ދޯހާ (ނޮވެމްބަރު 5) - އެފްސީ ބާސެލޯނާ އަށް ޒަވީ ހެނާންޑޭ ދޫކޮށްލުމަށް އަލް ސާދް އަށް ބާސާއިން ދައްކަންޖެހޭ ފައިސާގެ ތެރެއިން 2.8 މިލިއަން ޑޮލަރު ޒަވީ އަމިއްލަ ހަރަދުގައި ދޭން ނިންމައިފި އެވެ.
މެއި މަހު، ސާދްއާއެކު ޒަވީ އެއްބަސްވުން އާ ކުރީ ދެއަހަރަށެވެ. އެއްބަސްވުމުގައި ބުނާގޮތުން އެއްބަސްވުން ހަމަވުމުގެ ކުރިން އެހެން ކްލަބަކުން އޭނާ ގެންދަން ބޭނުން ވެއްޖެނަމަ ބަދަލުގެ ގޮތުގައި 5.7 މިލިއަން ޑޮލަރު ސާދް އަށް ދޭން ޖެހޭނެ އެވެ.އެފައިސާގެ ބާކީބައި ދައްކާނީ ބާސާއިންނެވެ.
ބާސާގެ ހުސްވެފައިވާ ކޯޗްގެ މަގާމަށް ޒަވީ ހަމަޖައްސަން ބާސާއިން މިއަދު ވަނީ ނިންމައި އެކަން އިއުލާންކޮށްފަ އެވެ. ގަތަރުގެ މީޑިއާތައް ބުނާގޮތުން ޒަވީގެ ކޮންޓްރެކްޓް އުވައިލަދޭން ސާދުން އެއްބަސްވީ ބަދަލުގެ ގޮތުގައި ދައްކަން ޖެހޭ ފައިސާ ހަމަޖެއްސާނެ ގޮތާމެދު ދެ ކްލަބުގެ ދެމެދުގައި އެއްބަސްވުމަށް ފަހު އެވެ.
ބާސާގެ ކުރީގެ ކެޕްޓަން 2015 ގައި އެ ޓީމު ދޫކޮށްލުމަށް ފަހު އޭނާ ކެރިއާގެ ބާކީ ބައި ކުޅުންތެރިޔެއްގެ ގޮތުގައި ހޭދަ ކުރީ ސާދްގަ އެވެ. ކުޅުން ހުއްޓާލުމަށް ފަހު ޒަވީ ކޯޗެއްގެ ގޮތުގައި މަސައްކަތް ކުރަން ފެށީ 2019 ގަ އެވެ. ޒަވީގެ ކޯޗް ކަމުގެ ދަށުން އެ ކްލަބުން ވަނީ ހަތަރު ތަށި ހޯދައިފަ އެވެ. ބާސާގެ ކޯޗްކަމުގައި މިދިޔަ ދޮޅު އަހަރު ހުރި ރޮނަލްޑް ކޫމަން މަގާމުން ވަކި ކުރީ މިދިޔަ ހަފުތާގައި ރަޔޯ ވަޔެކާނޯ އަތުން ބަލިވުމުންނެވެ. އޭގެ ކުރިން އެލް ކްލެސިކޯ މެޗުގައި ވާދަވެރި ރެއާލް މެޑްރިޑް އަތުން ބަލިވި އެވެ.
މާލީގޮތުން އަޑިގަނޑަކަށް ވެއްޓިފައިވާ ބާސާގެ ނަތީޖާތައް މި ސީޒަންގައި ރަނގަޅެއް ނޫނެވެ. ލަލީގާގެ ތާވަލުގެ ނުވަ ވަނައިގައި އެ ޓީމު އޮތީ 6 ޕޮއިންޓާއެކު އެވެ. ބާސެލޯނާގެ އައިޑެންޓިޓީ އަލުން ގެނައުމަށް ޒަވީ ކުރަން ޖެހޭ މަސައްކަތް ބޮޑެވެ.