޝަކުވާ ކުރެވުނެވެ. އޭނާއަށް ވަރަށް ސާފުކޮށް އެ އަޑު އިވުނެވެ. އެއީ ހީވި ގޮތެއް ނޫނެވެ. ނަމަވެސް، ގެންފައި ހުރި ބިރާއެކު ވެސް، ހަސަނާ ދެބަސްވާނެ ވަރެއް އޭނާގެ ހަށިގަނޑަކު ނެތެވެ. އެހެންކަމުން ހަސަނުގެ ބަސްއަހައި، އަނެއްކާވެސް ނިދޭތޯ އޭނާ މަސައްކަތް ކުރަން ފެށިއެވެ.
ޖެހިގެން އައި ދުވަހު އިރުއެރީ އާމިނަ ހޭލައި އޮއްވައެވެ. އޭރު އޭނާގެ ބޮލުގެ ފުއްކިބައިން ފެށިގެން ނިތްކުރިއާ ހަމައަށް ހުރީ ގަދަ ރިހުމެއް އުފެދިފައެވެ. ހީވަނީ މީހަކު ދަނޑިބުރިއަކުން އޭނާގެ ބޮލުގައި ތަޅާހެންނެވެ. އެނދުން ތެދުވިއިރުވެސް އޭނާ ހުރީ ފާޑަކަށް ބުރާންތި ވެފައެވެ. ހަސަނު އޮފީހަށް ދިއުމާއެކު އެނދު ތަންމަތި އެޅުމަށްފަހު، އާދަވެފައިވާ ގޮތުގެ މަތިން އޭނާއަށް ނުހާގެ ކޮޓަރިއަށް ވަދެވުނެވެ. ބޭއިޚްތިޔާރުގައެވެ. ހުހަށް އޮތް ކޮޓަރި ފެނިފައި، ދެން އޭނާ ގާތަށް ނުހާ ނާންނާނޭކަން ހަނދާންވިއެވެ. ނުހާގެ އެނދު ކައިރީގައި ހަރުކޮށްފައި ހުރި ފޮޓޯ ފުރޭމު ފެނިފައި އާމިނައަށް އަނެއްކާވެސް ރޮވެން ފެށުނެވެ. އެ ފޮޓޯގައި އޭނައާއި ހަސަނުގެ ދެމެދުގައި ނުހާ ހުރީ އުފަލުން ފުރިގެންވާ ހިނިތުންވުމަކާއެކުއެވެ. އާމިނަގެ ހިތަށް ހީވީ ހަންޖަރުތަކެއް ހެރެމުން ދިޔަހެންނެވެ. މިއީ ކޮންފަދަ ބޭއިންސާފެއްހެއްޔެވެ؟
އެ ޚިޔާލުތަކުގައި ހުއްޓައި، އާމިނައާ ވަރަށް ގާތުން މީހަކު ހަޅޭއްލަވައިގަތް އަޑު އިވުނެވެ. ހީވީ އޭނާގެ ކަންފަތް ދޮށުގައި ހަޅޭއްލަވައިގެން ހެނެވެ. ސިހިގެންގޮސް އޭނާ އެއް ފަރާތަކަށް ވެއްޓުނެވެ. އަޑު އައި ދިމާއަށް ބަލައިލިއރު އެތާކު އެކަކުވެސް ނެތެވެ. އޭނާގެ ހިތް ތެޅިގަތެވެ. އަވަހަށް އެތަނުން ނުކުތުމަށް ފިޔަވަޅެއް އަޅައިލިތަނާހެން، އޭނާގެ ކަންފަތް ދޮށުގައި މީހަކު ވާހަކަދައްކާ އަޑު އިވެންފެށިއެވެ. ބަރު އަޑުތަކެކެވެ. ކިޔާ ނުކިޔާ އެއްޗެއް ނޭނގެއެވެ. އާމިނަ އަވަސްއަވަހަށް އެކޮޓަރިން ނުކުތެވެ. އޭރު މުޅި މީހާ ބިރުން ތުރުތުރު އަޅައެވެ. އަދިވެސް އެއަޑުތަކެއް ނުކުނޑެއެވެ. ހަސަނަށް ގުޅައި، ވެގެން އުޅޭ ގޮތް ކިޔައިދެވުނީ އަޅައަޅައިގަންނަމުން، ވަރަށް ހާލުންނެވެ.
އޮފީހު މަސައްކަތް މަޑުޖައްސައިލުމަށް ފަހު ހަސަނު އަވަހަށް ގެއާ ދިމާއަށް މިސްރާބު ޖެހިއެވެ. އާމިނައަށް އެވަނީ ކިހިނެއްބާއެވެ؟ ރޭގައި އެއީ އޭނާ މާ ދެރަވެ، ވަރުބަލިވެފައި ހުރިވަރުން ހީވިގޮތެއް ކަމަށް ބެލެވުނު ކަމުގައި ވީނަމަވެސް، ދެންމެ ވެގެން އުޅޭ ކަންކަން ކިޔައިދިނުމުން އެއީ ޖިންނިއެއްގެ ދުއްތުރާ ތަކެއް ކަމުގެ ބިރު ހަސަނުގެ ހިތުގައި އުފެދެން ފެށިއެވެ. ގެއަށް ދިޔަ މަގުމަތީގައި، އޭނާގެ ރަޙުމަތްތެރިއަކަށް ގުޅައި، ރުޤްޔާ ކުރާނެ މީހަކު ހަމަޖެއްސިއެވެ.
ހަސަނު ގެއަށް އައި އިރުވެސް، އާމިނަގެ ކަންފަތް ބުޑުން އިވެމުން ދިޔަ އަޑުތަކަށް ކެނޑުމެއް ނާދެއެވެ. ނަމަވެސް، އޭރު އެ އަޑުތައް ހުރީ އިހުނަށް ވުރެ މަޑުވެފައެވެ. ހަސަނުގެ ގައިގައި އޮޅުލައިގަތުމާ އެކު އާމިނަ ބިރުން ރޯންފެށިއެވެ. ރުޤްޔާކުރާ މީހެއް އެބަ ގެންނަމޭ ބުނެ، ހަސަނު އޭނާ ހަމައަކަށް އެޅުވޭތޯ މަސައްކަތް ކުރިއެވެ. ނަމަވެސް، އާމިނައަށް އޭރު ހުރެވުނީ ހަމަހެޔަކު ނޫނެވެ. އެއަށްވުރެ ބޮޑަށް އޭނާ ހުރީ ބިރުގެންފައެވެ.
ރުގްޔާ ކޮށްދިނުމަށް އައީ ހަސަނުގެ ރަހުމަތްތެރިއެއްގެ ބޭބެއެވެ. އޭނާގެ ނަމަކީ ޔޫސުފެވެ. އޭނާ އެކި ގޮތްގޮތަށް ކިޔެވިއެވެ. އާމިނައާ އެކިއެކި ސުވާލު ކުރިއެވެ. ނަމަވެސް، އޭނާގެ ހުރިހާ މަސައްކަތެއް ދިޔައީ ފެނަށެވެ. އާމިނައަށް ވެގެން އުޅޭ ގޮތެއް އޭނާއަކަށް ނުހޯދުނެވެ. އެހެނަވިޔަސް، އޭނާ ދިޔައީ، ފެން ފުޅިއަކަށް ކިޔެވުމަށް ފަހު، އެއިން ދުވާލަކު އެކިފަހަރުމަތިން ބުއިމަށް އިރުޝާދު ދީފައެވެ.
އެއީ ދެނަމާދު ދޭތެރެއެވެ. ކިޔަވާފައި ހުރި ފެންފުޅިން ފެންފޮދެއް ބުއިމަށްފަހު، އާމިނަ މިސްރާބު ޖެހީ ކޮޓަރިއާ ދިމާއަށެވެ. ޤުރުއާން ކިޔަވައިލާނަމޭ ހިތާއެވެ. އޭރުންވެސް މި ބިރުވެރިކަމުން އަރައިގަތުމަށް މަގުފަހިވެދާނޭ ކަމަށް އޭނާއަށް ލަފާ ކުރެވޭތީއެވެ. އޭނާގެ ކަންފަތުގައި ހަރުލާފައި ހުރި އަޑުތައް އެ ވަގުތު ކެނޑިފައި ހުރުމުން، އޭނާ ހުރީ ކޮންމެވެސް ވަރަކަށް ހަމަޖެހިފައެވެ. މުސްހަފު ނަގައި ކިޔަވަން ފެށުމުން، އޭނާއަށް ލިބިފައިވާ ހިތްހަމަޖެހުން އިތުރުވެގެން ދިޔައެވެ.
ކުއްލިއަކަށް، އޭނާގެ ވާތް ފަރާތުން އެނދު ކައިރިން މީހެއްގެ ފިޔަވަޅުގެ އަޑު އިވުނެވެ. އެއާއެކު، ލިބިފައިވާ ހަމަޖެހުން އެކުގައިހެން ފިލައި ދިޔައެވެ. އަޑު އައި ދިމާއަށް އޭނާ މޫނު އަނބުރައިލީ. ތުރުތުރުއަޅާ ޙާލު، ސިކުނޑިން ދެމުން ދިޔަ ރަތް ސިގުނަލާ ދެކޮޅަށެވެ. ފެނުނު މަންޒަރުން، އޭނާގެ މޭގަނޑު ހީވީ އަނގައަށް އައިހެނެވެ. ފުންމައިގެން ތެދުވެ އެނދާ ދުރަށް ޖެހެވުނެވެ. އެނދު ކައިރީގައި ހުރީ ނުހާއެވެ. އޭނާ ހުރީ ހޮސްޕިޓަލުގައި ބަލިމީހުން ލާ ޒާތުގެ ހެދުމެއްގައެވެ. އަތަށް އައިވީއެއް ގުޅާފައި އޮތްއިރު، އެ ކުޑަކުޑަ މޫނުން އާރޯކަމާއި ތާޒާކަން ވަނީ އެކުގައި ނެތިގޮސްފައެވެ. ބޯ ވަނީ ހޭވިފައެވެ. ލޯ ހުރީ ހުދު ކުލައިގައެވެ. މޭގައި ހުރީ ބޮޑު ބާގަނޑެއް ހެދިފައެވެ. ހުއްޓުމެއް ނެތި އެ ބާގަނޑުން ލޭ ފައިބަމުންދިޔައެވެ. ހަޅޭއްލަވައިގަތުމާ އެކު އާމިނައަށް ކޮޓަރިން ބޭރަށް ދުއްވައިގަނެވުނެވެ.
ސޯފާގައި ނޫސް ކިޔަން އިން ހަސަނަށް އާމިނަގެ ހަޅޭކުގެ އަޑު އިވުމާއެކު އަވަސްއަވަހަށް ތެދުވެވުނެވެ. އޭނާއަށް ކޮޓަރިއާ ހިސާބަށް ނުދެވި އުޅެނިކޮށް، އާމިނަ ދުވެފައި އައިސް އޭނާގެ ގައިގައި ޖެހުނެވެ. އޭރު އާމިނަގެ ދެ ލޯ ހުރީ ބޮޑު ވެފައެވެ. މޫނުން ވަނީ އޮއްދާ ހިއްލާފައެވެ. އޭނާގެ ނަޒަރު ހުރީ ހަސަނު ފަހަނަ އަޅައި މާ ދުރަށް ހުއަޓިފައެވެ. ހަސަނު ފަހަތް ބަލައިލިއިރު އެތާކު އެއްވެސް އެއްޗެއް ފެންނާކަށް ނެތެވެ. އާމިނަ އިނގިލި ދިއްކޮށްގެން ހުރީ ހުސް ފާރަކާ ދިމާއަށެވެ.
"ނުހާ... އެހެރީ ނުހާ... ނޫން... އެއީ ބިލާހެއް... އެއީ ޖިންނިއެއް!" އާމިނައަށް ދިޔައީ މާނޭވާ ލެވެމުންނެވެ.
ޔޫސުފަށް ގުޅުމަށް ހަސަނު އަވަސްވެގަތެވެ. ނަމަވެސް، ކަން ދިމާ ކުރި ގޮތުން ޔޫސުފަށް އެ ވަގުތު އާދެވޭ ގޮތެއް ނުވިއެވެ. ކިޔަވާފައިހުރި ފެންފުޅިން ފެންފޮދެއް އާމިނަގެ ގަޔަށް ބުރުއްސައިލުމަށް ޔޫސުފް އިރުޝާދު ދިނެވެ. އެގޮތަށް ކަންކުރުމުންވެސް އާމިނައަކަށް ލުޔެއް ނުލިބުނެވެ.
އިރުކޮޅެއް ފަހުން، އާމިނައަށް 'ނުހާ' ގެއްލުނެވެ. ނަމަވެސް، ނުހާގެ އަޑު ހުރީ އޭނާގެ ކަންފަތުގައި ހިފައިފައެވެ.
"އަހަރެން ދެން މަންމަ ގާތަކަށް ނާންނާނަން. އަހަރެންވަނީ މަރުވެފައި." މަލާމާތުގެ ރާގަކަށް ތަކުރާރުކޮށް އެ އަޑު ބުނަމުންދިޔައެވެ.
އެ ގޮތުގައި އުޅޭތާ ހަފުތާއެއް ހޭދަވިއެވެ. އާމިނައަށް ވަމުންދާ އުނދަގޫތަކަށް އެއްވެސް ލުޔެއް ނުލިބުނެވެ. ރުގްޔާ ކުރިއެއްކަމަކު، އެއިން ވީ އެއްވެސް ފައިދާއެއް ނެތެވެ. އިސާހިތަކު، އާމިނަ ނެގިމަޑުވެ އިންނަން ފެށިއެވެ. ކުދިކުދި ކަންކަމާވެސް އޭނާ ހުންނަނީ ސިހިސިހިއެވެ. ބައެއްފަހަރު ލޯ މަރައިގެން، ކަންފަތްމަތީ އަތް އަޅައިގެން ރޯން އޮވެއެވެ. ކެއިންބުއިމާވެސް އޭނާ ދުރުވިއެވެ. ގެއިން ބޭރަށް ނުކުންނަނީ ޙާލަކުން ފަހަރަކުއެވެ. މި މަންޒަރު ބަލާކަށް ހަސަނަކަށް ކުޅަދާނައެއް ނުވިއެވެ. ދާދި އެހަކަށް ދުވަހު އޭނާގެ ދަރިފުޅު ވަނީ ނިޔާވެފައެވެ. ލޯބިވާ އަނބިމީހާވެސް ހަލާކުވެގެން ދާ ތަން ބަލަހައްޓައިގެން، އަތް އުރާލައިގެން ހުރުމަކަށް އޭނާއަކަށް ކެތެއް ނުކުރެވޭނެއެވެ. ނަމަވެސް، ހެއްދެވި ފަރާތަށް ދުއާކުރުން ނޫން ކަމެއް އޭނާއަށް ކުރެވޭކަށް ނެތެވެ.
ހުކުރު ދުވަސް އައުމާ އެކު، މާހައުލު ބަދަލުކޮށްލުމަށްޓަކައި އާމިނަ ގޮވައިގެން ބޭރަށް ދިއުމަށް ހަސަނު ނިންމިއެވެ. އެއީ އޭނާގެ ބަލިކަށިވަމުން އަންނަ ނަފުސާނީ ދުޅަހެޔޮކަމަށް އާރޯކަން ގެނެސްދީފާނޭ ކަމަކަށް ވެދާނޭތީއެވެ. އާމިނަ ގޮވައިގެން އޭނާ ދިޔައީ ސަލްޓަން ޕާކަށެވެ. އޭނާ އަންނަންދެން ބެންޗެއްގައި އިނުމަށް އާމިނަ ގާތުގައި ބުނުމަށްފަހު، ހަސަނު ދިޔައީ ސައިކަލު ޕާކުކުރާށެވެ.
އާމިނަ މަޑު ފިޔަވަޅެއްގައި ބެންޗަކާ ދިމާއަށް މިސްރާބު ޖެހިއެވެ. އޭނާ ބާރުބާރަށް ހަށަންބަނދެގެން ހުރި ގޮތުން ހީވަނީ، ދެއަތުން އޭނާގެ ހަށިގަނޑު ފޮރުވަން އުޅޭހެންނެވް. ޕާކުގައި މީހުން ގިނަކަމުން، އޭނާގެ ކަންފަތުގައި ހަރުލާފައި ހުރި އަޑުތަކާ ވަކި ނުކުރެވުނެއް ކަމަކު، އޭނާ ހުރީ ހާސްވެފައެވެ. ދެ ލޯ ތަންމިނަށް ހުޅުވައިގެން ހުރެ، އޭނާ ދިޔައީ އެކި ކޮޅުކޮޅުމައްޗަށް ބަލަމުންނެވެ. ނުތަނަވަސް ޚިޔާލުތަކުން އޭނާގެ ސިކުނޑި ދިޔައީ ބަރާވަމުންނެވެ. އެވަގުތު ހަސަނު އޭނާގެ ގާތުގައި ނެތުމުން، އެ ނުތަނަވަސްކަން ވަނީ ދެގުނަ ވެފައެވެ.
އާމިނަގެ ކުރިމަތީގައި ހުރި ގަސް ހެލިގަތެވެ. އެއާ ދިމާއަށް ބަލައިލިއިރު، އެގަހުގެ ގަސްގަނޑުގެ ތެރެއިން މޫނެއް ފާޅުވަނީއެވެ. އަނގުރުކޮޅެއް ފަދަ ދެ ލޮލާއި، ތޫނު ދަތްތަކެއް ލާފައިހުރި އަނގައެކެވެ. އެ އަނގަ ހުޅުވައިލުމާއެކު، ޒީލަގަދަ ހަޅޭކެއްގެ އަޑު ބޭރުވިއެވެ. އެއި، ބިރުވެރި، ބަރު އަޑުތަކެއް އެކުވެގެން އަންނަ ކަހަލަ އަޑެކެވެ. އެ ގަހުގެ މޫތައް، ހަރުފަތަކެއްހެން ދުވެފައި އާމިނައާ ދިމާއަށް އައެވެ. އާމިނަ ދުއްވައިގަންނަން އުޅެނިކޮށް، އެ މޫތައް އޭނާ ދަތިއަޅުވާލައި ވައްޓައިލިއެވެ. އެވަގުތު އެ 'ގަސް' އާމިނައާ މުހާތަބު ކުރިއެވެ.
"އަހަރެން މި ވެއްޓެނީ... ކަލޭގެ ގައިމައްޗަށް... އޭރުން ކަލޭގެ ހަށިގަނޑު ޗިސްޗިސް ވާނެ!" އޭތި ހޭރިގަތެވެ. އެއާއެކު އާމިނައަށް ފެނުނީ ގަސް އޭނައާ ދިމާއަށް ވެއްޓޭ ތަނެވެ.
ސައިކަލު ޕާކު ކުރުމަށް ފަހު ހަސަނު އެނބުރި ޕާކަށް އައިއިރު، އެތަނުގައި ހުރި ގަހެއްގެ ކައިރިއަށް މީހުންތަކެއް ޖަމާވެފައި ތިއްބާ ފެނުނެވެ. އާމިނައަށް ކަމެއް ވީކަން ހަސަނަށް ޔަގީން ކުރެވުނެވެ. ނެގިނެގިފައި ޖެހެމުންދިޔަ ހިތަކައިގެން، ޖަމާވެފައި ތިބި މީހުންގެ ތެރެއިން ފުރޭނެމުން ކަހަލަ ގޮތަކަށް އޭނާ އެތަނާ ކައިރިވިއެވެ. ފެނުނު މަންޒަރުން ހީވީ އޭނާގެ ހަތަރު އުދަރެސް ފެނުޖެހުނުހެންނެވެ. އާމިނަ އޮތީ ވެއްޓިފައެވެ. އޭރު ބާނާފައި އޮތް ރޯ މަހެއްހެން އޭނާ ތެޅެމުންދިޔައެވެ. ހަސަނަށް ހުރެވުނު ތަނެއްވެސް ނޭނގުނެވެ. ބޭއިޚްތިޔާރުގައި ކުޑަކަކޫ މައްޗަށް ތިރިވެވުނެވެ. އެންބިއުލާންސަކަށް ގުޅާކަށްވެސް އެވަގުތު އޭނާގެ ސިކުނޑިއަކަށް ނުވިސްނުނެވެ. ލިބުނު ސިހުމާއި ވީދެރައިން މުޅި މީހާ ހުރީ ހުއްޓުންއަރައިފައެވެ.
އެންބިއުލާސަށް ގުޅައިދިނީ، އެތަނަށް އެއްވެފައި ތިބި މީހުންގެ ތެރެއިން މީހެކެވެ. ހަސްފަތާލަށް ގެންދެވުމާއެކު، އަވަސް ފަރުވާދޭ ކޮޓަރީގައި އާމިނަ އެޑުމިޓު ކުރެވުނެވެ. ޑަކުޓަރު ހަސަނަށް މަޢުލޫމާތު ދިނީ، އާމިނަ އޮތީ ފިޓުޖެހިފައި ކަމަށެވެ. އޭނާގެ ސިކުނޑީގެ އެތަކެއް ސްކޭނެއް ޑަކުޓަރު ހެއްދިއެވެ. އެ ސްކޭނުތައް ބަލަމުންދިޔައިރު، ޑަކުޓަރުގެ މޫނުމައްޗަށް ހައިރާކަމުގެ ކުލަވަރު ފޭދިގެން އައެވެ. އެ ތަކެތިން އާދަޔާހިލާފު 'ޕެޓާން' ތަކެއް ފެނުނީއެވެ.
"އާމިނަގެ އުޅުމުން ފަހަކަށް އައިސް އެއްވެސް ތަފާތު ކަމެއް ފެނޭތޯ؟" ޑަކުޓަރު އެއްސެވެ.
އާމިނައަށް އެކި އަޑުތައް އިވުމާއި، ބިރުވެރި އެއްޗެހި ފެންނަ ވާހަކަ ހަސަނު ޑަކުޓަރަށް ކިޔައިދިނެވެ. އެކަން ފެށުނީއްސުރެ މިހާރާ ހަމައަށް ހިނގާފައިވާ ހުރިހާ ކަމެއް އޭނާ ވަރަށް ތަފްސީލުކޮށް ކިޔައިދިނެވެ.
އާމިނަ ހޭއެރުމުން، އޭނާގެ ގަޔަށް ގުޅާފައި ހުރި މެޝިންތަކުން، އޭނާގެ ހަށިގަނޑުގެ ހުރިހާ ނިޒާމުތައް ރަނގަޅަށް މަސައްކަތް ކުރޭތޯ ޑަކުޓަރު ބެލިއެވެ. އޭގައި އެއްވެސް މައްސަލައެއް ނުފެނުމުން، ސައިކޮލޮޖީ ޑިޕާޓުމަންޓަށް އާމިނަ ބަދަލުކުރެވުނެވެ.
ސައިކަޔަޓްރިސްޓު އާމިނަގެ ސިކުނޑީގެ ސްކޭނުތައް ބެލުމަށްފަހު، އޭނާއާ އެކި ސުވާލުތައް ކުރިއެވެ. އޭނާގެ ކުޑައިރުގެ ވާހަކަތަކާއި، ނުހާ ވަކިވުމާ ގުލިގެން އޭނާގެ އިޙުސާސްތަކާ މެދު ސުވާލު ކުރިއެވެ. އާމިނަގެ ވާހަކަތައް އަޑު އެހުމަށްފަހު، ސައިކަޔަޓްރިސްޓަށް ސާފު ޖަވާބެއް ލިބުނެވެ.
"އާމިނައަށް ދިމާވެގެން ތިޔަ އުޅޭ މައްސަލައަކީ ރޫޙާނީ ކަމެއް ނޫން." ޑަކުޓަރު މިހެން ބުނުމާއެކު އާމިނައަށް ހަމަޖެހުމުގެ ނޭވާއެއް ދޫކޮށްލެވުނެވެ. ނަމަވެސް، ރޫޙާނީ ކަމެއް ނޫން ނަމަ، އޭނާއަށް ދިމާވި ކަންކަމުގެ އަސްލަކީ ކޮބައިބާވައެވެ؟
"އާމިނައަށް ދިމާވެފައިވާ ބަލިމަޑުކަމަކީ ރާއްޖެއިން ވަރަށް މަދުން ނޫނީ ނުފެންނަ ނުފެންނަ ނަފުސާނީ ބަލިމަޑުކަމެއް. ނަމަކީ ސްކިޒޮފްރެނިއާ." އޭނާ ކިޔައިދިނެވެ.
އެ ބައްޔަކީ، އާއިލީ ގޮތުން، ނުވަތަ ހަޔާތުގައި ދިމާވާ ހިތާމަވެރި ކަމެއްގެ ސަބަބުން ޖެހޭ ބައްޔެއް ކަމަށް އޭނާ ބުންޏެވެ. އާމިނައަށް އެ ބަލި ޖެހެން މެދުވެރިވި ސަބަބެއް ކަމަށް ބެލެވެނީ ނުހާގެ ކުއްލި ވަކިވުމެވެ. ބަލި ޖެހުމުން، އެހެން މީހުންނަށް ނީވޭ އަޑު ތަކާއި، ނުފެންނަ އެއްޗެހި ސިކުނޑިން ދައްކައިދެއެވެ. އަވާމެންދުރު ތަކެކެވެ.
"މިހާތަނަށް، މި ބައްޔަކަށް ދާއިމީ ފަރުވާއެއް ހޯދިފައެއް ނެތް. އެކަމަކު ވަކިވަކި ޢަލާމާތް ތަކަށް ބޭސް ދޭނަން. ތެރަޕީ ނަގައި، މި ބައްޔާ އެކު ދިރިއުޅެން ދަސްވީމައި އިރާދަކުރެއްވިއްޔާ ރަނގަޅުވާނެ." މިހެން ބުނުމާއެކު، ޑަކުޓަރު އޭނާގެ އަތަށް ބޭސް ސިޓީއެއް ދިނެވެ.
އޭގެ އަހަރެއްހާ ދުވަސް ފަހެވެ. އާމިނައަށް ފެންނަމުންދާ އަވާމެންދުރުތައް ފެންނަ މިންވަރު މިހާރު މަދެވެ. އެ ތަކެތި ފެނުމުންވެސް، ހާސް ނުވެ ހަމަޖެހިގެން ހުންނަން އޭނާއަށް ވަނީ ދަސްވެފައެވެ. ނެގިމަޑުވެފައި އިނުމާއި، ކުދިކުދި ކަންކަމާ މެދު ސިހުން އެއީ މާޒީގެ ކަމަކަށް ވެ ނިމިއްޖެއެވެ. އާމިނަގެ އުޅުމަށް އައި ހެޔޮ ބަދަލާއެކު ހަސަނު ވެސް ހުންނަނީ ވަރަށް އުފާވެފައެވެ. ދިރިއުޅުމުގައި ދިމާވާ ކޮންމެ ކަމަކާވެސް ހިތްވަރާއެކު ކުރިމަތިލުމުން، ކުރިއަށް ދާނޭ ފަހި މަގެއް ލިބޭނެކަން އެ ދެމަފިރިންނަށް މިއަދު ވަނީ ދަސްވެފައެވެ. (ނިމުނީ)
ނޯޓް: މިއީ މި ރޯދަ މަހު "މިހާރު" އިން ބާއްވާ ކުރުވާހަކަ މުބާރާތަށް ހޮވިފައިވާ ވާހަކައެކެވެ.