އެލްޓީ ބަލިކޮށް ޓީނޭޖުން ސެމީގެ ޖާގަ ޔަގީން ކޮށްފި

ދެވަނަ ޑިވިޝަން ފުޓުބޯޅަ މުބާރާތުގައި ފަހަތުން އަރައި 2-1 އިން ލިޓްލް ޓައުން (އެލްޓީ) ސްޕޯޓްސް ކުލަބް ބަލިކޮށް، ކްލަބް ޓީނޭޖުން ސެމީ ފައިނަލްގެ ޖާގަ ޔަގީން ކޮށްފި އެވެ.

ޓީނޭޖުން ވަނީ 2003 ވަނަ އަހަރުގެ ތިންވަނަ ޑިވިޝަން މުބާރާތް ކާމިޔާބުކޮށް، ޖެހިގެން އައި 2004 ވަނަ އަހަރުގެ ދެވަނަ ޑިވިޝަނުގެ ސެމީ ފައިނަލާ ހަމައަށް ދަތުރު ކޮށްފަ އެވެ. ނަމަވެސް އޭގެ ފަހުން ކްލަބް ޓީނޭޖް ފުޓުބޯޅައާ ދުރުގައި އޮތުމަށް ފަހު، އެޓީމު ވަނީ މިދިޔަ އަހަރުގެ ތިންވަނަ ޑިވިޝަނުގައި ކުޅެފަ އެވެ.

މިދިޔަ އަހަރުގެ ތިންވަނަ ޑިވިޝަނުގައި ޓީނޭޖް މުބާރާތުން ވަކިވީ ކުއާޓާ ފައިނަލުގައި ޕެނަލްޓީ ޖަހައިގެން ބިސްބުރު ސްޕޯޓްސް ކުލަބް އަތުން ބަލިވެގެންނެވެ. އަދި ބިސްބުރު ވަނީ ސެމީ ފައިނަލުގައި އެލްޓީ ބަލިކޮށްފަ އެވެ. ނަމަވެސް މިއަހަރުގެ ދެވަނަ ޑިވިޝަނުގައި ބިސްބުރު ނިންމާލަން ޖެހުނީ ގުރޫޕް އޭގެ ހަތްވަނައިގަ އެވެ.

މިރޭގެ މެޗުން މޮޅުވެ ހޯދި ތިން ޕޮއިންޓާއެކު ޓީނޭޖު ވަނީ ގުރޫޕް 2 ގެ އެއްވަނަ އަށް ޖެހިލައިފަ އެވެ. ޕޮއިންޓްގެ ގޮތުން ޓީނޭޖާއި އެލްޓީ ވެސް ހަމަހަމަ އެވެ. ދެ ޓީމަށް ލިބިފައި ވަނީ 13 ޕޮއިންޓެވެ. އެކަމަކު ފައިދާ ގޯލަށް ބަލައި ކުރި ލިބެނީ ޓީނޭޖަށެވެ.

މެޗުގެ ނަތީޖާއިން އެންމެ ބޮޑު ހިތްހަމަޖެހުމެއް ލިބޭނީ ތިންވަނައިގައި އޮތް ނިއުރޭޑިއަންޓް ސްޕޯޓްސް ކްލަބަށެވެ. ބުރާސްފަތި ދުވަހު މަހިބަދޫ އާ ދެކޮޅަށް ކުޅޭ މެޗުން މޮޅުވެ ނިއު އަށް 15 ޕޮއިންޓާއެކު ތާވަލުގެ އެއްވަނަ އަށް ޖެހިލެވޭނެ އެވެ. އެ ޓީމު މިހާރު އޮތީ ތިންވަނައިގަ އެވެ.

ގައުމީ ފުޓްބޯޅަ ދަނޑިުގައި މިރޭ ކުޅުނު މެޗުގައި ފުރަތަމަ ލީޑް ނެގީ ވެސް އެލްޓީ އެވެ. އެ ޓީމުގެ ލަންކާގެ ފޯވާޑް މިގަލަންދިގެ ޗަމީރާ ވަނީ މެޗު ފެށިގެން އަށްވަނަ މިނެޓްގައި ލަނޑު ޖަހައިފަ އެވެ.

ޓީނޭޖަށް ނަތީޖާ ހަމަހަމަ ކޮށްދިނީ މެޗުގެ 29 ވަނަ މިނެޓްގައި ސަދިރްދިން އުގަލީ އެވެ. އެ ޓީމު މޮޅުކޮށްދިން ލަނޑު 82 ވަނަ މިނެޓްގައި ޖެހީ މިސްރުގެ އަލީ އަހުމަދު އަފީފީ އެވެ.

މުބާރާތުގެ ސެމީ ފައިނަލަށް ދާނީ ކޮންމެ ގުރޫޕަކުން ވެސް އެންމެ ގަދަ ދެ ޓީމެވެ. ނިއު ރފަހު މެޗުގައި ބުރާސްފަތި ދުވަހުގެ ހަވީރު ނުކުންނާނީ މަހިބަދޫ އަތުން ބަލި ނުވެ ސަލާމަތް ވެއްޖެ ނަމަ ޓީނޭޖާ އެކު ގުރޫޕް ބީ އިން ސެމީ އަށް ދަތުރު ކުރާނީ ނިއު އެވެ. އަދި މެޗު ކާމިޔާބު ކޮށްގެން ނިއު އަށް ގުރޫޕުގެ އެއްވަނަ ހޯދުމުގެ ފުރުސަތު ވެސް އެބަ އޮތެވެ.