38 ޓީމާއެކު ފައިގަތަޅާ މުބާރާތް މާދަމާ ފަށަނީ

ޔުނިކް ސްޕޯޓިން އާއި ސްޕޯޓްސް ކޯޕަރޭޝަން ގުޅިގެން ބާއްވާ، ފައިގަތަޅާ މުބާރާތް 38 ޓީމާއެކު މާދަމާ ފަށަން ތައްޔާރު ވެއްޖެ އެވެ

"ފައިގަތަޅާ ފޯރި" ނަމުގައި ބާއްވާ މުބާރާތުގައި އަންހެން 18 ޓީމާއި ފިރިހެން 20 ޓީމު ވަނީ ބައިވެރިވެފަ އެވެ.

ސަރުކާރު އޮފީސް އަދި ކުންފުނިތަކަށް ހުޅުވާލައިގެން ބޭއްވާ މުބާރާތުގައި މާދަމާ ކުޅޭ އަންހެން ކެޓަގަރީގެ ފުރަތަމަ މެޗުގައި ވާދަކުރާނީ ޔޫތު މިނިސްޓްރީ އާއި މުލަ މޯލްޑިވްސް އެވެ. ފިރިހެން ކެޓަގަރީގެ ފުރަތަމަ މެޗުގައި ވާދަކުރާނީ މުލަ މޯލްޑިވްސް އާއި ފެމިލީ ކޯޓެވެ.

ދެ ކެޓގަރީން ވެސް މުބާރާތުން ޗެމްޕިއަންކަންކަން ހޯދާ ދެ ޓީމަށް ފައިސާގެ އިނާމެއްގެ ގޮތުގައި 10،000 ރުފިޔާ ދިނުމަށް ވަނީ ހަމަޖެހިފަ އެވެ. މުބާރާތުގެ އެންމެ މޮޅު ފަސް ކުޅުންތެރިންނަށް ސޮނީ ސްޕޯޓްސްއިން ދޭ ގިފްޓް ވައުޗަރެއް ލިބޭނެ އެވެ. އަންނަ އާދިއްތަ ދުވަހުގެ ނިޔަލަށް ކުރިއަށްދާ މުބާރާތުގެ މެޗުތައް ކުޅޭނީ ހުޅުމާލޭގަ އެވެ. މުބާރާތް ކުރިއަށް ގެންދާނީ އެޗްޑީސީ އާއި އާރްޑީސީގެ އެހީތެރިކަމާއެކު އެވެ. ފައިގަތަޅާ ކޯޓް ހަދާފައި ވަނީ ހުޅުމާލޭ ދެވަނަ ފޭސްގެ ހިޔާ ފްލެޓް ސަރހައްދުގައި އަތިމައްޗާ ކައިރީ ބަސް ސްޓޭޝަނާ ދިމާލުގަ އެވެ. މެޗުތައް ކުރިއަށް ގެންދާނީ ހަވީރު 4 ން ރޭގަނޑު 11 އަށެވެ.